Thursday , 20 September 2018
Home » പുതിയവ » വെള്ളപ്പൊക്കത്തിന് ശേഷം വീടുകളിലേക്ക് ശ്രദ്ധയോടെ ..

വെള്ളപ്പൊക്കത്തിന് ശേഷം വീടുകളിലേക്ക് ശ്രദ്ധയോടെ ..

ഡോ. സുരേഷ് സി. പിള്ള

ഡോക്ടര്‍

വെള്ളം കയറിയ വീടുകളിലേക്ക് കയറുന്നതിന് തിരക്കു കൂട്ടാതെ വേണ്ട വിധം മുൻകരുതലുകൾ എടുത്ത ശേഷം മാത്രം താമസം മാറ്റുക. അത്യാവശ്യമായി ശ്രദ്ധ പതിയേണ്ട ചില കാര്യങ്ങൾ ആണ് താഴെ പറയുന്നത്.

1. സുരക്ഷ ആദ്യം 

ഏറ്റവും പ്രധാനമായി ശ്രദ്ധിക്കേണ്ട കാര്യം, പ്രളയ ദുരിതത്തിൽ പെട്ട വീട്ടിൽ സുരക്ഷിതമായി തുടർന്ന് താമസിക്കാൻ എന്തൊക്കെ ചെയ്യണം ന്നുള്ളതാണ്. വെള്ളം കയറിയ വീടുകളിൽ ഇലക്ട്രിക്ക് വയറിങ്ങുകൾ സുരക്ഷിതമല്ലാത്ത വിധം ചീത്തയാകാൻ സാധ്യത ഉണ്ട്. മെയിൻ സ്വിച്ച് ഓഫ് ആക്കിയതിനു ശേഷം ഇലക്ട്രിക്ക് വയറിങ്ങുകളും മറ്റ് വർക്കുകളും സുരക്ഷിതമാണോ എന്ന് ഒരു അംഗീകാരമുള്ള ഇലക്ട്രീഷ്യനെ കൊണ്ട് ചെക്ക് ചെയ്യിക്കുക ആണ് ആദ്യം ചെയ്യേണ്ടത്. ആദ്യമായി വീട്ടിൽ കയറുമ്പോൾ ചെരിപ്പിട്ടു വേണം കയറാൻ. കഴിയുമെങ്കിൽ ബൂട്ട് ഉപയോഗിക്കുക. വെള്ളത്തിന്റെ കൂടെ കൂർത്ത വസ്തുക്കളോ വസ്തുക്കളോ, ആണിയോ, ഷാർപ് ആയ കല്ലുകളോ, കക്കൂസ് മാലിന്യങ്ങളോ ഒക്കെ വീടിന്റെ ഉള്ളിൽ കാണാം.

2. ക്ഷുദ്രജീവികൾ, ഇഴജന്തുക്കൾ

വെള്ളപ്പാച്ചിലിൽ നിന്നും രക്ഷ നേടാനായി ഇഴജന്തുക്കളും, മറ്റു ക്ഷുദ്ര ജീവികളും വീട്ടിലെ അലമാരയുടെ ഉള്ളിലോ, കട്ടിലിന്റെ അടിയിലോ, മേശയിലോ, അടുക്കളയുടെയോ, വീടിന്റെ മറ്റു മുറികളിലോ, തട്ടിൻപുറത്തോ ഒക്കെ അഭയം തേടിയിരിക്കാം. വീട്ടിലെ മുതിർന്ന ആൾ ഒരു നീണ്ട വടിയും ആയി വീടിന്റെ എല്ലാ ഭാഗങ്ങളും സൂക്ഷ്മമായി നിരീക്ഷിച്ച ശേഷം മാത്രമേ മറ്റുള്ളവർ വീട്ടിലേക്ക് പ്രവേശിക്കാവൂ. പാമ്പുകളെ വീട്ടിൽ കണ്ടാൽ ഉടനെ വനം വകുപ്പിനെ വിവരം അറിയിക്കുക. മറ്റുള്ള ക്ഷുദ്ര ജീവികളെ സുരക്ഷിതമായി വീടിനു വെളിയിൽ ആക്കുക.

3. വീട്ടിൽ സൂക്ഷിച്ചിരുന്ന ഭക്ഷണ സാധനങ്ങൾ

പ്രളയ ജലവും ആയി സമ്പർക്കത്തിൽ വന്ന വീട്ടിൽ സൂക്ഷിച്ചിരുന്ന ഭക്ഷണ സാധനങ്ങൾ (അരി ഉൾപ്പെടെ) എല്ലാം തന്നെ നശിപ്പിച്ചു കളയുന്നതാണ് ഉത്തമം. മലിനജലവും, കക്കൂസ് മാലിന്യങ്ങളും ആയി സമ്പർക്കം ആയ വസ്തുക്കൾ പിന്നീട് പല തരത്തിലുള്ള ആരോഗ്യ പ്രശ്നങ്ങൾ ഉണ്ടാക്കിയേക്കാം. എത്ര കഴുകിയാലും ഇ.കോളി പോലുള്ള ബാക്ടീരിയകൾ നശിക്കില്ല.

4. ഫർണീച്ചറുകൾ, കട്ടിൽ, മെത്ത, കുഷ്യനുകൾ

ഉപയോഗ ശൂന്യമായ ഫർണീച്ചറുകൾ, കട്ടിൽ, മെത്ത, കുഷ്യനുകൾ, വിരിപ്പ് ഇവ കളയുക. ബാക്കിയുള്ള ഉപയോഗ യോഗ്യമായ ഫർണീച്ചറുകൾ വീടിനു പുറത്തേക്കു മാറ്റിയാൽ ക്ലീനിങ് എളുപ്പം ആകും.

5. വീട്ടിനുള്ളിലെ വെള്ളം, ചെളി

ഒരു വീതിയുള്ള മണ്വെട്ടി (shovel) ഉപയോഗിച്ച് മണ്ണും ചെളിയും നീക്കുക ആണ് പിന്നീട് ചെയ്യേണ്ട ജോലി. കൂടുതൽ വെള്ളം ഉണ്ടെങ്കിൽ പമ്പ് ഉപയോഗിച്ചു നീക്കേണ്ടി വരും. കയ്യിൽ പറ്റുമെങ്കിൽ ഗ്ലൗസ് ധരിക്കാൻ ശ്രദ്ധിക്കുക. അടുത്തുള്ള സൂപ്പർ മാർക്കറ്റിൽ ഗ്ലൗസ് വാങ്ങാൻ കിട്ടും. ഗ്ലൗസ് ഉപയോഗത്തിനു ശേഷം കളയുക. വീട് ക്ലീൻ ചെയ്യുമ്പോൾ ചെരിപ്പ് ഉപയോഗിക്കാൻ ശ്രദ്ധിക്കണം.

6. സോപ്പ് വെള്ളത്തിൽ കഴുകുക

വെള്ളവും ചെളിയും പൂർണ്ണമായും മാറ്റിയതിനു ശേഷം ആദ്യം വെള്ളത്തിൽ കഴുകുക, പിന്നീട് നീണ്ട ഒരു ബ്രഷ് ഉപയോഗിച്ചു പല പ്രാവശ്യം സോപ്പു വെള്ളത്തിൽ കഴുകുക. കഴുകുമ്പോൾ പറ്റുമെങ്കിൽ കയ്യിൽ ഗ്ലൗസ് ധരിക്കാൻ ശ്രദ്ധിക്കുക.

7. അണു നശീകരണം.

നമുക്ക് നാട്ടിൽ ഉപയോഗിക്കാവുന്ന ഏറ്റവും ഫലപ്രദമായ അണു നശീകരണ ഉപാധിയാണ് ബ്ലീച്ചിങ് പൗഡർ അഥവാ Calcium hypochlorite [Ca(ClO)2]. ഇത് വെള്ളവും ആയി പ്രവർത്തിക്കുമ്പോൾ ക്ലോറിൻ ഗ്യാസ് ഉണ്ടാക്കുകയും അത് അണു നാശിനി ആയി ഭവിക്കുകയും ചെയ്യും. Ca(OCl)Cl+H2O —> Ca(OH)2+Cl2. അതായത് ഇത് വെള്ളം ഇല്ലാതെ പൗഡർ ആയി ഉപയോഗിച്ചാൽ അണുനാശിനി അല്ല എന്നർത്ഥം. 1 % ആക്റ്റീവ് ക്ലോറിൻ ലായനി തയ്യാറാക്കുന്ന വിധം. ഒരു വലിയ ടേബിൾ സ്പൂൺ / അല്ലെങ്കിൽ മൂന്നു, നാല് ടീ സ്പൂൺ ബ്ലീച്ചിങ് പൗഡർ കുറച്ചു വെള്ളത്തിൽ ലയിപ്പിച്ച ശേഷം അതിലേക്ക് ഒരു ലിറ്റർ വെള്ളം ഒഴിക്കുക. ഏകദേശം പത്തു പതിനഞ്ചു മിനിട്ട് വച്ചതിനു ശേഷം ഈ ലായനി നിലം തുടയ്ക്കാനായി ഉപയോഗിക്കാം. (a)

8. പാത്രങ്ങൾ, കുക്കിങ് വെസ്സലുകൾ

പാത്രങ്ങൾ കുക്കിങ് വെസ്സലുകൾ എന്നിവ ആദ്യം തണുത്ത വെള്ളത്തിൽ കഴുകി, ചെളി കളയുക. തുടർന്ന് സോപ്പും, വിം പോലുള്ള ക്ലീനിങ് പൗഡറുകൾ ഉപയോഗിച്ചു നന്നായി കഴുകിയതിനു ശേഷം, ഉണക്കി തിളച്ച വെള്ളത്തിൽ ഒന്നു കൂടി കഴുകി അണു വിമുക്തം ആക്കിയതിനു ശേഷമേ ഉപയോഗിക്കാവൂ.

ആകെ ക്ലീനിങ്ങുനുള്ള സമയം പതിനെട്ടു മുതൽ ഇരുപതു മണിക്കൂർ വരെ വേണ്ടി വരും. അതായത് രണ്ടു മൂന്നു ദിവസം. അമേരിക്കയിലെ New Orleans ഉണ്ടായ കൊടുങ്കാറ്റിലും പേമാരിയിലും പെട്ട വീടുകൾ ക്ലീൻ ചെയ്തതിന്റെ സമയം ഏകദേശം പതിനെട്ട് മണിക്കൂർ ആണ്.(b)

അപ്പോൾ ശ്രദ്ധിക്കേണ്ട കാര്യം, വേണ്ട വിധം മുൻകരുതലുകൾ എടുത്തു, നന്നായി സമയം എടുത്ത് വേണ്ട രീതിയിൽ ക്ലീൻ ചെയ്ത ശേഷമേ പ്രളയ ദുരിതങ്ങൾ ഉണ്ടായ സ്ഥലത്തെ വീടുകളിൽ താമസം ആക്കാൻ പറ്റൂ.

സന്നദ്ധ സംഘടനകളുടെയും, പൊതു പ്രവർത്തകരുടെയും, ദുരിതാശ്വാസ പ്രവർത്തകരുടെയും ജോലി ക്യാമ്പുകളിൽ ആളുകളെ എത്തിക്കുന്നതുവരെയും, അവരെ സംരക്ഷിക്കുന്നതു കൊണ്ടും തീർന്നില്ല. വെള്ളം കയറിയ വീടുകളിലേക്ക് താമസത്തിനു കയറുന്നതിന് മുൻപ് വീട് സുരക്ഷിതമായി താമസിക്കാൻ അനുയോജ്യം ആക്കാൻ സഹായിക്കുന്നതും ദുരിതാശ്വാസ പ്രവർത്തനത്തിൽപ്പെട്ട കാര്യം തന്നെ എന്ന് പ്രത്യേകം പറയേണ്ടത് ഇല്ലല്ലോ?


അവലംബം

a) Collecting, preserving and shipping specimens for the diagnosis of avian influenza A(H5N1) virus infection, Guide for field operations, October 2006.

b) (Riggs, Margaret A., et al. “Resident cleanup activities, characteristics of flood-damaged homes and airborne microbial concentrations in New Orleans, Louisiana, October 2005.” Environmental research 106.3 (2008): 401-409.).

ചിത്രത്തിന് കടപ്പാട് – ഉണ്ണി ഗണേഷ്, മണ്‍റോത്തുരുത്ത്

Check Also

പുറത്തേയ്ക്ക് പോകേണ്ടിയിരുന്ന ആ പന്ത് എങ്ങനെ ഗോളായി?

ഒരു ഫുട്ബോൾ കളിയിലെ ഏറ്റവും കൗതുകകരമായ കാഴ്ചകളിൽ ഒന്നാണ് ഫ്രീ കിക്ക്. കളിക്കാരന്റെ ചവിട്ട് കൊണ്ട് നേരേ തെറിക്കുന്ന പന്ത് പ്രതീക്ഷയ്ക്ക് വിരുദ്ധമായി വള‍ഞ്ഞുപോയി ഗോൾ പോസ്റ്റിലേയ്ക്ക് കയറുന്ന ട്രിക്കാണത്. പന്തിന്റെ സ‍ഞ്ചാരപാതയ്ക്ക് വരുന്ന നാടകീയമായ ആ വളവ് എങ്ങനെ സംഭവിക്കുന്നു എന്ന് ആലോചിച്ചിട്ടുണ്ടോ? സംഗതി സിമ്പിളാണ്. മാഗ്നസ് പ്രഭാവം എന്നൊരു സംഗതിയാണ് അവിടെ പ്രവർത്തിക്കുന്നത്.

Leave a Reply

%d bloggers like this: