കേരളം ശാസ്ത്രത്തിന്റെ ഉത്സവത്തിലേക്ക്

Read Time:3 Minute

വരുന്ന ഡിസംബറിന്റെ തണുപ്പിൽ, കൊച്ചുകേരളത്തിന്റെ തെക്കേയറ്റത്ത് ഒരുത്സവം മിഴി തുറക്കുകയാണ്. ശാസ്ത്രത്തിന്റെ ഉത്സവം! ശാസ്ത്രത്തിന്റെ ഉത്സവമോ? അതെ ഒരു അഖില ലോകശാസ്ത്രോത്സവം! ശാസ്ത്രം, അറിവ്, കഴിവ്, കല, നൂതനത്വം, സാങ്കേതികവിദ്യ എല്ലാറ്റിന്റെയുമൊരു സമജ്ഞസസമ്മേളനം!

സകലദിക്കുകളിൽ നിന്നും ആബാലവൃദ്ധം ജനതതി വന്നു ചേർന്നു ശാസ്ത്രത്തെ ആഘോഷിക്കുന്ന, പുണരുന്നയിടം! എണ്ണമറ്റ മണ്ഡലങ്ങളിൽ ലോകത്തിനു വിളക്കുമാടമായ കേരളം ശാസ്ത്രത്തെ ജനങ്ങളിലേക്കെത്തിച്ച് ഈ തിരിഞ്ഞുനടപ്പു കാലഘട്ടത്തിൽ പുതുമാതൃക തീർക്കുന്ന മേളം! നൂറ്റാണ്ടുകൾക്കു മുമ്പ്, ഡാവിഞ്ചി, ഗലീലിയോ പ്രഭൃതി ദാർശനികർ മുതലിന്നോളം പ്രപഞ്ചരഹസ്യങ്ങൾ തുറക്കാൻ കലയെയും ശാസ്ത്രത്തെയും മിശ്രണമാക്കിയ പൈതൃകത്തെ, മനുഷ്യചിന്തയെ പിടിച്ചു കുലുക്കിയ, പുരോഗമിപ്പിച്ച ശാസ്ത്രചിന്തയുടെ ആശയാവിഷ്കാരങ്ങളെ കയ്യാളിക്കൊണ്ടൊരുക്കുന്ന പ്രദർശന മാമാങ്കം ! അരികെയകലെ, അണു മുതലാന വരെ, അടുക്കള മുതലാകാശവുമതിനുമപ്പുറവും വരെ, സൂക്ഷ്മ സ്ഥൂല പ്രപഞ്ചമാകെ കണ്ടറിഞ്ഞ മനുഷ്യന് ഉരുവായിയൂറിയുറവായ ജ്ഞാനം, ശാസ്ത്രം , അതിന്റെ സൗന്ദര്യം ഒക്കെയും പുതുസാങ്കേതികസങ്കേതങ്ങളാൽ, നൂതനത്വത്തത്താൽ, അതിരുകളില്ലാത്ത സർഗ്ഗാത്മകതയാൽ സംയോജിപ്പിക്കുന്ന, കലാവേലകളുടെ കാഴ്ചപ്പൂരം!

മാത്രമോ, മുൻപും പിൻപുമായി, സമാന്തരമായി നാടാകെ പരിപാടികൾ, പ്രവർത്തനങ്ങൾ, നമ്മളെങ്ങനെ നമ്മളായെന്നറിയുന്ന, നമ്മളെന്തെന്നറിയുന്ന, നമ്മളും പ്രപഞ്ചവും തമ്മിലെന്തെന്നറിയുന്ന ഒട്ടനേകം ശാസ്ത്രവഴി സഞ്ചാരങ്ങൾ ഒക്കെയും ഈ ഗ്ലോബൽ സയൻസ് ഫെസ്റ്റിവൽ പശ്ചാത്തലത്തിൽ സംഘടിപ്പിക്കപ്പെടുന്നു ! ഡിസംബർ 15 മുതൽ ജനുവരി അവസാനം വരെ തിരുവനന്തപുരം തോന്നക്കലിലെ ബയോ സയൻസ് പാർക്കിൽ. ലോകമൊട്ടാകെ നിന്നുള്ള വിദഗ്ധർ, ശാസ്ത്രജ്ഞർ, കലാകാർ, കാഴ്ചക്കാരൊക്കെ ഈ വലിയ പരിപാടിയുടെ ഭാഗമാകും. ലക്ഷക്കണക്കിനു മനുഷ്യർ സന്ദർശകരാകും. ലോകമാകെ നിന്നുള്ള വിവിധ ഏജൻസികൾ സഹകാരികളാകും.

ഏവർക്കും അണിചേരാം…. അറിയാം, ആസ്വദിക്കാം, ശാസ്ത്രത്തെ പുൽകാം. ആഘോഷിക്കാം! അതുവഴി അടിയുറച്ച ശാസ്ത്രീയ മനോവൃത്തിയിലൂന്നിയ പുതുസമൂഹം, നവകേരളം പടുക്കാം! എന്തെന്നോ? ശാസ്ത്രമാണഖിലസാരമൂഴിയിലും അതിനുമപ്പുറത്തും