• ഇന്ത്യയിൽ 78,055 കേസുകള്‍ ഇതുവരെ റിപ്പോര്‍ട്ട് ചെയ്തു. കഴിഞ്ഞ 24 മണിക്കൂറിനകം 136 പേർ മരണപ്പെട്ടു. 3725 പേർ പുതുതായി രോഗബാധിതരായി. രാജ്യത്തെ കൊറോണ ബാധിച്ച് മരിച്ചവർ 2551 ആയി. 26400 പേര്‍ രോഗവിമുക്തി നേടി. അതായത് മൂന്നിലൊരാള്‍. രോഗമുക്തി നിരക്ക് 32.82 ശതമാനം. മരണനിരക്ക് 3.2 ശതമാനം.
• രാജ്യത്താകെ ഇതുവരെ 1854250 കോവിഡ് ടെസ്റ്റുകൾ നടത്തിയെന്ന് ഇന്ത്യൻ കൗൺസിൽ ഓഫ് മെഡിക്കൽ റിസർച്ച് .351 സർക്കാർ ലബോറട്ടറികളിലും 140 സ്വകാര്യ ലബോറട്ടറി കളിലുമായാണ് നാളിതുവരെ ഇത്രയും പരിശോധനകൾ നടത്തിയത്‌.
• മഹാരാഷ്ട്രയിൽ 1495 പേർ പുതിയതായി രോഗബാധിതരായി, ആകെ രോഗബാധിതർ 26000 ലേക്ക്. 54 പേർ മരണപ്പെട്ടു. മുംബൈയിൽ മാത്രം രോഗബാധിതർ 15,747 ആയി.

ധാരാവി

• ഏഷ്യയിലെ ഏറ്റവും വലിയ ചേരിയായ ധാരാവിയിൽ രോഗികൾ 1000 കടന്നു. ബുധനാഴ്‌ച 66 പേർക്കുകൂടി രോഗം സ്ഥിരീകരിച്ചതോടെ രോഗികൾ 1028 ആയി. മരണം 40.
• ഏപ്രിൽ നാലിനാണ്‌‌ ചേരിയിലെ  മുകുന്ദ്‌ നഗറിൽ ആദ്യമായി രോഗം റിപ്പോർട്ട്‌ ചെയ്‌തത്‌. 20 ദിവസംകൊണ്ട്‌ രോഗികൾ 170 ആയി. 11 മരണവും. അടുത്ത 20 ദിവസംകൊണ്ട്‌ രോഗികൾ 1000 കടന്നു.535 ഏക്കറിൽ സ്ഥിതിചെയ്യുന്ന ചേരിയിൽ 16 ലക്ഷം പേരാണ്‌ താമസിക്കുന്നത്‌. രേഖകളില്ലാതെ 2.5 ലക്ഷം അതിഥിത്തൊഴിലാളികളുമുണ്ട്‌.  80 ശതമാനം വീടും 100 ചതുരശ്രയടിക്ക്‌ താഴെയാണ്‌ വലുപ്പം. ധാരാവിയില്‍ പൊതു ശൗചാലയങ്ങളാണുള്ളത്‌. ഒരെണ്ണം 200–-250 പേരാണ്‌ ഉപയോഗിക്കുന്നത്‌. ഇതിനാൽ തന്നെ ശാരീരിക അകലമടക്കമുള്ളവ ഇവിടെ യാഥാർഥ്യമാകില്ല. നിലവിൽ ധാരാവിയിൽ മാത്രം 190 നിയന്ത്രിതമേഖലയാണുള്ളത്‌. ഈ പ്രദേശം മുഴുവൻ അടച്ചിരിക്കുകയാണ്‌. ഇത്രയും കർശന നിയന്ത്രണം നടപ്പാക്കിയിട്ടും രോഗികൾ വർധിക്കുന്നത്‌ അധികൃതരെ ഭയപ്പെടുത്തുന്നു.
• രാജ്യ തലസ്ഥാനമായ ഡൽഹിയിൽ മരണം 100 കടന്നു. ഇന്നലെ മാത്രം  20 പേർ മരിച്ചു.
• തമിഴ്നാട്ടിൽ കോവിഡ് രോഗികളുടെ സംഖ്യ 9000 ആയി. തമിഴ്നാട്ടിലെ കോയമ്പേട് പച്ചക്കറി മാർക്കറ്റില്‍നിന്നും രോ​ഗം ബാധിച്ചവര്‍ 1800.
• മദ്ധ്യപ്രദേശിൽ 187പുതിയ കോവിഡ് ബാധിതർ.
• രാജസ്ഥാനിൽ പുതിയ കോവിഡ് രോഗികൾ 202 ആയി.
• കർണാടകത്തിൽ 34ഉം, തെലുങ്കാനയിൽ 41 ഉം പുതിയ കോവിഡ് രോഗികൾ
• പശ്ചിമ ബംഗാളിൽ പുതുതായി രോഗം ബാധിച്ചവർ 117
• യുപിയിൽ 22 തടവുകാർക്ക് കോവിഡ്. ആഗ്ര സെൻട്രൽ ജയിലിലെ 11 പേർക്കും മൊറാദാബാദ് ജയിലിലെ 6 പേർക്കും താൽക്കാലിക ജയിലിലെ 5 പേർക്കുമാണ് രോഗം.
• കോവിഡ് ബാധിച്ച് പടിഞ്ഞാറൻ ഡൽഹിയിലെ ആർമി ബേസ് ആശുപത്രിയിൽ ചികിത്സയിലായിരുന്ന 31 വയസുള്ള സൈനികൻ ആത്മഹത്യ ചെയ്തു. സി ഐ എസ് എഫ് സേനയിൽ കോവിഡ് ബാധിതരുടെ എണ്ണം കൂടുന്നു. കൊൽക്കൊത്തയിൽ ബുധനാഴ്ച്ച 54 സി ഐ എസ് എഫ് സേനാംഗങ്ങൾക്ക് കോവിഡ് സ്ഥിരികരിച്ചു.
• ഡൽഹി മുഖ്യമന്ത്രി അരവിന്ദ് കെജ്രിവാളിന് ലഭിച്ചത് 4,37,000 നിർദ്ദേശങ്ങൾ.
  മെയ് 17ന് ലോക്ക്ഡൗൺ അവസാനിക്കാനിരിക്കെ ഡൽഹിയിൽ സ്വീകരിക്കേണ്ട തുടർ നടപടികൾ എന്ത് എന്ന കാര്യത്തിൽ പൊതുജനങ്ങളിൽ നിന്നും വിദഗ്ദരി ൽ നിന്നും നിർദ്ദേശങ്ങൾ ക്ഷണിച്ച ഡൽഹി മുഖ്യമന്ത്രിക്ക് വാട്ട്സ്ആപ്പ് വഴി 4 ലക്ഷവും ഈ മെയിൽ വഴി 10,000 വും റിക്കാർഡ് ചെയ്ത സന്ദേശങ്ങളായി 27000 നിർദ്ദേശങ്ങളുമാണ് ഒരു ദിവസം കൊണ്ട് ലഭിച്ചത്. ലഭിക്കുന്ന മികച്ച നിർദ്ദേശങ്ങൾ ഡോക്ടർമാരുമായുംവിദഗ്ദരുമായും ചർച്ച ചെയ്ത് ഡൽഹി ഗവൺമെൻ്റിൻ്റെ നിർദ്ദേശങ്ങളായി കേന്ദ്ര ഗവൺമെൻ്റിന് സമർപ്പിക്കും.
• ഐ സി എം ആർ സാമൂഹ്യ വ്യാപന സാദ്ധ്യത പരിശോധിക്കുന്നു. രാജ്യം നാലാംഘട്ട ലോക്ഡൗണിലേക്ക്.
• ഇന്ത്യയുടെ വ്യാവസായിക ഉറപ്പാദനം 16.7 ശതമാനം കുറഞ്ഞു. എട്ട് വർഷത്തിനിടെ ആദ്യമായാണ് നെഗറ്റീവ് വളർച്ച രേഖപ്പെടുത്തുന്നത്

അസിം പ്രേംജി യൂണിവേഴ്സിറ്റിയുടെ പഠനം

• ലോക്ക് ഡൗണിനെ തുടർന്ന് നഗരമേഖലയിൽ 80 % പേർക്കും ഗ്രാമീണ മേഖയിൽ 58% പേർക്കും തൊഴിൽ നഷ്ടമായെന്നും, 74% പേർക്ക് കുറച്ച് ഭക്ഷണം മാത്രമേ ലഭിക്കുന്നുള്ളുവെന്നും അസിം പ്രേംജി യൂണിവേഴ്സിറ്റി സെൻ്റർ ഫോർ സസ്റ്റെയിനബിൾ ഡെവലപ്പ്മെൻ്റ് നേതൃത്വത്തിൽ ഏപ്രിൽ 13 മുതൽ മെയ് 9 വരെയുള്ള കാലയളവിൽ ഇന്ത്യയിലെ 12 സംസ്ഥാനങ്ങളിലെ നഗര, ഗ്രാമീണ മേഖലകളിൽ നടത്തിയ സാമ്പിൾ സർവ്വേ ഫലം വ്യക്തമാക്കുന്നു. 3970 പേരിൽ നിന്നാണ് വിവരങ്ങൾ ശേഖരിച്ചത്. നഗര പ്രദേശത്തെ 43% ആളുകളും ഗ്രാമീണ മേഖലയിലെ 34% പേരും അവശ്യ ചെലവ് കൾക്കായി ലോക്ക് ഡൗൺ സമയത്ത് ലോൺ വാങ്ങുകയുണ്ടായിയെന്നും സർവ്വേ വ്യക്തമാക്കുന്നു. (cse.azimpremjiuniversity.edu.in)

• അടച്ചുപൂട്ടലിന്റെ ഏറ്റവും വലിയ കെടുതി അനുഭവിക്കുന്ന രാജ്യത്തെ അസംഘടിതമേഖലാ തൊഴിലാളികള്‍ക്ക് ആശ്വാസം അകലെ. രാജ്യത്തെ 46.1 കോടി തൊഴിലാളികളിൽ 36.9 കോടിയും പണിയെടുക്കുന്നത് അസംഘടിതമേഖലയിലാണ്. 2018ലെ  കണക്ക് പ്രകാരം ഇതില്‍ ഭൂരിപക്ഷവും അതിഥിത്തൊഴിലാളികളാണ്‌. രാജ്യത്തെ സമ്പദ്ഘടന താങ്ങിനിർത്തുന്നതിൽ പ്രധാനപങ്ക്‌ അസംഘടിത തൊഴിലാളികൾക്കാണ്. കയറ്റുമതി അധിഷ്‌ഠിത വ്യവസായകേന്ദ്രങ്ങൾ, ഉൽപ്പാദന ഇടനാഴികൾ, സ്വർണ–-വജ്ര സംസ്‌കരണ മേഖല, കാർഷികോൽപ്പാദനം, തെരുവുവ്യാപാരം, ഇതര അസംഘടിതമേഖലയിൽ കുറെ വര്‍ഷമായി താൽക്കാലിക തൊഴിലാളികളുടെ എണ്ണം പെരുകി. പല സംസ്ഥാനങ്ങളും തൊഴിൽനിയമം മരവിപ്പിച്ചതോടെ  ബഹുഭൂരിപക്ഷത്തിനും തൊഴിൽസുരക്ഷയോ സാമൂഹ്യ സുരക്ഷയോ ഇല്ല‌.

• ഇന്ന് 3 പേർക്ക് കൂടി കോവിഡ് സ്ഥിരീകരിച്ച തോട്കൂടി രാജ്യത്താകെ സി.ആർ പി.എഫിൽ കോവിഡ് സ്ഥിരീകരിച്ചവരുടെയെണ്ണം 247 ആയി ഉയർന്നു. ഇതിൽ 242 പേർ ഇപ്പോൾ ചികിൽസയിലാണ്. 4 പേർ രോഗമുക്തരായപ്പോൾ ഒരാൾ മരണപ്പെടുകയും ചെയ്തു.

കേരള മോഡൽ വീണ്ടും ഇന്ത്യക്കും ലോകത്തിനും മാതൃക: രാമചന്ദ്രഗുഹ

• കേരള മോഡൽ വീണ്ടും ഇന്ത്യക്കും ലോകത്തിനും മാതൃകയാവുകയാണെന്ന് പ്രമുഖ ചരിത്രകാരൻ രാമചന്ദ്രഗുഹ. കേരളവും അവിടത്തെ ജനങ്ങളും മറ്റുളളവരെ
  പലതും പഠിപ്പിക്കുന്നുണ്ട്. കേരളത്തിൻ്റെ നന്മകൾ ഇപ്പോൾ വീണ്ടും ചർച്ച ചെയ്യപ്പെടുകയാണെന്നും,ശാസ്ത്രം, സുതാര്യത ,അധികാര വികേന്ദ്രീകരണം, സാമൂഹിക സമത്വം എന്നിവയാണ് കേരളം അന്നും ഇന്നും നേടിയ വിജയത്തിൻ്റെ അടിസ്ഥാനമെന്നും അദ്ദേഹം ചൂണ്ടി കാട്ടുന്നു. (www.ndtv.com)