Read Time:3 Minute

എൻ.സാനു

ശാസ്ത്രലേഖകൻ

ലൂക്ക എഡിറ്റോറിയൽ ബോർഡംഗം

അന്താരാഷ്ട്ര ചാന്ദ്രനിരീക്ഷണ രാവ്

ലോകത്തെമ്പാടുമുള്ള ചാന്ദ്രപ്രേമികൾക്ക് ഒത്തുചേർന്ന് ചന്ദ്രനിരീക്ഷണം നടത്തുന്നതിനുള്ള ദിനമാണ് (International Observe the Moon Night) ഈ വർഷത്തെ ഒക്ടോബർ 21 ശനി. ചന്ദ്രനെ കുറിച്ച് കൂടുതൽ വിവരങ്ങൾ മനസ്സിലാക്കാനും മനുഷ്യരാശിക്ക് ചന്ദ്രനുമായി ചരിത്രപരമായും സാംസ്കാരികമായുമുള്ള ബന്ധം മനസ്സിലാക്കാനുമുള്ള അവസരമാണ് അന്താരാഷ്ട്ര ചാന്ദ്രനിരീക്ഷണ രാവ്.

എഎല്ലാ വർഷവും സെപ്തംബർ/ഒക്ടോബർ മാസത്തിൽ ശുക്ലപക്ഷത്തിലെ സപ്തമിയിലാണ് (കറുത്തവാവ് കഴിഞ്ഞ് ഏഴാം ദിവസം) ഈ ദിനം ആഘോഷിക്കാറുള്ളത്. അപ്പോൾ ചന്ദ്രൻ അതിന്റെ പകുതിഭാഗം പ്രകാശിതമായ നിലയിൽ സന്ധ്യസമയത്ത് തലയ്ക്കു് മുകളിലായി കാണപ്പെടും. ചാന്ദ്രനിരീക്ഷണത്തിന് ഏറ്റവും അനുയോജ്യമായ സമയായാണ് ഈ സപ്തമിയെ കണക്കാക്കുന്നത്. ഈ സമയത്ത് ചന്ദ്രന്റെ പകലും രാത്രിയും വേർതിരിയുന്ന ഭാഗത്തെ ഗർത്തങ്ങൾ നിഴലും വെളിച്ചവും ചേർന്ന് തൃമാനരൂപത്തിൽ ഭൂമിയിൽ നിന്നും ദൂരദർശിനിയിലൂടെ കാണാനാകും.

കേരളത്തിൽ തുലാവർഷരാത്രികളാണ് ഈ സമയത്ത് എന്നതിനാൽൽ രാത്രി മുഴുവൻ മേഘാവൃതമായിരിക്കാനാണ് സാധ്യത. എങ്കിലും ഏതെങ്കിലും പ്രദേശത്ത് സാധ്യതയുണ്ടെങ്കിൽ നിരീക്ഷണമാകാം. ചന്ദ്രനെ പറ്റി കൂടുതലറിയാനുള്ള ക്ലാസ്സുകൾ, പ്രദർശനങ്ങൾ, രചനാ മത്സരങ്ങൾ, തത്സമയ സംപ്രേക്ഷണങ്ങൾ എന്നിവയും സാധ്യമാകുന്നതാണ്.