Read Time:11 Minute
അനുരാഗ് എസ്.
Space science communicator
പ്രപഞ്ചവിസ്മയങ്ങളിലേക്ക് തുറന്നുവെച്ച 35 വർഷങ്ങൾ
നമുക്കെല്ലാം സുപരിചിതമായ ബഹിരാകാശ ദൂരദർശിനിയാണ് ഹബിൾ സ്പേസ് ടെലിസ്കോപ്പ് (HST). 1990 ഏപ്രിൽ 24നാണ് ഹബിളിനെ ഡിസ്കവറി സ്പേസ് ഷട്ടിൽ ഉപയോഗിച്ച് STS 31 ദൗത്യത്തിലൂടെ ഏകദേശം 540 കിലോമീറ്റർ വലിപ്പമുള്ള ലോ എർത്ത് ഓർബിറ്റിൽ എത്തിച്ചത്. 15 വർഷം ആയുസ്സ് കണക്കാക്കിയിരുന്ന ഹബിൾ ഇപ്പോൾ 35 വയസ്സ് പിന്നിടുകയാണ്. പ്രശസ്ത ജ്യോതിശാസ്ത്രജ്ഞനായ എഡ്വിൻ ഹബിളിന്റെ സ്മരണാർത്ഥം നാമകരണം ചെയ്യപ്പെട്ട HST, നാസയുടെയും യൂറോപ്പ്യൻ സ്പേസ് ഏജൻസിയുടെയും ഒരു സംയുക്ത മിഷനാണ്. നമ്മുടെ പ്രപഞ്ചത്തെ പറ്റിയുള്ള ഒരുപാട് സുപ്രധാന നീരീക്ഷങ്ങൾക്ക് ഹബിൾ ടെലിസ്കോപ്പ് നിർണായക പങ്കുവഹിച്ചിട്ടുണ്ട്.
1.7 ദശലക്ഷം നിരീക്ഷണങ്ങളിലൂടെ 22,000-ലധികം ഗവേഷണ പ്രബന്ധങ്ങൾക്ക് ഹബിൾ വഴിയൊരുക്കിട്ടുണ്ട്.
നാസയുടെ നാല് ഗ്രേറ്റ് ഒബ്സർവേറ്റർസിൽ ഒന്നാണ് HST. കോംപ്റ്റൺ ഗാമാ റേ ഒബ്സർവേറ്ററി, ചന്ദ്ര എക്സ്-റേ ഒബ്സർവേറ്ററി, സ്പേസ് ടെലെസ്കോപ്പ് എന്നിവയാണ് മറ്റുള്ളവ. സ്പേസ് ടെലെസ്കോപ്പ് സയൻസ് ഇൻസ്റ്റിറ്റ്യൂട്ട് (STScI) ഹബിളിന്റെ നിരീക്ഷണ ലക്ഷ്യങ്ങൾ തിരഞ്ഞെടുക്കുകയും ഡാറ്റ പ്രോസസ്സ് ചെയ്യുകയും ഗോദ്ദാർഡ് സ്പേസ് ഫ്ലൈറ്റ് സെന്റർ (GSFC) പേടകത്തെ നിയന്ത്രിക്കുകയും ചെയ്യുന്നു. ഹബിളിലെ പ്രധാന ഉപകരണങ്ങൾ വൈദ്യുതകാന്തിക സ്പെക്ട്രത്തിന്റെ അൾട്രാവയലറ്റ്, ദൃശ്യ, നിയർ-ഇൻഫ്രാറെഡ് മേഖലകളിലാണ് നിരീക്ഷിക്കുന്നത്
1990-ൽ വിക്ഷേപണത്തിനുശേഷം ടെലിസ്കോപ്പിലെ പ്രധാന കണ്ണാടിയുടെ അലൈന്മെന്റിൽ വന്ന പിഴവുകൾ കാരണം ലഭിച്ചിരുന്ന ചിത്രങ്ങളിൽ ചില പ്രശ്നങ്ങൾ നിലനിന്നിരുന്നു. 1993-ൽ STS-61 എന്ന സർവീസിംഗ് ദൗത്യത്തിലൂടെ ഈ പ്രശ്നങ്ങൾ പരിഹരിക്കപ്പെട്ടു. STS-61 ഉൾപ്പടെ അഞ്ചു ദൗത്യങ്ങളിലൂടെ അഞ്ച് ടെലിസ്കോപ്പിലെ പ്രധാന ഉപകരണങ്ങൾ നവീകരിക്കുകയും മാറ്റിസ്ഥാപിക്കുകയും ചെയ്തു. അവസാനത്തെ റിപ്പയറിങ് നടന്നത് 2009 ലാണ്. ഇനിയും പത്തോ അതിൽ കൂടുതലോ വർഷങ്ങൾ HST പ്രവർത്തന ക്ഷമമായിരിക്കുമെന്ന് പ്രതീക്ഷിക്കപ്പെടുന്നു. ശാസ്ത്ര സംഭാവനകൾക്കപ്പുറം ഹബ്ബിലൂടെ ലഭിച്ച ചിത്രങ്ങൾ പൊതുജനങ്ങളെ ജ്യോതിശ്ശാസ്ത്രത്തിലേക്ക് ആകർഷിക്കുന്നതിലും വലിയ പങ്ക് വഹിച്ചിട്ടുണ്ട്. 400 ടെറാബൈറ്റ് ഡാറ്റ സമാഹരിച്ച ഹബിൾ, ഹാബിറ്റബിൾ വേൾഡ്സ് ഒബ്സർവേറ്ററിയുടെ മുന്നോടിയായി, ജീവന്റെ സാധ്യതകൾ തേടുന്നതിനും ശാസ്ത്രീയ കണ്ടെത്തലുകൾക്കുമായി അതിന്റെ ദൌത്യം തുടരുകയാണ്..
ഹബിളിന്റെ കണ്ടെത്തലുകൾ
ടെലിസ്കോപ്പിൽ നിന്ന് നേരിട്ട് ലഭിച്ച ഡാറ്റകളിലൂടെയും പിൻകാല വിശകലങ്ങളിലൂടെയും ഒരുപാട് ശാസ്ത്രനേട്ടങ്ങൾക്ക് ഹബിൾ കാരണമായിട്ടുണ്ട്. അവയിൽ ചിലതാണ്;
- പ്രപഞ്ചം അതിവേഗം വികസിക്കുകയാണെന്നും അതിന് 13.8 ബില്യൺ വർഷം പഴക്കമുണ്ടെന്നും കണ്ടെത്തുന്നതിനും സഹായകമായി.
- തിരിച്ചറിയപെടാതിരുന്ന ഉപഗ്രഹങ്ങൾ കണ്ടെത്തുന്നതിൽ HST എടുത്ത ചിത്രങ്ങൾ സഹായകമായിട്ടുണ്ട്. യുറാനസിന്റെ ഉപഗ്രഹങ്ങളായ ക്യുപിഡും മാബും, നെപ്റ്റ്യൂണിന്റെ ഉപഗ്രഹമായ ഹിപ്പോകാമ്പും അതിൽ പെടുന്നു.
- നെബുലകളെ നിരീക്ഷിക്കുകയും നക്ഷത്ര പരിണാമത്തെ പറ്റിയുള്ള പഠനത്തിന് സഹായകമാകുകയും ചെയ്തു. പില്ലർസ് ഓഫ് ക്രീയേഷൻസ് ആദ്യ നിരീക്ഷങ്ങളിൽപെടുന്നു.
- ഗാലക്സികളുടെ കേന്ദ്രത്തിലെ ബ്ലാക്‌ഹോളുകളെ പറ്റി ആദ്യമായി വ്യക്തമായ തെളിവുകൾ നൽകാൻ, M87 ഗാലക്സിയുടെ കേന്ദ്രം നിരീക്ഷിക്കുന്നതിലൂടെ ഹബിളിന് സാധിച്ചു.
- എക്സോപ്ലാനറ്റുകളെ കണ്ടെത്തുന്നതിലും അവയുടെ അന്തരീക്ഷത്തെ പഠനവിധേയമാക്കുകയും ചെയ്തു. ആദ്യമായി ഒരു എക്സോപ്ലാനെറ്റിന്റെ അന്തരീക്ഷത്തിലെ ഘടകങ്ങൾ തിരിച്ചറിയാൻ HST ക്ക് സാധിച്ചു.
- ഹബിൾ ഡീപ് ഫീൽഡ് ചിത്രങ്ങൾ, സൗരയൂഥത്തിലെ ഗ്രഹങ്ങളുടെ വ്യക്തതയാർന്ന ചിത്രങ്ങൾ എന്നിവയും ഹബിളിന്റെ നേട്ടങ്ങളിൽപ്പെടുന്നു.
നാസയുടെ പിറന്നാൾ സമ്മാനം
1990 ഏപ്രിൽ 24-ന് സ്പേസ് ഷട്ടിൽ ഡിസ്കവറിയിൽ നിന്ന് ഹബിൾ ബഹിരാകാശ ദൂരദർശിനി ഭ്രമണപഥത്തിലെത്തിയതിന്റെ 35-ാം വാർഷികം ആഘോഷിക്കുന്നതിന്റെ ഭാഗമായി നാസ നാല് പുതിയ ചിത്രങ്ങൾ പുറത്തുവിട്ടിട്ടുണ്ട്. പ്ലാനറ്ററി നെബുല NGC 2899, ഗാലക്സി NGC 5335, റോസെറ്റ് നെബുല, മാർസ് എന്നിവയാണ് പുതിയ ചിത്രങ്ങൾ.
ചൊവ്വ: ഹബിളിന്റെ ചൊവ്വാച്ചിത്രം – ഉപരിതലത്തിലെ അഗ്നിപർവ്വതങ്ങൾ, ധ്രുവീയ മഞ്ഞുമൂടലുകൾ, പൊടിക്കാറ്റുകൾ എന്നിവ വ്യക്തമായി കാണിക്കുന്നു. ചുവന്ന ഗ്രഹത്തിന്റെ ഭൂപ്രകൃതിയുടെ വിശദാംശങ്ങൾ ഇത് അനാവരണം ചെയ്യുന്നു.
ഹബിൾ ദൂരദർശിനിയെപ്പറ്റി മറ്റുലൂക്ക ലേഖനങ്ങൾ
- സൂപ്പര്‍ സ്പേസ് ടെലസ്‌ക്കോപ്പുകള്‍
- ഹബിള്‍ ടെലസ്ക്കോപ്പിന് 30-മത് ഹാപ്പി ബര്‍ത്ത് ഡേ
- ഹബിള്‍: കാല്‍നൂറ്റാണ്ടു പിന്നിട്ട പ്രപഞ്ചാന്വേഷണം
- എഡ്വിന്‍ ഹബിള്‍
- എഡ്വിൻ ഹബിളും അനന്ത മജ്ഞാതമവർണനീയമായ പ്രപഞ്ചവും
- ആകാശഗംഗയ്ക്കുമപ്പുറം – സരസ്വതി സൂപ്പർ ക്ലസ്റ്റർ
- Pillars of Creation – ഹബിൾ – ജെയിംസ് വെബ്ബ് ചിത്രങ്ങൾ സംയോജിപ്പിച്ചാൽ എങ്ങനെയിരിക്കും?
- വാസയോഗ്യമായ ഗ്രഹത്തില്‍ വെള്ളം കണ്ടെത്തി ഹബിള്‍ ടെലിസ്കോപ്പ്
- 1290കോടി പ്രകാശവർഷം അകലെയുള്ള നക്ഷത്രത്തെ ദർശിച്ച് ഹബിൾ
- ഓക്സിജന് ഇവിടെ മാത്രമല്ല, മറ്റു ഗാലക്സിയിലുമുണ്ട് പിടി..!!
- കിനാവു പോലെ ഒരു കിലോനോവ
- നക്ഷത്രങ്ങളെ എണ്ണാമോ ?
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
