വില്യം ഹെർഷൽ – നക്ഷത്രങ്ങളുടെ കൂട്ടുകാരൻ

നഗ്നനേത്രങ്ങൾക്ക് ദൃശ്യമല്ലാത്ത ഒരു ഗ്രഹത്തെ – യുറാനസിനെ – ആദ്യമായി ടെലിസ്കോപ്പ് ഉപയോഗിച്ച് കണ്ടെത്തിയതിന്റെ പേരിൽ പ്രസിദ്ധനായ ശാസ്ത്രജ്ഞനാണ് വില്യം ഹെർഷൽ (William Herschel).

വില്യം ഹെർഷൽ 1738 നവംബർ 15 – ന് ജർമനിയിലെ ഹാനോവറിൽ ഒരു സംഗീതജ്ഞന്റെ മകനായി ജനിച്ചു. പിതാവിൽ നിന്ന് സംഗീതം പഠിച്ച വില്യം 19-ാം വയസ്സിൽ ഇംഗ്ലണ്ടിലെത്തി സംഗീതാധ്യാപകനായി. ജ്യോതിശ്ശാസ്ത്രം തനിയെ പഠിച്ചെടുത്ത അദ്ദേഹം സ്വന്തമായി ഉണ്ടാക്കിയ ടെലിസ്കോപ്പുകൾ ഉപയോഗിച്ച് ആകാശനിരീക്ഷണവും ആരംഭിച്ചു. ഒരു കാലത്ത് ലോകത്തെ ഏറ്റവും വലിയ ടെലിസ്കോപ്പുകൾ അദ്ദേഹം ഉണ്ടാക്കിയവ ആയിരുന്നു.
1781 ൽ ആയിരുന്നു ഹെർഷൽ ടെലസ്ക്കോപ്പിലൂടെ യുറാനസിനെ കണ്ടെത്തിയത് കടപ്പാട് വിക്കിപീഡിയ

1772 മുതൽ ഗവേഷണത്തിനായി ഇളയ സഹോദരി കരോലിൻ ഹെർഷലിനേയും ഒപ്പം ചേർത്തു. പിന്നീട് കരോലിനും സ്വന്തം നിലയിൽ പ്രശസ്തയായ ജ്യോതിശ്ശാസ്ത്രജ്ഞയായി. ആദ്യത്തെ പ്രൊഫഷണൽ വനിതാ അസ്ട്രോണമറാണ് കരോലിൻ. ഒന്നാന്തരം നിരീക്ഷക ആയിരുന്ന അവർ 8 ധൂമകേതുക്കളെ (comets) സ്വന്തം നിലയിൽ കണ്ടെത്തിയിട്ടുണ്ട്.

വില്യം ഹെർഷലും കരോലിൻ ഹെർഷലും ടെലസ്കോപ്പ് ലെൻസ് പോളിഷ് ചെയ്യുന്നു 1896 ലെ ലിത്തോഗ്രാഫ് കടപ്പാട് വിക്കിപീഡിയ 
സൂര്യനിൽ നിന്നുള്ള പ്രകാശത്തിൽ മഞ്ഞ, ഓറഞ്ച്, ചുവപ്പ് എന്നീ നിറങ്ങൾക്കപ്പുറം കൂടുതൽ തരംഗദൈർഘ്യമുള്ള രശ്മികൾ ഉണ്ടെന്നും അവ നല്ല തോതിൽ ഊർജം വഹിക്കുന്നുണ്ടെന്നും ആദ്യമായി കണ്ടെത്തിയത് വില്യം ഹെർഷലാണ്. ഈ രശ്മികൾ കാണാൻ കഴിയില്ലെങ്കിലും അവ ഒരു തെർമോമീറ്ററിനെ ചൂടാക്കുന്നു എന്ന് വില്യം തിരിച്ചറിഞ്ഞു. കലോറിഫിക് രശ്മികൾ എന്നാണ് ഇവയെ ആദ്യം വിളിച്ചിരുന്നത്. ഇപ്പോൾ അറിയപ്പെടുന്നത് ഇൻഫ്രാറെഡ് എന്ന പേരിലും. ജ്യോതിശ്ശാസ്ത്ര ഗവേഷണത്തിന് ഇൻഫ്രാറെഡ് ടെലിസ്കോപ്പുകൾ വലിയ സംഭാവന നൽകുന്നുണ്ട്.
വില്യം ഹെർഷൽ രൂപകൽപ്പന ചെയ്ച പ്രസിദ്ധമായ 40 അടി ടെലസ്ക്കോപ്പ് (40-foot (12 m) telescope) കടപ്പാട് വിക്കിപീഡിയ

ഇരട്ട രക്ഷത്രങ്ങളെ (binary stars) ക്കുറിച്ചുള്ള പഠനമായിരുന്നു ഹെർഷലിന്റെ മറ്റൊരു സംഭാവന. ഇത്തരത്തിലുള്ള 800 ലധികം നക്ഷത്രക്കൂട്ടങ്ങളെ അദ്ദേഹം കണ്ടെത്തി. ശനിയുടെയും യുറാനസിന്റേയുമായി രണ്ടു വീതം ഉപഗ്രഹങ്ങളെ കണ്ടെത്തിയതിന്റെ ഖ്യാതിയും ഹെർഷലിന് അവകാശപ്പെട്ടതു തന്നെ.

1788 ഫെബ്രുവരി 5 നാണ്  വില്യം ഹെർഷൽ NGC 2683 എന്ന സ്പൈറൽ ഗ്ലാലക്സി കണ്ടെത്തിയത് കടപ്പാട് വിക്കിപീഡിയ

ഭൂമിക്കു പുറമേ മറ്റു ഗ്രഹങ്ങളിലും ജീവൻ ഉണ്ടാകാമെന്ന് അദ്ദേഹം കരുതി. സൂര്യന്റെ പുറംഭാഗത്തിനാണ് വലിയ ചൂടെന്നും അകത്ത് ജീവികളുണ്ടാകാമെന്നുവരെ വില്യം ഹെർഷൽ വിശ്വസിച്ചു. സർവ്വകലാശാലാ വിദ്യാഭ്യാസമോ ബിരുദങ്ങളോ ഇല്ലെങ്കിലും നല്ലൊരു ഗവേഷകനായി അദ്ദേഹം അറിയപ്പെട്ടു. ബ്രിട്ടനിൽ റോയൽ അസ്ട്രോണമിക്കൽ സൊസൈറ്റി സ്ഥാപിക്കപ്പെട്ടപ്പോൾ ആദ്യ പ്രസിഡന്റ് ആയത് ഹെർഷലാണ്. ജ്യോതിശ്ശാസ്‌ത്രത്തിനു പുറമേ മറ്റു മേഖലകളിലും ഇദ്ദേഹത്തിന്റെ സംഭാവന ഉണ്ടായിട്ടുണ്ട്. പവിഴപ്പുറ്റിനു (coral) കാരണമാകുന്ന ജീവി സസ്യമല്ല, ഒരു തരം അകശേരുകികളാണെന്ന് (invertebrates) സ്ഥാപിച്ചത് വില്യമാണ്.

 

1785ൽ വില്യം ഹെർഷൽ തയ്യാറാക്കിയ ക്ഷീരപഥത്തിന്റെ രൂപരേഖ കടപ്പാട് വിക്കിപീഡിയ

തയ്യാറാക്കിയത് : ഡോ.എൻ.ഷാജി

Leave a Reply