Read Time:37 Minute

നസീഹ സി.പി.

Assistant Professor

Department of Botany, Farook College (Autonomous)

രാവിലെ ചായ കുടിക്കുമ്പോൾ അറിയാതെ ടീ ബാഗിൽ നിന്ന് പുറത്തേക്ക് ഒഴുകിയെത്തിയ ചെറിയ പ്ലാസ്റ്റിക് കണികകൾ അകത്താകുന്നത് ഒന്നു സങ്കൽപ്പിച്ചു നോക്കൂ. അല്ലെങ്കിൽ നിങ്ങളുടെ പ്രിയപ്പെട്ട വസ്ത്രം ഓരോ തവണ കഴുകുമ്പോഴും ആയിരക്കണക്കിന് മൈക്രോഫൈബറുകൾ പരിസ്ഥിതിയിലേക്ക് പുറത്തുവിടുന്നതിനെ കുറിച്ച് ചിന്തിച്ചു നോക്കുക. മൈക്രോപ്ലാസ്റ്റിക് എന്നറിയപ്പെടുന്ന ചെറിയ പ്ലാസ്റ്റിക് കണികകൾ നമ്മുടെ ദൈനംദിന ജീവിതത്തിന്റെ ഏതാണ്ട് എല്ലാ മേഖലകളിലേക്കും കടന്നുകയറിയിട്ടുണ്ട്. നാം ശ്വസിക്കുന്ന വായുവിലും കുടിക്കുന്ന വെള്ളത്തിലും നമ്മുടെ പല നിത്യോപയോഗ വസ്തുക്കളിലും നാമറിയാതെ, നഗ്നനേത്രങ്ങൾ കൊണ്ട് കാണാൻ പോലും സാധിക്കാത്ത മൈക്രോ, നാനോ പ്ലാസ്റ്റിക് കണങ്ങൾ ഉണ്ടെന്ന് പറഞ്ഞാൽ വിശ്വസിക്കാൻ പ്രയാസമാവും. പ്ലാസ്റ്റിക് മലിനീകരണത്തിന്റെ നമ്മൾ നേരിട്ടു കാണാത്ത മറ്റൊരു മുഖമാണ് മൈക്രോപ്ലാസ്റ്റിക്കുകളും നാനോപ്ലാസ്റ്റിക്കുകളും. മനുഷ്യ രക്തത്തിലും ശ്വാസകോശത്തിലും പ്ലാസന്റൽ കലകളിലും പോലും മൈക്രോപ്ലാസ്റ്റിക് കണ്ടെത്തിയിട്ടുണ്ട് (Abbasi & Turner 2021).

ഈ ലേഖനത്തിൽ, നമ്മുടെ ദൈനംദിന ജീവിതത്തിൽ മൈക്രോപ്ലാസ്റ്റിക് എങ്ങനെ കടന്നു വരുന്നു, അതിന്റെ ആരോഗ്യപരമായ പ്രത്യാഘാതങ്ങൾ, കൂടാതെ ഇതിൽ നിന്ന് രക്ഷപ്പെടാൻ നാം സ്വീകരിക്കേണ്ട മുൻകരുതലുകൾ എന്നിവയെപ്പറ്റി പരിശോധിക്കാം.

പൂർണ്ണമായും മനുഷ്യനിർമ്മിതമായ വസ്തുക്കളിൽ നിന്നാണ് മൈക്രോപ്ലാസ്റ്റിക് അന്തരീക്ഷത്തിൽ എത്തുന്നത്. അലക്ഷ്യമായി വലിച്ചെറിയുന്ന പ്ലാസ്റ്റിക്കുകൾ പലതരം വിഘടനങ്ങളിലൂടെ അത്യന്തം ചെറിയ പ്ലാസ്റ്റിക് കണികകളായി മാറുന്നു. ഇവയ്ക്ക് വലുപ്പവും ഭാരവും വളരെ കുറവായതിനാൽ വായുവിലൂടെയും വെള്ളത്തിലൂടെയും എളുപ്പത്തിൽ ഒരു സ്ഥലത്ത് നിന്നും മറ്റൊരിടത്തേക്ക് വ്യാപിക്കാനാവും. സാധാരണ 5 മില്ലിമീറ്ററിൽ താഴെ വലുപ്പമുള്ള ചെറിയ പ്ലാസ്റ്റിക് കണങ്ങളെയാണ് മൈക്രോപ്ലാസ്റ്റിക്സ് എന്ന് വിളിക്കുന്നത്. ഒരു മൈക്രോമീറ്ററിൽ (1000 നാനോമീറ്റർ) താഴെ മാത്രം വലിപ്പമുള്ളവയെ നാനോപ്ലാസ്റ്റിക്കുകൾ എന്നും വിളിക്കുന്നു.

മൈക്രോപ്ലാസ്റ്റിക് കണികകൾ വിവിധ സ്രോതസ്സുകളിൽ നിന്നാണ് ഉത്ഭവിക്കുന്നത്, അവയെ രണ്ട് പ്രധാന വിഭാഗങ്ങളായി തിരിച്ചിരിക്കുന്നു:

പ്രാഥമിക മൈക്രോപ്ലാസ്റ്റിക്സ് (Primary micro plastics): സൗന്ദര്യവർദ്ധക വസ്തുക്കളിലോ തുണിത്തരങ്ങളിലോ കാണപ്പെടുന്ന മൈക്രോബീഡുകൾ പോലുള്ള സൂക്ഷ്മ വലുപ്പങ്ങളിൽ ഇവ നിർമ്മിക്കപ്പെടുന്നു;
ദ്വിതീയ മൈക്രോപ്ലാസ്റ്റിക്സ് (Secondary micro plastics): യാന്ത്രിക തേയ്മാനം മൂലമോ അൾട്രാവയലറ്റ് വികിരണം മൂലമോ വലിയ പ്ലാസ്റ്റിക് വസ്തുക്കൾ നശിക്കുമ്പോഴാണ് ഇവ രൂപം കൊള്ളുന്നത്.

വ്യത്യസ്തമായ ഘടനയും വലുപ്പവും ആകൃതിയും ഉള്ള മൈക്രോപ്ലാസ്റ്റിക് കണങ്ങൾ മണ്ണിലും. ജലസ്രോതസ്സുകളിലും. സമുദ്രത്തിലും എത്തിച്ചേരുകയും അവിടെ മണ്ണിന്റെയും വെള്ളത്തിന്റെയും ഘടനയിൽ ദോഷകരമായ മാറ്റങ്ങൾ ഉണ്ടാക്കുകയും ചെയ്യുന്നു.

പോളിഎഥിലിൻ (PE), പോളിപ്രൊപ്പിലീൻ (PP), നൈലോൺ, പോളിയെസ്റ്റർ, പോളിസ്റ്റൈറിൻ, പോളിയൂറിത്തിൻ (PU), പോളിഎഥിലിൻ ടെറിതാലേറ്റ് (PET) എന്നിങ്ങനെ വ്യത്യസ്തമായ രാസഘടനയിൽ പ്ലാസ്റ്റിക്കുകൾ കാണപ്പെടുന്നു. മണ്ണിൽ കലരുന്ന മൈക്രോപ്ലാസ്റ്റിക് വെള്ളത്തിലൂടെ അരിച്ചിറങ്ങി ഭൂഗർഭജലത്തിൽ കലരുന്നതായി മനസ്സിലാക്കിയിട്ടുണ്ട്. ഭക്ഷണവും, വായുവും, വെള്ളവും വഴി ജലജീവികളിലും മനുഷ്യൻ ഉൾപ്പെടെയുള്ള കര ജീവികളിലും മൈക്രോപ്ലാസ്റ്റിക്കുകൾ എത്തിച്ചേരുന്നു. സസ്യങ്ങളുടെയും മണ്ണിരകളുടെയും സ്വാഭാവിക വളർച്ചയെയും ജീവൽ പ്രവർത്തനങ്ങളെയും ഇവ പലതരത്തിലും പ്രതികൂലമായി ബാധിക്കുന്നതായി കണ്ടെത്തിയിട്ടുണ്ട്.

സമുദ്രങ്ങളിലാണ് ഏറ്റവും കൂടുതൽ മൈക്രോപ്ലാസ്റ്റിക് കണങ്ങൾ ഉള്ളതായി കണ്ടിട്ടുള്ളത്. കഴിഞ്ഞ 10 വർഷത്തിനുള്ളിൽ സമുദ്രജലത്തിൽ മൈക്രോപ്ലാസ്റ്റിക്കിന്റെ അളവ് 5 ഇരട്ടിയായി വർദ്ധിച്ചതായാണ് പഠന വിവരങ്ങൾ. ആൽഫ്രഡ് വെഗ്നർ ഇൻസ്റ്റിറ്റ്യൂട്ടിന്റെ ഒരു പഠനമനുസരിച്ച്, പ്രതിവർഷം ഏകദേശം 8 ദശലക്ഷം ടൺ പ്ലാസ്റ്റിക് മാലിന്യങ്ങൾ സമുദ്രങ്ങളിലേക്ക് പ്രവേശിക്കുന്നു. ഏറ്റവും ചെറിയ പ്ലവകങ്ങൾ (Planktons) മുതൽ വലിയ മത്സ്യങ്ങൾ വരെയുളള സമുദ്രജീവികൾ ഭക്ഷണം ആണെന്ന് കരുതി മൈക്രോപ്ലാസ്റ്റിക് അകത്താക്കും. ഇത് ബയോഅക്യുമുലേഷനിലേക്കും സമുദ്ര ആവാസവ്യവസ്ഥയുടെ അസന്തുതിലാവസ്ഥയിലേക്കും നയിച്ചേക്കാം. സമുദ്രോൽപ്പന്ന ഉപഭോഗത്തിലൂടെയും കുടിവെള്ളത്തിലൂടെയും മനുഷ്യർ മൈക്രോപ്ലാസ്റ്റിക്സിന് വിധേയരാകുന്നു. ഇത് ദീർഘകാല ആരോഗ്യ പ്രത്യാഘാതങ്ങളുണ്ടാക്കാൻ സാധ്യതയുണ്ട്. ന്യൂകാസിൽ സർവകലാശാല നടത്തിയ ഒരു പഠനത്തിൽ, ഒരാൾ അയാളറിയാതെ ആഴ്ചയിൽ ശരാശരി അഞ്ച് ഗ്രാം വരെ പോളിമറുകൾ കഴിക്കുന്നുണ്ടെന്ന് കണക്കാക്കുന്നു(Pletz 2022).

മൈക്രോപ്ലാസ്റ്റിക്സും നാനോപ്ലാസ്റ്റിക്സും ഹൃദയ സംബന്ധമായ ആരോഗ്യ പ്രശ്നങ്ങൾക്ക് കാരണമാകുന്നതിനെ കുറിച്ച് ഗവേഷണങ്ങൾ നടന്നിട്ടുണ്ട്. ഡോ. റോസ് ക്ലാർക്കിന്റെ നേതൃത്വത്തിൽ നടത്തിയ ഒരു പഠനത്തിൽ പക്ഷാഘാതമോ കാഴ്ച നഷ്ടമോ ഉണ്ടായ രോഗികളുടെ ധമനികളിലെ പ്ലാക്കിൽ ഈ പ്ലാസ്റ്റിക്കുകളുടെ അളവ് ഗണ്യമായി ഉയർന്നതായി കണ്ടെത്തി. പ്രത്യേകിച്ച്, രോഗബാധിതമായ കരോട്ടിഡ് ധമനികളിൽ ആരോഗ്യമുള്ള ധമനികളേക്കാൾ 51 മടങ്ങ് കൂടുതൽ പ്ലാസ്റ്റിക് ഉണ്ടായിരുന്നു. ഈ പ്ലാസ്റ്റിക്കുകളുടെ കൃത്യമായ ദോഷഫലങ്ങൾ ഇപ്പോഴും വ്യക്തമല്ലെങ്കിലും, പ്ലാക്കിനുള്ളിലെ രോഗപ്രതിരോധ, സ്റ്റെം സെല്ലുകളിലെ ജീൻ പ്രവർത്തനത്തിലെ മാറ്റം, വാസ്കുലർ അസ്ഥിരത എന്നിവയ്ക്ക് സാധ്യതയുള്ളതായി സൂചിപ്പിക്കുന്നു. മൈക്രോപ്ലാസ്റ്റിക് മനുഷ്യരോഗങ്ങൾക്ക് നേരിട്ട് കാരണമാകുമെന്ന ആശങ്ക ഇത് ഉയർത്തുന്നു. ഹൃദയാരോഗ്യത്തിൽ അവയുടെ സ്വാധീനത്തെക്കുറിച്ച് കൂടുതൽ ഗവേഷണത്തിന്റെ ആവശ്യകത ഇത് വ്യക്തമാക്കുന്നു.

മൈക്രോ പ്ലാസ്റ്റിക്കുകൾ നിത്യ ജീവിതത്തിൽ

മൈക്രോപ്ലാസ്റ്റിക്കുകളും നാനോപ്ലാസ്റ്റിക്കുകളും നിത്യ ഉപയോഗത്തിൽ നമ്മൾ അറിയാതെ കടന്നു കൂടുന്നുണ്ട്. അമേരിക്കയിൽ നടത്തിയ ഒരു ഗവേഷണത്തിൽ (Quian et al., 2024) കണ്ടെത്തിയത് ഒരു ലിറ്റർ കുപ്പി വെള്ളത്തിൽ ശരാശരി 2,40,000 നാനോപ്ലാസ്റ്റിക് കണങ്ങൾ ഉണ്ടാകുമെന്നാണ്. നാം നിത്യേന ഉപയോഗിക്കുന്ന ടൂത്ത് പേസ്റ്റുകളിലും സൗന്ദര്യവർദ്ധക വസ്തുക്കളിലും ഫേസ് വാഷുകളിലും ഫേസ് സ്ക്രബ്ബുകളിലും മറ്റും മൈക്രോപ്ലാസ്റ്റിക്കുകൾ അടങ്ങിയിട്ടുണ്ട്. ഇത്തരം പ്ലാസ്റ്റിക് പോളിമറുകൾ വിഘടനം സംഭവിക്കുകയും നേരിട്ട് വെള്ളത്തിൽ എത്തിച്ചേരുകയും ചെയ്യും.

നാനോപ്ലാസ്റ്റിക്കുകൾ മനുഷ്യന്റെ ആരോഗ്യത്തിന് ഏറ്റവും അപകടകാരിയാണ്. അവ ശ്വാസവായുവിലൂടെയോ അന്നനാളത്തിലൂടെയോ ശരീരത്തിന് അകത്ത് എത്തി രക്തപ്രവാഹത്തിലൂടെ പലതരം കോശങ്ങളിലേക്ക് വ്യാപിക്കാനും സാധ്യതയുണ്ട്. ഇവ എൻഡോസിംബയോസിസ് എന്ന പ്രക്രിയയിലൂടെ ജീവകോശങ്ങളിലേക്ക് ആഗിരണം ചെയ്യപ്പെടും. ഇത് കോശത്തിനകത്ത് റിയാക്ടീവ് ഓക്സിജൻ സ്പീഷീസ് (ROS) എന്ന വിഷ തന്മാത്ര ഉത്പാദിപ്പിക്കാൻ കാരണമാകും. 10 മൈക്രോമീറ്ററിൽ (μm) താഴെ വലിപ്പമുള്ള മൈക്രോപ്ലാസ്റ്റിക്സ് കുടലിൽ നിന്ന് രക്തചംക്രമണ, ലിംഫാറ്റിക് സിസ്റ്റങ്ങളിലേക്ക് വ്യാപിക്കുകയും ഒടുവിൽ തലച്ചോറ്, കരൾ, വൃക്ക എന്നിവയുടെ കലകളിൽ അടിഞ്ഞുകൂടുകയും ചെയ്യും. 0.1 മൈക്രോമീറ്ററിൽ താഴെ വലിപ്പമുള്ള നാനോപ്ലാസ്റ്റിക്സിന് കോശസ്തരങ്ങളെയും (Young et al., 2020) പ്ലാസന്റൽ തടസ്സത്തെയും (Gruber et al., 2020) മറികടക്കാൻ കഴിയും. മൈക്രോപ്ലാസ്റ്റിക്സ് ഉള്ളിൽ ചെല്ലുന്നത് മൂല ദഹനവ്യവസ്ഥയിലും രക്തചംക്രമണവ്യൂഹത്തിലും ശാരീരികമോ രാസപരമോ ആയ സമ്മർദ്ദത്തിനും കാരണമാകും

മൈക്രോപ്ലാസ്റ്റിക്കുകൾ മഴവെള്ളത്തിലും!

കുറെമുമ്പ്, ആശങ്കാജനകമായ പരിസ്ഥിതി പ്രശ്നങ്ങളിൽ ഒന്നായിരുന്നു ആസിഡ് മഴ. വാഹനങ്ങളിൽ നിന്നും ഫാക്ടറികളിൽ നിന്നും ബഹിർഗമിക്കുന്ന സൾഫർ ഡയോക്സൈഡും നൈട്രജൻ ഓക്സൈഡുകളും മഴവെള്ളത്തെ ആസിഡ് സ്വഭാവമുള്ളതാക്കുകയും അത് ജീവജാലങ്ങൾക്ക് ഭീഷണി ആവുകയും ചെയ്യും. ഇത്തരം വിഷവാതകങ്ങളുടെ പുറംതളളൽ സർക്കാർ നിയമങ്ങൾ വന്നതോടെ മാറ്റം വന്നിട്ടുണ്ട്. .

ആസിഡ് മഴയേക്കാൾ വലിയ ഒരു പരിസ്ഥിതി പ്രശ്നം ഇപ്പോൾ ശാസ്ത്രജ്ഞർ കണ്ടെത്തിയത് മൈക്രോപ്ലാസ്റ്റിക്ക് കൊണ്ട് മഴ മലിനമാകുന്നു എന്നതാണ്. ഇതിന് എളുപ്പ പരിഹാരങ്ങൾ ഇല്ല താനും. 2020 ൽ നടത്തിയ ഒരു പഠനത്തിൽ (Brahney et al., 2020) പടിഞ്ഞാറൻ യുഎസിലെ ദേശീയ ഉദ്യാനങ്ങളിലും വനമേഖലകളിലും പ്രതിവർഷം ആയിരം മെട്രിക് ടണ്ണിലധികം പ്ലാസ്റ്റിക് കണികകൾ വീഴുന്നതായി കണ്ടെത്തി; ഇത് 300 ദശലക്ഷം പ്ലാസ്റ്റിക് വെള്ളക്കുപ്പികൾ ആകാശത്തുനിന്നും താഴേക്ക് പതിക്കുന്നതിന് തുല്യമാണ്.

മൈക്രോപ്ലാസ്റ്റിക് മഴയിൽ കാണപ്പെടുന്ന വസ്തുക്കൾ പ്രധാനമായും റോഡുകളിലൂടെ എത്തുന്നുന്ന എന്നാണ് ഗവേഷകർ കണ്ടെത്തിയത്. വാഹനങ്ങൾ റോഡിലൂടെ കടന്നുപോകുമ്പോൾ അവയുടെ ടയറിലെ പലതരം കണങ്ങളും ടയറിനടിയിൽപ്പെട്ട് ചതഞ്ഞ് അരയുന്ന പ്ലാസ്റ്റിക് മാലിന്യങ്ങളും സിന്തറ്റിക് ഫൈബറുകളും എല്ലാം വളരെ ചെറിയ മൈക്രോപ്ലാസ്റ്റിക് കണങ്ങളായി അന്തരീക്ഷത്തിൽ എത്തപ്പെടുന്നു. അതുപോലെതന്നെ പ്ലാസ്റ്റിക് മാലിന്യങ്ങൾ കൊണ്ട് മലിനമായ നമ്മുടെ സമുദ്രങ്ങളും തിരമാലകളോടൊപ്പം അന്തരീക്ഷത്തിലേക്ക് മൈക്രോപ്ലാസ്റ്റിക് തള്ളാൻ ഇടയാക്കുന്നുണ്ട്. ചില പഠനങ്ങൾ പ്രകാരം യു.എസ്., സ്വീഡൻ, ചൈന, അന്റാർട്ടിക്ക എന്നിവിടങ്ങളിൽ നിന്ന് പരിശോധിച്ച മഴവെള്ളത്തിൽ അനുവദനീയമായ പരിധിയെക്കാൾ കൂടിയ അളവിൽ PFAS (per-and polyflouroalkyl substances) അടങ്ങിയിരിക്കുന്നതായി കാണാം. പ്ലാസ്റ്റിക് മലിനീകരണം ഇപ്പോൾ നമ്മുടെ സ്വാഭാവിക ജലചക്രത്തിന്റെ ഭാഗമായി മാറി കഴിഞ്ഞിരിക്കുന്നു. ഏറ്റവും ശുദ്ധമായ ജലമായി കരുതി പോന്നിരുന്ന മഴവെള്ളം വരെ മൈക്രോപ്ലാസ്റ്റിക് കൊണ്ട് മലിനമാകുന്നു എന്നത് നല്ല കാര്യമല്ല.

ഭക്ഷണത്തിലും കുടിവെള്ളത്തിലും

വ്യത്യസ്ത കുടിവെള്ള സ്രോതസ്സുകളിലും ഭക്ഷണ പാക്കേജുകളിലും ഉള്ള മൈക്രോപ്ലാസ്റ്റിക് മലിനീകരണത്തെക്കുറിച്ച് അടുത്തിടെ ചില പഠനവിവരങ്ങൾ പുറത്ത് വരികയുണ്ടായി. വാട്ടർ ബോട്ടിൽ, ഫുഡ് പാക്കേജിങ് പാത്രങ്ങൾ, ടാപ്പ് വെള്ളം എന്നിവയിൽ PP, Poly styrene, PET, PVC, PE, HDPE, LDPE എന്നീ പ്ലാസ്റ്റിക്കുകളിൽ നിന്നുള്ള മൈക്രോപ്ലാസ്റ്റിക് ശകലങ്ങളുടെ വ്യത്യസ്തമായ കണികകൾ കണ്ടെത്തിയതായി റിപ്പോർട്ടുകൾ സൂചിപ്പിക്കുന്നു. യാന്ത്രിക സമ്മർദ്ദം, അൾട്രാ വയലറ്റ് റേഡിയേഷൻ, പ്ലാസ്റ്റിക് വസ്തുക്കളുടെ കുറഞ്ഞ ഗുണനിലവാരം, പഴക്കം എന്നിവയുമായി മൈക്രോപ്ലാസ്റ്റിക് വിഘടനത്തിന് ബന്ധമുണ്ടെന്ന് കരുതുന്നു. കൂടാതെ പൊതുവിൽ കാണപ്പെടുന്ന ഒരു രീതിയാണ് ഒറ്റത്തവണ ഉപയോഗത്തിന്നു ഡിസൈൻ ചെയ്ത പ്ലാസ്റ്റിക് കുടിവെള്ള കുപ്പികളുടെയും ഭക്ഷണ പാത്രങ്ങളുടെയും ആവർത്തിച്ചുള്ള ഉപയോഗം. ഇത് പിന്നീട് മൈക്രോപ്ലാസ്റ്റിക് ചോർച്ചയ്ക്കും ഉപഭോക്താക്കൾക്ക് ആരോഗ്യ ഭീഷണികൾക്കും കാരണമാകുന്നു. ഉയർന്ന താപനിലയിലുള്ള ഭക്ഷണ വസ്തുക്കൾ പ്ലാസ്റ്റിക് പാത്രങ്ങളിൽ നിന്ന് 10 മില്യൺ മൈക്രോ പ്ലാസ്റ്റിക് /മില്ലീ ലിറ്ററിൽ അധികം പുറത്ത് വിടുന്നതായി ഗവേഷണങ്ങൾ തെളിയിക്കുന്നു. ചൂടുള്ള ഭക്ഷണം കൊണ്ടുപോകുന്ന പ്ലാസ്റ്റിക് പാത്രങ്ങളുടെ വർദ്ധിച്ചുവരുന്ന ഉപയോഗം മനുഷ്യന്റെ ആരോഗ്യത്തിന് ഭീഷണിയാകാൻ സാധ്യതയുണ്ട്. കൂടാതെ ഇത്തരത്തിൽ പുറത്തുവരുന്ന മൈക്രോ/നാനോപ്ലാസ്റ്റിക് മനുഷ്യശരീരം ആഗിരണം ചെയ്ത് ദീർഘകാലം ആരോഗ്യത്തെ ബാധിച്ചേക്കാം.

**ടൂത്ത് പേസ്റ്റിലെ പോളിത്തീൻ മൈക്രോകണികകൾ**

പ്ലാസ്റ്റിക് കൊണ്ട് ആവരണം ചെയ്തിരിക്കുന്ന ഡിസ്പോസിബിൾ പേപ്പർ കപ്പുകൾ ചൂടുള്ള പാനീയങ്ങൾ എടുക്കാൻ ഉപയോഗിക്കുമ്പോൾ മൈക്രോപ്ലാസ്റ്റിക്സും ഘനലോഹങ്ങളും അയോണുകളും ഉൾപ്പെടെയുള്ള മറ്റ് ദോഷകരമായ വസ്തുക്കളും പുറത്തുവിടും. പ്ലാസ്റ്റിക് ലൈനിംഗ് വിഘടിക്കുകയും ഈ കണികകളെ ചൂടുള്ള ദ്രാവകത്തിലേക്ക് വിടുകയും ചെയ്യുന്നതിനാലാണ് ഇത് സംഭവിക്കുന്നത്. ഐ.ഐ.ടി. ഖരഗ്പൂർ നടത്തിയ പഠനത്തിൽ, ഓരോ പേപ്പർ കപ്പിനും 15 മിനിറ്റിനുള്ളിൽ ഏകദേശം 25,000 മൈക്രോൺ വലിപ്പമുള്ള മൈക്രോപ്ലാസ്റ്റിക് കണികകൾ ചൂടുവെള്ളത്തിലേക്ക് വിടാൻ കഴിയുമെന്ന് കണ്ടെത്തി.

നോൺ സ്റ്റിക്ക് പാത്രങ്ങൾ

അടുത്തിടെ നടന്ന ഒരു പഠനം മുന്നറിയിപ്പ് നൽകുന്നത് നോൺസ്റ്റിക് പാത്രങ്ങളിൽ ഉണ്ടാകുന്ന പോറലുകൾ ദശലക്ഷക്കണക്കിന് മൈക്രോപ്ലാസ്റ്റിക്കുകളും വിഷകരമായ ഫോറെവർ കെമിക്കൽസും (Forever chemicals) ഭക്ഷണത്തിലേക്ക് പുറത്തുവിടുമെന്നാണ് (Luo et al., 2022). നോൺസ്റ്റിക് കോട്ടിങ് സാധാരണയായി ടെഫ്ലോൺ എന്ന സിന്തറ്റിക് പ്ലാസ്റ്റിക് ആണ്. ഇതിന് ഘർഷണം കുറവും കൂടിയ രാസ, താപ, വൈദ്യുത സ്ഥിരതയുമുണ്ട്. വളരെ ഉപകാരപ്രദമായ ഗുണങ്ങളും സൗകര്യങ്ങളും നൽകുന്നുണ്ടെങ്കിലും, നോൺസ്റ്റിക് കുക്ക് വെയറുകളിലെ ഈ പ്ലാസ്റ്റിക് ലൈനിങ്ങുകൾക്ക് തകരാറുകൾ സംഭവിക്കുമ്പോൾ അവ പല ആരോഗ്യ പ്രശ്നങ്ങൾക്കും കാരണമാകുന്നുണ്ട്. ടെഫ്ലോൺ പൂശിയ പാത്രങ്ങൾക്ക് കേടുപാടുകൾ സംഭവിക്കുമ്പോൾ അത് PFAS (Per- and polyfluoroalkyl substances) പുറത്തുവിടാൻ കാരണമാവുകയും ആരോഗ്യപ്രശ്നങ്ങൾക്ക് കാരണമാകാൻ സാധ്യതയുണ്ടെന്ന് ആസ്ട്രേലിയൻ ഗവേഷകർ കണ്ടെത്തിയിട്ടുണ്ട്. (Banwell et al.,2021).

അടുക്കള ഉപകരണങ്ങൾ കൂടാതെ വസ്ത്രങ്ങൾ, കിടക്ക, ശിശു ഉൽപ്പന്നങ്ങൾ എന്നിവയിലെല്ലാം തന്നെ PFAS മലിനീകരണം വ്യാപകമാണ്. ഈ രാസവസ്തുക്കൾ വർഷങ്ങളോളം ശരീരത്തിൽ നിലനിൽക്കാൻ സാധ്യതയുണ്ടെന്നും, അത് ദീർഘകാല ആരോഗ്യ പ്രശ്നങ്ങൾക്ക് വഴിവെക്കുമെന്നും ശാസ്ത്രജ്ഞർ മുന്നറിയിപ്പ് നൽകുന്നു. സുരക്ഷിതമായ ബദലുകൾ പ്രചാരത്തിൽ വരുന്നത് വരെ സ്റ്റീൽ, ചീനച്ചട്ടി, മൺപാത്രങ്ങൾ എന്നിവ ഉപയോഗിക്കുന്നതാണ് നല്ലത്. പോറൽ വീണതും കോട്ടിംഗ് കേടുവന്നതുമായ നോൺസ്റ്റിക് പാത്രങ്ങൾ തീർച്ചയായും ഒഴിവാക്കേണ്ടതാണ്.

സിന്തറ്റിക് വസ്ത്രങ്ങൾ

സിന്തറ്റിക് വസ്ത്രങ്ങൾ കഴുകുമ്പോൾ ആയിരക്കണക്കിന് മൈക്രോപ്ലാസ്റ്റിക് നാരുകൾ പുറത്തുവരുന്നു, പലപ്പോഴും സാധാരണ ജലശുദ്ധീകരണ സംവിധാനങ്ങളെ മറികടന്ന് ഇവ ജലാശയങ്ങളിൽ എത്തിച്ചേരുന്നു. ഈ മലിനീകരണം ആവാസവ്യവസ്ഥയിൽ ദീർഘകാല പ്രത്യാഘാതങ്ങൾ ഉണ്ടാക്കും. പോളിയെസ്റ്റർ, നൈലോൺ പോലുള്ള സിന്തറ്റിക് നാരുകൾ കൊണ്ട് നിർമ്മിച്ച തുണിത്തരങ്ങൾ, ദ്വിതീയ മൈക്രോപ്ലാസ്റ്റിക്കിന്റെ ഒരു പ്രധാന ഉറവിടമാണ്. പ്ലാസ്റ്റിസൈസറുകൾ, വസ്ത്രങ്ങൾക്കുള്ള ഇംപ്രെഗ്നേഷനായി ഉപയോഗിക്കുന്ന ഫ്ലൂറിനേറ്റഡ് സംയുക്തങ്ങൾ തുടങ്ങിയ അഡിറ്റീവുകളും പ്ലാസ്റ്റിക് തന്മാത്രകളിൽ ചേർക്കുന്നു. വസ്ത്രങ്ങൾ ധരിക്കുമ്പോൾ മൈക്രോപ്ലാസ്റ്റിക് കണികകൾ പുറത്തുവിടുന്നുണ്ട്. കൂടാതെ, സിന്തറ്റിക് വസ്ത്രങ്ങളുടെ അലക്കു മാലിന്യം മൈക്രോപ്ലാസ്റ്റിക്കിന്റെ പ്രധാന ഉറവിടങ്ങളിലൊന്നാണ്: പതിവായി കഴുകുമ്പോൾ, ഈ നാരുകൾ ചെറിയ പ്ലാസ്റ്റിക് കണികകളെ പുറംതള്ളുന്നു, ഇത് മലിനജല സംവിധാനങ്ങളിലേക്കും ഒടുവിൽ നദികളിലേക്കും സമുദ്രങ്ങളിലേക്കും ഒഴുകുന്നു, ഇത് ആഗോള മലിനീകരണത്തിന് കാരണമാകുന്നു. കഴിയുന്നതും സിന്തറ്റിക് വസ്ത്രങ്ങൾ ഉപയോഗിക്കാതിരിക്കുക എന്നതാണ് പ്രധാന പോംവഴി. വാഷിംഗ് മെഷീനിൽ ലിൻട് ശേഖരിക്കുന്ന സംവിധാനമുണ്ടെങ്കിൽ സിന്തറ്റിക് നാരുകൾ വെള്ളത്തിലേക്ക് പോകുന്നത് ഒഴിവാക്കാന് പറ്റും.

പ്ലാസ്റ്റിക് കട്ടിംഗ് ബോർഡുകൾ

ഭക്ഷണത്തിലെ മൈക്രോപ്ലാസ്റ്റിക്കുകളുടെ ഒരു പ്രധാന സ്രോതസ്സാണ് കട്ടിങ് ബോർഡുകൾ എന്ന് 2023ൽ നടത്തിയ ഒരു പഠനത്തിൽ തിരിച്ചറിഞ്ഞിട്ടുണ്ട്. മുറിക്കുന്ന രീതികൾക്കനുസരിച്ചും ബോർഡ് നിർമ്മിച്ചിരിക്കുന്ന വസ്തുക്കൾക്ക് അനുസരിച്ചും പുറത്തേക്ക് വരുന്ന മൈക്രോപ്ലാസ്റ്റിക്കിന്റെ അളവ് വ്യത്യാസപ്പെട്ടിരിക്കും. പോളിപ്രൊപ്പിലിൻ ചോപ്പിംഗ് ബോർഡുകളിൽ നിന്ന് പുറത്തുവരുന്ന മൈക്രോപ്ലാസ്റ്റിക്ക് കണികകളുടെ എണ്ണവും ഭാരവും പോളിഎഥിലിനേക്കാൾ കൂടുതലാണെന്ന് പഠനങ്ങൾ വ്യക്തമാക്കുന്നു.

കശാപ്പു ശാലകളിലും സൂപ്പർമാർക്കറ്റുകളിലും, പോളിഎഥിലിൻ (PE) അധിഷ്ഠിത പ്ലാസ്റ്റിക് കട്ടിംഗ് ബോർഡുകളിൽവെച്ച് തയ്യാറാക്കിയ മാംസ, മത്സ്യ ഉൽപ്പന്നങ്ങളിൽ മൈക്രോ, നാനോപ്ലാസ്റ്റിക്കുകൾ കണ്ടെത്തിയിട്ടുണ്ട്. ചുവന്ന മാംസത്തിൽ (ആട്, ബീഫ്) മൈക്രോപ്ലാസ്റ്റിക് മലിനീകരണത്തിന്റെ ഉറവിടമായി കട്ടിംഗ് ബോർഡുകളുടെ സാധ്യതയെക്കുറിച്ച് അന്വേഷിച്ച ഹബീബും കൂട്ടരും (Habib et al., 2022) മരത്തിൻ്റെ കട്ടിംഗ് ബോർഡിലോ ലോഹനിർമ്മിതമായ മാംസം മുറിക്കുന്ന യന്ത്രം ഉപയോഗിച്ചോ മാംസം സംസ്കരിച്ചപ്പോൾ കണ്ടെത്തിയ മൈക്രോപ്ലാസ്റ്റിക് കണികകളെ അപേക്ഷിച്ച്, പ്ലാസ്റ്റിക് ബോർഡുകൾ അധികം മൈക്രോപ്ലാസ്റ്റിക്കുകൾ സംഭാവന ചെയ്യുന്നതായി കാണിച്ചു. പാചകം ചെയ്യുന്നതിനുമുമ്പ് മാംസം കഴുകുന്നത് മൈക്രോപ്ലാസ്റ്റിക് ലോഡുകൾ ഫലപ്രദമായി കുറയ്ക്കുമെന്ന് റിപ്പോർട്ടുകളുണ്ട്. പക്ഷേ അവയെ പൂർണ്ണമായും ഇല്ലാതാക്കിയില്ല.

ച്യൂയിംഗ് ഗം

ലോസ് ഏഞ്ചൽസിലെ കാലിഫോർണിയ സർവ്വകലാശാലയിലെ ഗവേഷകർ നടത്തിയ പഠനത്തിൽ വിവിധ ബ്രാൻഡുകളുടെ ചൂയിംഗം ചവച്ചതിനുശേഷം ഉളള ഉമിനീർ സാമ്പിളുകൾ പരിശോധന നടത്തി. സാൻ ഡീഗോയിൽ നടന്ന അമേരിക്കൻ കെമിക്കൽ സൊസൈറ്റിയുടെ 2025 മീറ്റിംഗിൽ, യു. സി. എൽ. എ. (University of California, Los Angeles) യിലെ ഗവേഷണ വിദ്യാർത്ഥികളായ ലിസ ലോവും ജാമി ലിയോനാർഡും, സിവിൽ ആൻഡ് എൻവയോൺമെന്റൽ എഞ്ചിനീയറിംഗ് അസോസിയേറ്റ് പ്രൊഫസർ സഞ്ജയ് മൊഹന്തിയും ചേർന്ന് ചില കണ്ടെത്തലുകൾ പങ്കുവെച്ചു. ലിസ ലോസ് 10 വ്യത്യസ്തതരം ബ്രാൻഡുകളിൽ നിന്നുള്ള ഗം ചവയ്ക്കുകയും ഗവേഷകർ അവരുടെ ഉമിനീർ രാസ പരിശോധനയ്ക്ക് വിധേയമാക്കുകയും ചെയ്തു. ഒരു ഗ്രാം ചൂയിംഗ് ഗം ശരാശരി 100 മൈക്രോ പ്ലാസ്റ്റിക് ശകലങ്ങൾ പുറത്തുവിടുന്നതായും ചിലത് 600 ൽ കൂടുതൽ പുറത്തുവിടുന്നതായും അവർ കണ്ടെത്തി. ശരാശരി ഒരു ച്യുയിംഗ് ഗം ഏകദേശം 1.5 ഗ്രാം ഭാരമുള്ളതിനാൽ പതിവായി ച്യുയിംഗ് ഗം ചവക്കുന്നവർ (ഏതാണ്ട് 180 ച്യുയിംഗ് ഗം) പ്രതിവർഷം 30,000 പ്ലാസ്റ്റിക് കണങ്ങൾ വരെ അകത്താക്കാൻ സാധ്യതയുണ്ട്. വിപണികളിൽ ഏറ്റവും സാധാരണയായി വിൽക്കപ്പെടുന്ന ച്യുയിംഗ് ഗം സിന്തറ്റിക് ഗം ആണ്. അതിൽ പെട്രോളിയം ബേസ്ഡ് ആയിട്ടുള്ള പോളിമറുകളാണ് അടങ്ങിയിട്ടുള്ളത്.. ഉമിനീരിലൂടെ അകത്താവുന്നതിനോടൊപ്പം തന്നെ അലക്ഷ്യമായി തുപ്പുന്ന ച്യുയിംഗ് ഗം പൊതു ഇടങ്ങളിൽ മലിനീകരണത്തിനും കാരണമാകുന്നുണ്ട്.

ആൻറി മൈക്രോബിയൽ റെസിസ്റ്റൻസ് (AMR)

ലോകത്തിലെ ഏറ്റവും വലിയ ആഗോള ആരോഗ്യ പ്രതിസന്ധികളിൽ ഒന്നാണ് ആൻറി മൈക്രോബിയൽ റസിസ്റ്റൻസ്. ആൻറി മൈക്രോബിയൽ റസിസ്റ്റൻസ് ഉണ്ടാക്കുന്നതിൽ മൈക്രോപ്ലാസ്റ്റിക്കുകൾക്ക് ഒരു പ്രധാന പങ്കുണ്ടെന്ന് സമീപകാല പഠനങ്ങൾ കാണിക്കുന്നു. ബാക്ടീരിയയിൽ ആൻറി മൈക്രോബിയൽ പ്രതിരോധം സുഗമമാക്കുന്നതിനുള്ള സബ്സ്ട്രേറ്റുകൾ എന്ന നിലയിൽ പ്രധാന പരിസ്ഥിതി മലിനീകരണ ഘടകമായി മൈക്രോപ്ലാസ്റ്റിക് ഉയർന്നു വന്നിട്ടുണ്ട്. മൈക്രോപ്ലാസ്റ്റിക്കുകൾ മരുന്നുകൾക്കെതിരെ പ്രതിരോധശേഷിയുള്ള ബാക്ടീരിയകളുടെ എണ്ണത്തിലുള്ള വർദ്ധനവിന് എങ്ങനെ കാരണമാകുന്നു എന്ന പഠനങ്ങൾ നടന്നിട്ടുണ്ട് (Siddique et al., 2025). ബയോഫിലിം രൂപീകരണത്തിലൂടെ സൂക്ഷ്മജീവി സമൂഹങ്ങളെയും രാസ മലിനീകരണങ്ങളെയും ആൻറി മൈക്രോബിയൽ പ്രതിരോധശേഷിയുള്ള ജീനുകൾ അടങ്ങിയ ജനിതക വസ്തുക്കളെയും ഉൾക്കൊള്ളാനുള്ള അവയുടെ കഴിവാണ് ഇതിന് പ്രധാന കാരണം.

മൈക്രോപ്ലാസ്റ്റിക് മലിനീകരണം കുറക്കുന്നതിന് നമുക്ക് ചെയ്യാവുന്ന കാര്യങ്ങൾ

പ്ലാസ്റ്റിക് വസ്തുക്കൾ ഉപയോഗശേഷം വലിച്ചെറിയാതെ, തരംതിരിച്ച് ഉത്തരവാദിത്തപ്പെട്ട രീതിയിൽ മാലിന്യനിർമാർജന സംവിധാനങ്ങൾ ഉപയോഗപ്പെടുത്തി, അവ മണ്ണിലേക്കും വെള്ളത്തിലേക്കും അന്തരീക്ഷത്തിലേക്കും എത്തുന്നത് തടയാം.
ഒറ്റത്തവണ മാത്രം ഉപയോഗിക്കാൻ ഡിസൈൻ ചെയ്തിരിക്കുന്ന പ്ലാസ്റ്റിക് കുപ്പികളും പാത്രങ്ങളും വീണ്ടും വീണ്ടും ഉപയോഗിക്കാതെ റീസൈക്ലിനായി നൽകുക.
ചൂടുള്ള പാനീയങ്ങളും ഭക്ഷ്യവസ്തുക്കളും എല്ലാത്തരം പ്ലാസ്റ്റിക് കുപ്പികളിലും പാത്രങ്ങളിലും എടുക്കാതിരിക്കുക. ചായ, പായസം പോലുള്ള ചൂടുള്ള പാനീയങ്ങൾ എടുക്കാൻ പേപ്പർ കപ്പിന് പകരം സ്റ്റീൽ ടംബ്ലറുകളോ ഗ്ലാസ് ടംബ്ലറുകളോ സെറാമിക് കപ്പുകളോ ഉപയോഗിക്കാം.
കേടുവന്നതും കോട്ടിങ്ങിന് പോറൽ വീണതുമായ നോൺസ്റ്റിക് പാത്രങ്ങൾ പാടെ ഉപേക്ഷിക്കുക.
പ്ലാസ്റ്റിക് കട്ടിങ് ബോർഡുകൾക്ക് പകരം മരം കൊണ്ടുള്ള കട്ടിങ് ബോർഡുകൾ ഉപയോഗിക്കാം. ഇവ ഉപയോഗശേഷം നന്നായി കഴുകി ഉണക്കി ഉപയോഗിക്കാൻ ശ്രദ്ധിക്കുക.
പരമാവധി പ്രകൃതി സൗഹൃദ നാരുകൾ കൊണ്ടുള്ള വസ്ത്രങ്ങളും തുണിത്തരങ്ങളും കിടക്കവരികളും ഉപയോഗിക്കാം. വാഷിംഗ് മെഷീനിൽ ലിൻ്റ് ശേഖരിക്കുന്ന സംവിധാനം ഘടിപ്പിച്ചു വെച്ചാൽ വെള്ളത്തിലൂടെ സിന്തറ്റിക് ഫൈബറുകൾ പുറന്തള്ളുന്നത് ഒരു പരിധിവരെ കുറയ്ക്കാം.

പല തരം ആരോഗ്യ പ്രശ്നങ്ങൾക്ക് കാരണമാകുന്ന ഡിസ്പോസബ്ൾ സാനിറ്ററി പാഡുകൾക്കു പകരം മെൻസ്ട്രൽ കപ്പു പോലെ പരിസ്ഥിതി സൗഹൃദമായ മാർഗ്ഗങ്ങൾ അവലംബിക്കാം.

References

Abbasi, S., & Turner, A. (2021). Human exposure to microplastics: a study in Iran. Journal of hazardous materials, 403, 123799.
Banwell, C., Housen, T., Smurthwaite, K., Trevenar, S., Walker, L., Todd, K., & Kirk, M. (2021). Health and social concerns about living in three communities affected by per-and polyfluoroalkyl substances (PFAS): A qualitative study in Australia. PloS one, 16(1), e0245141.
Brahney, J., Hallerud, M., Heim, E., Hahnenberger, M., & Sukumaran, S. (2020). Plastic rain in protected areas of the United States. Science, 368(6496), 1257-1260.
Snekkevik, V. K., Cole, M., Gomiero, A., Haave, M., Khan, F. R., & Lusher, A. L. (2024). Beyond the food on your plate: Investigating sources of microplastic contamination in home kitchens. Heliyon, 10(15).
Gruber, E. S., Stadlbauer, V., Pichler, V., Resch-Fauster, K., Todorovic, A., Meisel, and T. C., & Kenner, L. (2023) .To waste or not to waste: questioning potential health risks of micro-and nanoplastics with a focus on their ingestion and potential carcinogenicity. Exposure and health, 15(1), 33-51.
Habib, R. Z., Kindi, R. A., Salem, F. A., Kittaneh, W. F., Poulose, V., Iftikhar, S. H., … & Thiemann, T. (2022). Microplastic contamination of chicken meat and fish through plastic cutting boards. International journal of environmental research and public health, 19(20), 13442.
Luo, Y., Gibson, C. T., Chuah, C., Tang, Y., Naidu, R., & Fang, C. (2022). Raman imaging for the identification of Teflon microplastics and nanoplastics released from non-stick cookware. Science of the Total Environment, 851, 158293.
Pletz, M. (2022). Ingested microplastics: do humans eat one credit card per week? Journal of hazardous materials letters, 3, 100071.
Qian, N., Gao, X., Lang, X., Deng, H., Bratu, T. M., Chen, Q., Stapleton, P., Yan, B., & Min, W. (2024). Rapid single-particle chemical imaging of nanoplastics by SRS microscopy. Proceedings of the National Academy of Sciences of the United States of America, 121(3), e2300582121. https://doi.org/10.1073/pnas.2300582121
Ranjan, V. P., Joseph, A., & Goel, S. (2021). Microplastics and other harmful substances released from disposable paper cups into hot water. Journal of hazardous materials, 404(Pt B), 124118. https://doi.org/10.1016/j.jhazmat.2020.124118
Siddique, A., Hubab, M., Rasheela, A. R. P., Samad, R., Al-Ghouti, M., Sayadi, S., & Zouari, N. (2025). Microplastics and their role in the emergence of antibiotic resistance in bacteria as a threat for the environment. Environmental Chemistry and Ecotoxicology.
Yong, C. Q. Y., Valiyaveettil, S., & Tang, B. L. (2020). Toxicity of microplastics and nanoplastics in mammalian systems. International journal of environmental research and public health, 17(05), 1509. https://doi.org/10.3390/ijerph17051509