Read Time:23 Minute

എൻ.സാനു

ശാസ്ത്രലേഖകൻ

ലൂക്ക എഡിറ്റോറിയൽ ബോർഡംഗം

വാനനിരീക്ഷണം തുടങ്ങുന്നവര്‍ക്കും വാനനിരീക്ഷണം നടത്തുന്നവര്‍ക്കും നല്ല മാസമാണ് ജനുവരി. പ്രയാസംകൂടാതെ കണ്ടെത്താന്‍ കഴിയുന്ന വേട്ടക്കാരൻ (Orion) എന്ന നക്ഷത്രരാശിയെ സന്ധ്യകാശത്ത് ദര്‍ശിക്കാനാകും. മേടം, ഇടവം, മിഥുനം, കാസിയോപ്പിയ, ഭാദ്രപഥം, തുടങ്ങി നമ്മെ ആകര്‍ഷിക്കാന്‍ കഴിയുന്ന നക്ഷത്രരാശികളും തിരുവാതിര, സിറിയസ്, കനോപ്പസ് എന്നിങ്ങനെയുള്ള പ്രഭയേറിയ നക്ഷത്രങ്ങളും ജനുവരിയുടെ താരങ്ങളാണ്. നഗ്നനേത്രങ്ങളാൽ കാണാനാകുന്ന അഞ്ച് ഗ്രഹങ്ങളുടെ പരേഡ് ഈ ജനുവരിയിൽ കാണാം.

പ്രധാന നക്ഷത്രങ്ങളും നക്ഷത്രഗണങ്ങളും

സൗരരാശികൾ

ജനുവരിയിൽ സന്ധ്യാകാശത്ത് നിരീക്ഷണം നടത്തുന്നവര്‍ക്ക് ക്രാന്തിപഥത്തിന് (ecliptic) ഇരുവശത്തുമായി പടിഞ്ഞാറുനിന്നും യഥാക്രമം കുംഭം, മീനം, മേടം, ഇടവം, മുഥുനം, കർക്കിടകം എന്നീ രാശികളെ നിരീക്ഷിക്കാൻ സാധിക്കും. ഇവിടെ കൊടുത്തിട്ടുള്ള നക്ഷത്രമാപ്പിന്റെ സഹായത്താല്‍ നക്ഷത്രരാശികളെ തിരിച്ചറിയാവുന്നതാണ്.

ക്രാന്തിപഥം

ഖഗോളത്തിലൂടെ സൂര്യൻ സഞ്ചരിക്കുന്നതായി കാണപ്പെടുന്ന പാതയാണ് ക്രാന്തിപഥം (ecliptic). 18° വീതിയിൽ ക്രാന്തി പഥത്തിനിരുവശത്തുമായി ഭൂമിക്കു ചുറ്റുമുള്ള സാങ്കല്പിക വൃത്തമാണ് രാശിചക്രം (Zodiac). രാശിചക്രത്തിലെ നക്ഷങ്ങളെ 12 നക്ഷത്രഗണങ്ങളാക്കി വിഭജിച്ചിട്ടുണ്ട്. ഇവയാണ് ചിങ്ങം മുതല്‍ കര്‍ക്കിടകം വരെയുള്ള സൗരരാശികള്‍. ഇവയില്‍ നാലു രാശികളെയെങ്കിലും രാത്രിയില്‍ ഒരേ സമയത്ത് നിരീക്ഷിക്കാനാകും.

സൗരരാശികൾ

കുംഭം (Aquarius).

കുടമേന്തിയ ആളിന്റെ ആകൃതി സങ്കല്പിച്ചിട്ടുള്ള നക്ഷത്രരാശിയാണ് കുംഭം (Aquarius). സാമാന്യം വലിപ്പമുള്ള രാശിയാണെങ്കിലും ശ്രദ്ധേയമായ നക്ഷത്രങ്ങള്‍ ഒന്നും തന്നെ ഇല്ലാത്തതാണ് കുംഭം രാശി. സന്ധ്യയ്ക്ക് നോക്കുമ്പോൾ തെക്കുപടിഞ്ഞാറെ ചക്രവാളത്തിൽനിന്നും ആരംഭിച്ച് ഏകദേശം 30° വരെ മുകളിലായി കുംഭംരാശിയെ കാണാം.

മീനം (Pisces)

പടിഞ്ഞാറ് ചക്രവാളത്തിൽ നിന്നും ഏകദേശം 40° മുകളിലായി ആരംഭിച്ച് ഏകദേശം ശീ‍ർഷബിന്ദു വരെ മീനം രാശി (Pisces) വ്യാപിച്ചു കിടക്കുന്നതായി കാണാം. ഈ രാശിയിൽ പ്രഭയേറിയ നക്ഷത്രങ്ങളൊന്നുമില്ല. ഈ രാശിക്ക് മീനുകളുടെ ആകൃതി സങ്കല്പിച്ചിരിക്കുന്നു.

മേടം (Aries)

ശീർഷബിന്ദുവിൽ നിന്നും ഏകദേശം 15° വടക്കുപടിഞ്ഞാറു മാറി മേടം രാശിയെ (Aries) നിരീക്ഷിക്കാം. നീണ്ടുമെലിഞ്ഞ ഒരു ത്രികോണം പോലെയുള്ള ഈ നക്ഷത്രഗണത്തിന് ആടിന്റെ ആകൃതി സങ്കല്പിച്ചിരിക്കുന്നു. മേടം രാശിയിലെ പ്രധാന നക്ഷത്രം ഹമാൽ (Hamal) ആണ്. തിളക്കം കുറഞ്ഞ മറ്റുരണ്ടു നക്ഷത്രങ്ങളെയും കാണാം. ഈ മൂന്ന് നക്ഷത്രങ്ങളും ചേര്‍ന്നതാണ് അശ്വതി എന്ന ചാന്ദ്രഗണം.

ഇടവം (Taurus)

ജനുവരിയിൽ സന്ധ്യയ്ക്ക് ശീർഷബിന്ദുവിൽ നിന്നും ഏകദേശം 20° മുതൽ 40° വരെ വടക്കുകിഴക്കുമാറി ഇടവം (Taurus) രാശി കാണപ്പെടും. ഇടവം രാശിയിലെ ഏറ്റവും തിളക്കമുള്ളതും ചുവപ്പ് നിറത്തിലുള്ളതുമായ നക്ഷത്രമാണ് ബ്രഹ്മർഷി (Aldebaran). ശീർഷബിന്ദുവിൽ നിന്നും ഏകദേശം 25° കിഴക്ക്-വടക്കുകിഴക്ക് ദിശയിലായാണ് ബ്രഹ്മർഷി കാണപ്പെടുന്നത്. ബ്രഹ്മർഷി ഉൾപ്പെടുന്നതും Λ എന്ന ആകൃതിയില്‍ കാണുന്നതുമായ നക്ഷത്രങ്ങളുടെ കൂട്ടമാണ് രോഹിണി എന്ന ചാന്ദ്രഗണം. രോഹിണിയും അതിനു താഴെ (കിഴക്കു ദിശയിൽ അല്പം വടക്കുമാറി) കാണുന്ന തിളക്കമുള്ള രണ്ട് നക്ഷത്രങ്ങളും ചേര്‍ന്നതാണ് ഇടവം രാശി.

മിഥുനം (Gemini)

കിഴക്ക്-വടക്കുകിഴക്കെ ചക്രവാളത്തിൽനിന്നും ഏകദേശം 20° മുതൽ 40° മുകളിലായി മിഥുനം രാശിയെ കാണാം. വേട്ടക്കാരൻ (Orion) നക്ഷത്രരാശിയുടെ വടക്കുകിഴക്കായണ് മിഥുനത്തിന്റെ സ്ഥാനം. കാസ്റ്റർ, പോളക്സ് എന്നിവയാണ് പ്രധാന നക്ഷത്രങ്ങൾ. ഇരട്ടകളുടെയോ യുവ മിഥുനങ്ങളുടെയോ ആകൃതി സങ്കല്പിച്ചിരിക്കുന്നു.

കര്‍ക്കിടകം (Cancer)

കിഴക്ക്-വടക്കുകിഴക്കെ ചക്രവാളത്തോടു ചേര്‍ന്ന് 10° വരെ മുകളിലായാണ് ഈ മാസം കര്‍ക്കിടകം (Cancer) രാശിയുടെ സ്ഥാനം. പൂര്‍ണ്ണമായും ഉദിച്ചുയരാൻ എട്ടുമണിയാകും. തെളിഞ്ഞ നക്ഷത്രങ്ങളൊന്നും തന്നെ ഈ രാശിയിലില്ല. മിഥുനത്തിനു നേരെ താഴെയായാണ് സ്ഥാനം. ഞണ്ടിന്റെ ആകൃതി സങ്കല്പിച്ചിരിക്കുന്ന നക്ഷത്രരാശിയാണിത്.

ഒരു സ്ഥലത്തിന് നേർമുകളിലായി (ഭൂഗുരുത്വബലത്തിന് വിപരീതമായ ദിശ) ഖഗോളത്തിൽ വരുന്ന സാങ്കൽപ്പിക ബിന്ദുവാണ് ശീർഷബിന്ദു അഥവാ ഉച്ചബിന്ദു (zenith). ശീർഷബിന്ദുവിന് വിപരീത ദിശയിലുള്ള ബിന്ദുവിനെ നീചബിന്ദു (Nadir) എന്നു വിളിക്കുന്നു.

മറ്റു പ്രധാന നക്ഷത്രരാശികൾ

ശബരൻ എന്ന വേട്ടക്കാരന്‍ (Orion the hunter)

സൗരരാശികള്‍ കഴിഞ്ഞാല്‍ ജനുവരിയിൽ സന്ധ്യാകാശത്ത് നിരീക്ഷിക്കാന്‍ കഴിയുന്ന പ്രധാനപ്പെട്ട നക്ഷത്ര സമൂഹമാണ് വേട്ടക്കാരന്‍ (Orion). സന്ധ്യയ്ക്ക് ഇതിനെ കിഴക്കെ ആകാശത്തിന്റെ മദ്ധ്യഭാഗത്തായി കാണാം. ഖഗോള മദ്ധ്യ രേഖയില്‍ സ്ഥിതി ചെയ്യുന്ന ഈ രാശിയെ ബാബിലോണിയൻ–ഗ്രീക്ക് ജനത ഒരു വേട്ടക്കാരനായി (Orion the Hunter). സങ്കല്പിച്ചിരിക്കുന്നു. മകീര്യം എന്ന ചാന്ദ്രഗണമാണ് വേട്ടക്കാരന്റെ തലഭാഗത്തുള്ളത്. കിഴക്കെ തോളിലെ ചുവന്ന നക്ഷത്രം തിരുവാതിരയും (Betelgeuse) പടിഞ്ഞാറേ തോളിലേത് ബെല്ലാട്രിക്സ് (Bellatrix) നക്ഷത്രവുമാണ്. തെക്കായുള്ള രണ്ട് കാൽമുട്ടുകലിൽ പടിഞ്ഞാറായുള്ളത് റീഗൽ (Rigel) നക്ഷത്രമാണ്. സൂര്യന്റെ അമ്പതിനായിരം ഇരട്ടിയോളം പ്രകാശം പൊഴിക്കുന്ന ഈ നക്ഷത്രം 830 പ്രകാശവർഷം അകലെയാണ്. വലത് കാൽമുട്ടിലുള്ളത് സെയ്ഫ് (Saiph) നക്ഷത്രം. വേട്ടക്കാരന്റെ മധ്യഭാഗത്തായി ഒരേ ശോഭയുള്ള മൂന്നു നക്ഷത്രങ്ങൾ ഒറ്റവരിയായി നിൽക്കുന്നത് വേട്ടക്കാരന്റെ അരയിലെ ബെൽറ്റായി സങ്കല്പിച്ചിരിക്കുന്നു. മിന്തക (Mintaka), അൽനിനം (Alninam), അൽനിതാക് (alninak) എന്നിവയാണ് അരപ്പട്ടയിലെ നക്ഷത്രങ്ങൾ. ബെൽറ്റിലെ മധ്യതാരത്തിൽ നിന്ന് തെക്കോട്ട് ഏതാനും മങ്ങിയ നക്ഷത്രങ്ങൾ വരിയായി നിൽക്കുന്നത് ബെൽറ്റിൽ നിന്നു തൂക്കിയിട്ട വാളായി സങ്കല്പിച്ചിരിക്കുന്നു. പുതുനക്ഷത്രങ്ങള്‍ പിറവിയെടുക്കുന്ന ഒരു നെബുല വാളിന്റെ ഭാഗത്തുണ്ട്.

വേട്ടക്കാരൻ- ഒരു വഴികാട്ടി

വേട്ടക്കാരന്റെ വാളും ബെൽറ്റിലെ മധ്യ നക്ഷത്രവും തലയും ചേർത്ത് ഒരു രേഖ സങ്കല്പിച്ചാൽ തെക്കുവടക്കു ദിശ കിട്ടും. മറ്റു നക്ഷത്രഗണങ്ങളെ കണ്ടെത്താനുള്ള ഒരു വഴികാട്ടിയായും വേട്ടക്കാരനെ ഉപയോഗപ്പെടുത്താം. വേട്ടക്കാരന്റെ ബൽറ്റിലെ നക്ഷത്രങ്ങളുടെ നിരയിൽ കൂടി ഒരു രേഖ സങ്കല്പിച്ച് വടക്കുപടിഞ്ഞാറ് ദിശയിലേക്ക് നീട്ടിയാൽ അത് രോഹിണിയിലെ ചുവന്ന നക്ഷത്രത്തിലെത്തും. ഇതേ രേഖ തെക്കുകിഴക്ക് ദിശയിൽ നീട്ടിയാൽ സിറിയസ് എന്ന നക്ഷത്രത്തിലെത്തും.

വേട്ടക്കാരന്റെ ബെല്‍റ്റ്, രോഹിണി എന്നിവ യോജിപ്പിച്ച് സങ്കല്‍പ്പിക്കുന്ന രേഖ വടക്ക് പടിഞ്ഞാറ് ദിശയില്‍ നീട്ടിയാല്‍ മുന്തിരിക്കുലപോലെയുള്ള നക്ഷത്രങ്ങളുടെ ഒരുകൂട്ടം കാണാം. ഈ നക്ഷത്രക്കൂട്ടമാണ് കാര്‍ത്തിക (Pleiades). ഏഴോ എട്ടോ നക്ഷത്രങ്ങളെ ഇതില്‍ കാണാന്‍ കഴിഞ്ഞേക്കും. ജനുവരിമാസം ശീർഷബിന്ദുവിൽ നിന്നും ഏകദേശം 20° വടക്കുകിഴക്കായാണ് കാർത്തികയുടെ സ്ഥാനം.

ബൃഹച്ഛ്വാനം

വേട്ടക്കാരന് തെക്കുകിഴക്കായി കാണുന്ന നക്ഷത്രരാശിാണ് ബൃഹച്ഛ്വാനം (Canis Major). സൂര്യന്‍ കഴിഞ്ഞാല്‍ ഏറ്റവും പ്രഭയോടെ കാണപ്പെടുന്ന നക്ഷത്രമായ സിറിയസ് ഉള്‍പ്പെടുന്ന നക്ഷത്രസമൂഹമാണിത്. ജനുവരിമാസം കിഴക്ക്-തെക്കുകിഴക്കെ ചക്രവാളത്തിൽ നിന്നും ഏകദേശം 25° മുകളിലായിരിക്കും സിറിയസ്സിന്റെ സ്ഥാനം. രോഹിണിയിലെ ചുവന്ന നക്ഷത്രം, വേട്ടക്കാരന്റെ ബെല്‍റ്റ് ഇവ ചേര്‍ത്ത് ഒരു രേഖ സങ്കല്പിച്ച് തെക്ക് കിഴക്ക് ഭാഗത്തേക്ക് നീട്ടിയാല്‍ സിറിയസിനെ കണ്ടെത്താം. രാത്രി ആകാശത്ത് കാണാൻ കഴിയുന്ന ഏറ്റവും തിളക്കമുള്ള നക്ഷത്രമാണ് സിറിയസ്. മകരജ്യോതിയായി തെറ്റിദ്ധരിക്കപ്പെടുന്നത് സിറിയസ്സിനെയാണ്.

ഭാദ്രപദം (Pegasus)

സൗരരാശികള്‍ കഴിഞ്ഞാല്‍ ജനുവരിയിൽ സന്ധ്യാകാശത്തുകാണാൻ കഴിയുന്ന പ്രധാനപ്പെട്ട നക്ഷത്രഗണമാണ് ഭാദ്രപദം (Pegasus). പറക്കുംകുതിര എന്നും ഇത് അറിയപ്പെടുന്നു. സന്ധ്യയ്ക്ക് പടിഞ്ഞാറെ ആകാശത്തിനു മദ്ധ്യത്തിലായാണ് (അല്പം വടക്കുമാറി) ഇതിന്റെ സ്ഥാനം. ഇതിലെ നാല് പ്രധാന നക്ഷത്രങ്ങള്‍ ചേര്‍ന്ന് ആകാശത്ത് വലിയ ഒരു ചതുരം തീര്‍ക്കുന്നു. ഇതില്‍ പടിഞ്ഞാറുള്ള രണ്ട് നക്ഷത്രങ്ങള്‍ പൂരുരുട്ടാതിയും, കിഴക്കുള്ള രണ്ടെണ്ണം ഉത്രട്ടാതിയുമാണ്. ചക്രവാളത്തിൽ നിന്നും ഏകദേശം 35° മുകളിലായി പൂരുരുട്ടാതിയെയും 50°മുകളിലായി ഉത്രട്ടാതിയെയും കാണാം. ഉത്രട്ടാതിയിലെ അല്‍ഫെരാട്സ് (Alpheratz) എന്ന നക്ഷത്രം യഥാര്‍ത്ഥത്തില്‍ ആന്‍ഡ്രോമിഡ രാശിയുടെ ഭാഗമാണ്. ഭാദ്രപഥത്തിനും താഴെയായാണ് ആന്‍ഡ്രോമിഡയുടെ സ്ഥാനം. ഈ ഭാഗത്ത് M31 എന്ന ഗാലക്സിയെ (ആന്‍ഡ്രോമിഡ ഗാലക്സി) ടെലിസ്കോപ്പിന്റെ സഹായത്തോടെ നിരീക്ഷിക്കാന്‍ സാധിക്കും.

കാശ്യപി

വടക്കേ ആകാശത്ത് ഏകദേശം മധ്യത്തിലായി M എന്ന അക്ഷരത്തിന്റെ ആകൃതിയില്‍ കാണപ്പെടുന്ന നക്ഷത്രസമൂഹമാണ് കാശ്യപി (Cassiopeia). സന്ധ്യയോടെ ഇത് വടക്കെ ചക്രവാളത്തിനിന്നും 30°മുതൽ 40°വരെ മുകളിലായി കാണപ്പെടുന്നു. കാശ്യപിക്കു വടക്കായി കൈകവസ് (Cepheus) നക്ഷത്രരാശിയെയും കാണാവുന്നതാണ്.

മറ്റുള്ളവ

വടക്കു കിഴക്ക് ദിശയിൽ ചക്രവാളത്തിനും ശീർഷബിന്ദുവിനും മധ്യത്തിലായി ഏകദേശം ഷഡ്ഭുജാകൃതിയില്‍ കാണുന്ന നക്ഷത്ര സമൂഹമാണ് പ്രാജിത (Auriga). ഇതിലെ പ്രഭയേറിയ നക്ഷത്രമാണ് കാപ്പെല്ല (Capella). തിളക്കത്തിൽ ആറാം സ്ഥാനമുള്ള നക്ഷത്രമാണിത്.
തെക്കെചക്രവാളത്തിൽ നിന്നും ഏകദേശം 20° മുകളിലായി കാണുന്ന പ്രഭയേറിയ നക്ഷത്രമാണ് അകെർനർ (Achernar). യമുന (Eridanus) എന്ന നക്ഷത്രഗണത്തിന്റെ ഭാഗമാണിത്. തിളക്കത്തിൽ ഒമ്പതാം സ്ഥാനമുള്ള നക്ഷത്രമാണിത്.
തെക്ക്-തെക്കുകിഴക്കെ ചക്രവാളത്തിൽനിന്നും ഏകദേശം 15° മുകളിലായി കാണുന്ന പ്രഭയുള്ള നക്ഷത്രം അഗസ്ത്യൻ (Canopus) ആണ്. ഓരായം (Carina) എന്ന നക്ഷത്രഗണത്തിലെ അംഗമാണ് അഗസ്ത്യൻ. രാത്രി ആകാശത്തു കാണാൻ കഴിയുന്നവയിൽ പ്രഭയുടെ കാര്യത്തിൽ രണ്ടാം സ്ഥാനത്തുള്ള നക്ഷത്രമാണ് അഗസ്ത്യൻ.
കാശ്യപിക്കു പടിഞ്ഞാറായി കൈകവസ് (Cepheus) നക്ഷത്രഗണം, വടക്കുകിഴക്കായി വരാസവസ് (Perseus) നക്ഷത്രഗണം എന്നിവയും കാണാവുന്നതാണ്.

ഗ്രഹങ്ങൾ

ആകാശത്ത് നഗ്നനേത്രങ്ങളാൽ കാണാൻ കഴിയുന്ന അഞ്ചുഗ്രഹങ്ങളാണു ബുധൻ, ശുക്രൻ, ചൊവ്വ, വ്യാഴം, ശനി എന്നിവ. ഈ അഞ്ചുഗ്രഹങ്ങളെയും ഒന്നിച്ചു നിരീക്ഷിക്കാൻ സാധിക്കുന്നത് അപൂര്‍വ്വമായ അവസരങ്ങളിൽമാത്രമാണ്. അത്തരം ഒരവസരമാണ് ഈ വർഷം ജനുവരിയിൽ സംജാതമായിരിക്കുന്നത്.

ബുധൻ

മാസാദ്യം വൃശ്ചികം രാശിയിലാണ് ബുധൻ (Mercury) കാണപ്പെടുന്നത്. ആ സമയം പുലർച്ചെ 6:45-ഓടെ നോക്കിയാൽ കിഴക്ക്-തെക്കുകിഴക്കെ ചക്രവാളത്തിനു തൊട്ടു മുകളിലായി ബുധനെ കാണാം. രണ്ടാം ആഴ്ചയോടെ ബുധൻ ധനു രാശിയിലേക്ക് പ്രവേശിക്കും. തുടർന്നുള്ള ദിവസങ്ങളിൽ സൂര്യസാമീപ്യം മൂലം കാണാനാകാതെയാകും.

ശുക്രൻ

വളരെ വേഗം തിരിച്ചറിയാന്‍ കഴിയുന്ന ഖഗോള വസ്തുവാണ് ശുക്രന്‍ (Venus). മലയാളികള്‍ വെള്ളിനക്ഷത്രം എന്ന് വിളിച്ചത് ഈ ഗ്രഹത്തെയാണ്.

സൂര്യാസ്തമനത്തിനു മുമ്പായിത്തന്നെ ശുക്രനെ പടിഞ്ഞാറെ ചക്രവാളത്തിൽ പ്രഭയോടെ കാണാനാകും. പടിഞ്ഞാറെ ആകാശത്ത് ഏറ്റവും തിളക്കത്തിൽ കാണുന്ന നക്ഷത്രസമാനമായ വസ്തു ശുക്രനാണ്. മാസാദ്യം കുംഭം രാശിയിലായിരിക്കുന്ന ശുക്രൻ അവസാന ആഴ്ചയിൽ മീനം രാശിയിലേക്ക് കടക്കും.

ചൊവ്വ

മാസാദ്യത്തിൽ വൈകിട്ട് എട്ടുമണിയോടെ കിഴക്ക്-വടക്കുകിഴക്കെ ചക്രവാളത്തിനു തൊട്ടുമുകളിലായി ഇളം ചുവപ്പ് നിറത്തിൽ ചൊവ്വ (Mars) ഉദിച്ചുയരും. മാസാദ്യം കർക്കിടകം രാശിയിലും മാസം പകുതിക്ക് ശേഷം മിഥുനം രാശിയിലുമായാണ് സ്ഥാനം. മാസം പകുതിയാകുമ്പോഴേക്കും വൈകിട്ട് 7 മണിക്കുതന്നെ ഉദിച്ചുയരും. സന്ധ്യക്ക് കിഴക്ക്-വടക്കുകിഴക്കെ ചക്രവാളത്തിനു തൊട്ടുമുകളിലായി നക്ഷത്രസമാനമായി തോന്നുന്നതും ഇളം ചുവപ്പ് നിറത്തിൽ ഏറ്റവും ശോഭയോടെ കാണുന്നതുമായ വസ്തുവാണ് ചൊവ്വ. അതിനാൽ പ്രയാസം കൂടാതെ ചൊവ്വയെ തിരിച്ചറിയാനാകും.

വ്യാഴം

ശീർഷബിന്ദുവിൽ നിന്നും ഏകദേശം 30° കിഴക്ക്-വടക്കുകിഴക്കായി സന്ധ്യക്ക് കാണുന്ന തിളക്കമേറിയ, നക്ഷത്രസമാനമായ വസ്തുവാണ് വ്യാഴം (Jupiter). ഇടവം രാശിലാണ് ഇപ്പോൾ വ്യാഴത്തിന്റെ സ്ഥാനം. ഏതാണ്ട് തലക്കുമുകളിൽ പ്രഭതൂകി നില്ക്കുന്ന വ്യാഴത്തെ എളുപ്പത്തിൽ തിരിച്ചറിയാനാകും.

12 വർഷം കൊണ്ടാണ് വ്യാഴം ക്രാന്തിപഥത്തലൂടെ ഒരു പരിക്രമണം പൂർത്തിയാക്കുന്നത്. അതിനാൽ ഓരോ വർഷവും ഓരോ രാശിയിയിലായാണ് വ്യാഴത്തെ കാണാൻ കഴിയുക. അടുത്ത വർഷം മിഥുനം രാശിയിലായിരിക്കും വ്യാഴം ഉണ്ടാവുക.

ശനി

മാസാദ്യം സന്ധ്യയ്ക്ക് പടിഞ്ഞാറ്-തെക്കുപടിഞ്ഞാറെ ചക്രവാശത്തിൽ നിന്നും ഏകദേശം 45° മുകളിൽ കുംഭം രാശിയിൽ ശനിയെ (Saturn) കാണാം. തുടർന്നുള്ള ദിവസങ്ങളിൽ സന്ധ്യക്ക് ശനി ചക്രവാളത്തോട് അടുത്തായി കാണപ്പെടും. മാസാവസാനം അത് 20° മുകളിലായിരിക്കും. പടിഞ്ഞാറ് ചക്രവാളത്തിൽ കാണപ്പെടുന്ന നക്ഷത്രസമാനായ വസ്തുക്കളിൽ ശുക്രൻ കഴിഞ്ഞാൽ തിളക്കത്തോടെ കാണപ്പെടുന്ന ശനിയെ തിരിച്ചറിയാൻ പ്രയാസമുണ്ടാകില്ല. ശനിയുടെ പരിക്രമണകാലം 29.46 വര്‍ഷമാണ്. ജനുവരി 18-ന് ശനിയെ ശുക്രന് അടുത്തായി കാണാനാകും.

ചന്ദ്രൻ

ജനുവരി 1 അമാവസി കഴിഞ്ഞ് രണ്ടാം ദിവസമാണ്. അന്ന സന്ധ്യക്ക് പടിഞ്ഞാറെ ചക്രവാളത്തിനു മുകളിൽ നേരിയ കലയായി ചന്ദ്രനെ കാണാം. തുടർന്നുള്ള സന്ധ്യകളിൽ ചക്രവാളത്തിൽ നിന്നുള്ള അതിന്റെ ഉയരം കൂടിവരികയും മുഖം വലുതായി വരികയും ചെയ്യും. ജനുവരി 7-ന് സന്ധ്യക്ക് ചന്ദ്രനെ തലക്കുമുകളിലായി കാണാം. അന്നത് അർദ്ധചന്ദ്രരൂപത്തിലായിരിക്കും. ചന്ദ്രന്റെ ഈ മുഖത്തിന് ഒന്നാപാദം എന്നു വിളിക്കുന്നു. ജനുവരി 14-ന് ആണ് പൗർണ്ണമി. അന്ന് സന്ധ്യക്ക് സൂര്യൻ അസ്തമിക്കുമ്പോൾ കിഴക്ക്-വടക്കുകിഴക്കെ ചക്രവാളത്തിൽ ചന്ദ്രൻ ഉദിച്ചുയരും. തുടർന്നുള്ള ദിവസങ്ങളിൽ ചന്ദ്രമുഖം ശോഷിച്ചുകാണുകയും ഉദയം വൈകിവരികയും ചെയ്യും. ജനുവരി 22-ന് അത് ഉദിക്കുന്നത് അർദ്ധരാത്രി ആയിരിക്കുകയും അതിന്റെ മുഖം അർദ്ധവൃത്താകാരമായിരിക്കുകയും ചെയ്യും: അതാണ് ചന്ദ്രന്റെ അവസാന പാദം. ജനുവരി 29 ന് വീണ്ടും അമാവാസിയാകും.

അന്താരാഷ്ട്ര ബഹിരാകാശനിലയം

അന്താരാഷ്ട്ര ബഹിരാകാശനിലയത്തെ (International Space Station) നിരീക്ഷിക്കുന്നതിനുള്ള വിവരങ്ങൾക്കായി നാസയുടെ Spot the Station എന്ന വെബ്സൈറ്റ് സന്ദര്‍ശിക്കുക.
ഇതും വായിക്കുക – അന്താരാഷ്ട്ര ബഹിരാകാശനിലയത്തില്‍നിന്ന് ഭൂമിയെ തത്സമയം കാണാം

അന്താരാഷ്ട ജ്യോതിശാസ്ത്ര യൂണിയൻ അംഗീകരിച്ച 88 നക്ഷത്രഗണങ്ങളുടെ പട്ടിക കാണാൻ ഇവിടെ ക്ലിക് ചെയ്യുക.

കുറിപ്പ്

ചിത്രങ്ങള്‍ തോതനുസരിച്ചുള്ളവയല്ല.
2024 ജനുവരി 15നു മദ്ധ്യകേരളത്തിൽ സന്ധ്യയ്ക്ക് 7.30 നുള്ള സമയം കണക്കാക്കിയാണ് വിവരണം തയ്യാറാക്കിയിട്ടുള്ളത് (പ്രത്യേകം പരാമർശിച്ചിട്ടുള്ളവ ഒഴികെ).