Thursday , 21 March 2019
Home » പുതിയവ » അന്തരീക്ഷത്തില്‍ നിന്നും വെള്ളം: അത്ഭുതമായി നാനോദണ്ഡുകള്‍

അന്തരീക്ഷത്തില്‍ നിന്നും വെള്ളം: അത്ഭുതമായി നാനോദണ്ഡുകള്‍

About the author

സംഗീത ചേനംപുല്ലി
ആന്‍റിബയോട്ടിക്കുകളുടെ ചരിത്രത്തിന് തുടക്കംകുറിച്ചുകൊണ്ട് അലക്സാണ്ടര്‍ ഫ്ലെമിംഗ് പെനിസിലിന്‍ കണ്ടുപിടിച്ചത് മറ്റൊരു പരീക്ഷണത്തിനിടെ തീര്‍ത്തും യാദൃശ്ചികമായിട്ടായിരുന്നു. കണ്ടെത്തലുകളുടെ ചരിത്രം തിരഞ്ഞാല്‍ മൈക്രോവേവ് ഓവന്‍, എക്സ്റേ തുടങ്ങി വേറെയും ഉദാഹരണങ്ങള്‍ കാണാം. അന്തരീക്ഷത്തില്‍ നിന്ന്‍ ജലം വലിച്ചെടുത്ത് പുറത്തു വിടാന്‍ കഴിവുള്ള നാനോദണ്ഡുകളാണ് ഈ ഗണത്തില്‍ ഏറ്റവും പുതിയത്. കാര്‍ബണ്‍ അധിഷ്ഠിത രാസവസ്തുവില്‍ നിന്ന് കാന്തികസ്വഭാവമുള്ള നാനോവയറുകള്‍ നിര്‍മ്മിക്കാനുള്ള പരീക്ഷണതിലായിരുന്നു പസഫിക് നോര്‍ത്ത്-വെസ്റ്റ്‌ ലബോറട്ടറിയിലെ ശാസ്ത്രജ്ഞര്‍. പരീക്ഷണത്തിനിടെ അന്തരീക്ഷത്തിലെ ആര്‍ദ്രത കൂടുന്നതിനനുസരിച്ച് നാനോനാനോദണ്ഡുകള്‍ക്ക് ഭാരനഷ്ടം സംഭവിക്കുന്നതായി കണ്ടെത്തി. ആപേക്ഷിക ആര്‍ദ്രത 50-80 ശതമാനത്തിന് മുകളിലായാല്‍ വലിച്ചെടുത്ത ജലം പുറത്ത് വിടുന്നതാണ്ഭാരനഷ്ടത്തിന് കാരണം.

water-spitting-nanorods-1കാപ്പിലറി കണ്ടന്‍സേഷന്‍ എന്ന പ്രക്രിയയിലൂടെ സാന്ദ്രീകരിക്കപ്പെടുന്ന വെള്ളത്തുള്ളികള്‍  പ്രതലബലം ( ജലോപരിതലത്തിന്റെ വലിവുബലം) മൂലം ദണ്ഡുകളെ തമ്മില്‍ വലിച്ചടുപ്പിക്കുന്നു. ഇവ തമ്മിലുള്ള അകലം 1.5 നാനോമീറ്ററില്‍ കുറയുമ്പോള്‍ ഇവയുടെ കാര്‍ബണ്‍ അധിഷ്ഠിത രാസഘടനകാരണമുള്ള  ജലവികര്‍ഷണ സ്വഭാവം മൂലം വലിച്ചെടുത്ത ജലത്തെ പുറം തള്ളുന്നു. സോള്‍വെന്റ് കാവിറ്റെഷന്‍ എന്നാണു ഈ ബാഷ്പീകരണ പ്രക്രിയ അറിയപ്പെടുന്നത്.

അന്തരീക്ഷത്തില്‍ നിന്നും ജലാംശം വലിച്ചെടുത്ത് കുടിവെള്ളമായി ഉപയോഗിക്കാനും, ജലശുദ്ധീകരണത്തിനും ഈ സാങ്കേതിക വിദ്യസഹായകമായേക്കാം. ജലദൌര്‍ലഭ്യം ഉള്ള മരുഭൂമികളിലും മറ്റും ഈ സാങ്കേതിക വിദ്യ ഉപയോഗിക്കാം എന്നും ഗവേഷകസംഘം കരുതുന്നു. കൂടാതെ വിയര്‍പ്പിനെ വലിച്ചെടുക്കാന്‍ കഴിവുള്ള വസ്ത്രങ്ങള്‍ നിര്‍മ്മിക്കാനും ഉപയോഗിക്കാം. പ്രായോഗികതലത്തില്‍ എത്തണമെങ്കില്‍ ദണ്ഡുകളുടെ ആകൃതി, വലിപ്പം തുടങ്ങിയവ സംബന്ധിച്ച് പഠനങ്ങള്‍ നടത്തേണ്ടതുണ്ട്. കൂടുതല്‍ ജലം ആഗിരണം ചെയ്യാനാകും വിധം ആകൃതിയിലും വലിപ്പത്തിലും രാസസ്വഭാവത്തിലും മാറ്റങ്ങള്‍ വരുത്തേണ്ടതുണ്ട്. എങ്കിലും അന്തരീക്ഷത്തില്‍ നിന്ന് ജലാംശം വലിച്ചെടുക്കാന്‍ പുതിയൊരു സാധ്യത ഈ കണ്ടെത്തല്‍ മുന്നോട്ട് വെയ്ക്കുന്നു.

അവലംബം

http://www.nature.com/nnano/journal/vaop/ncurrent/full/nnano.2016.91.html

Check Also

വാക്സിൻ വിരുദ്ധ പ്രചാരണങ്ങളുടെ രീതിശാസ്ത്രം

  ഇന്ത്യയിലെ ഇതര സംസ്ഥാനങ്ങളെ അപേക്ഷിച്ച് ആരോഗ്യമേഖലയിൽ കേരളം സ്തുത്യർഹമായ നേട്ടം കൈവരിച്ചിട്ടുണ്ട്. സർക്കാർ നിയന്ത്രണത്തിലുള്ള ആരോഗ്യ കേന്ദ്രങ്ങളും മെഡിക്കൽ …

Leave a Reply

%d bloggers like this: