ആഗോള തവളക്കാൽ വ്യാപാരം

1987-89 കാലത്ത് ഇന്ത്യയും ബംഗ്ലാദേശും തവളക്കാൽ കയറ്റുമതി നിരോധിച്ചതിനുശേഷം ഇന്തോനേഷ്യയാണ് ഏറ്റവും കൂടുതൽ തവളക്കാൽ കയറ്റുമതി ചെയ്യുന്നരാജ്യം. വർഷംതോറും ഏതാണ്ട് 5000 ടൺ. മുസ്ലീം രാജ്യമായ ഇന്തോനേഷ്യ പല മുസ്ലീംവിഭാഗങ്ങൾക്കും ഹലാൽ അല്ലാത്ത തവളക്കാൽ കയറ്റുമതി ചെയ്യുന്നത് വിചിത്രമായി തോന്നാം. വളർത്തുന്ന ഫാമുകളിൽ നിന്നാണ് ഇവിടെ ഇത് ഉൽപ്പാദിപ്പിക്കുന്നതെങ്കിലും ധാരാളം എണ്ണത്തെ വന്യതയിൽ നിന്നും തന്നെ പിടികൂടുന്നതാണ്. വളർത്തുന്നതാണോ കാട്ടിൽനിന്നും പിടിക്കുന്നതാണോ എന്നൊന്നും കണ്ടുപിടിക്കുന്നത് അത്ര എളുപ്പമല്ലതാനും.

അമേരിക്കൻ തദ്ദേശവാസിയായ 20 സെന്റീമീറ്റർ വരെ നീളം വയ്ക്കുന്ന അമേരിക്കൻ ബുൾഫ്രോഗ് ഒറ്റത്തവണ തന്നെ 25000 മുട്ടകൾ ഇടാറുണ്ട്. അതിനാൽത്തന്നെ ഇവയെ വളർത്താൻ ശ്രമിച്ചിരുന്നു. എന്നാൽ ഇതടക്കം പല തവള ഇനങ്ങളും ജീവനുള്ള, അല്ലെങ്കിൽ ജീവനുണ്ടെന്നു തോന്നിക്കുന്ന ഭക്ഷണം മാത്രമേ കഴിക്കുകയുള്ളൂ. അതുവലിയ പ്രശ്നമാണ്, കാരണം ഒന്നുമുതൽ മൂന്നിരട്ടിയോളം ഇറച്ചി കൊടുത്ത് തവളയിറച്ചി ഉണ്ടാക്കുന്നത് നഷ്ടമാണല്ലോ. പിന്നീട് തവളയുടെ മൂക്കിനുമുന്നിൽ കുമിളകളുടെ സഹായത്തോടെയോ വെള്ളത്തിന്റെ ഒഴുക്കിനൊപ്പമോ അല്ലെങ്കിൽ ഭക്ഷണപാത്രത്തിൽ മോട്ടോർ ഉപയോഗിച്ച് ചലിപ്പിച്ചോ ഭക്ഷണം നൽകിയാൽ തവളകളെ പറ്റിച്ച് തീറ്റിക്കാമെന്ന് കണ്ടെത്തി.

ഇന്ന് പലരാജ്യങ്ങളിലും ഈ തവളയെ വ്യാവസായികമായി വളർത്തുന്നുണ്ട്. മറ്റു ചില ഇനമായ കടുവത്തവളയ്ക്ക് ഭക്ഷണം ഇളകണമെന്നില്ലാത്തതിനാൽ വളർത്താൻ കൂടുതൽ അനുയോജ്യമാണ്. വാൽമാക്രിയെ തവളയാക്കി എടുക്കൽ നല്ല ബുദ്ധിമുട്ടുള്ള കാര്യമാണ്. വാൽമാക്രിയിൽ നിന്നും തവളയിലേക്കുള്ള രൂപമാറ്റത്തിൽ അവയുടെ വലിപ്പം, പ്രായം, ഭാരം എന്നിവയെല്ലാം വളരെ പ്രധാനമാണ്. ചൂട്, വളർത്തുന്നവയുടെ എണ്ണം, വെള്ളത്തിൽ അടങ്ങിയിട്ടുള്ള ലവണങ്ങളുടെയും ധാതുക്കളുടെയും അളവ്, ഗുണം എന്നിവയെല്ലാം ഇവിയുടെ വളർച്ചയെ ബാധിക്കുന്നു. രൂപമാറ്റത്തിനിടയിൽ വളർത്തുന്നയിടത്തെ വൃത്തി ഏറ്റവും പ്രധാനമാണ്. മറ്റു പലകാര്യങ്ങളിലും എന്നപോലെ തവളവളർത്തലിലും ഗവേഷണത്തിലും കയറ്റുമതിയിലും ചൈന പെട്ടെന്ന് കുതിച്ചുചാട്ടം നടത്തിക്കൊണ്ടിരിക്കുകയാണ്.

എന്നാലും ലോകം ഉപദേശിക്കുന്നതു മുഴുവൻ ഏഷ്യൻ രാജ്യങ്ങളോട് ഇവയെ കാട്ടിൽ നിന്നു പിടിക്കരുതെന്നാണ്, ഫ്രാൻസിനോട് തീറ്റ കുറയ്ക്കാൻ ആരും പറയില്ല. രണ്ടുമൂന്നുനൂറ്റാണ്ടുകൾ മുഴുവൻ ഏഷ്യൻ-ആഫ്രിക്കൻ രാജ്യങ്ങളെ നേരിട്ടു കൊള്ളയടിച്ചവന്മാർ ഇപ്പോൾ അവിടുത്തെ പരിസ്ഥിതിയേയും സമ്പത്തിനേയും പരോക്ഷമായി മുടിക്കുകയാണ്, അതിപ്പോൾ തവളയായാലും, ചോക്കളേറ്റ് ആയാലും, ധാതുക്കൾ ആയാലും.