Read Time:9 Minute

ഡോ. ജയന്തി എസ്

അധ്യാപിക, സ്കൂള്‍ ഓഫ് എഞ്ചിനീയറിംഗ്, കുസാറ്റ്

ലൂക്ക എഡിറ്റോറിയല്‍ ബോര്‍ഡ് അംഗം

കഴിഞ്ഞ കുറച്ചു നാളുകളായി സോഷ്യൽ മീഡിയയൊന്നാകെ മഞ്ഞ മാജിക്‌ വെളിച്ചത്തിനു പിന്നാലെയാണ്. ഇരുട്ടുമുറിയിലോ മങ്ങിയ പ്രകാശമുള്ളിടത്തോ മൊബൈൽ ഫ്ലാഷ് ലൈറ്റ് ഓൺ ചെയ്‌ത് വയ്ക്കുന്നു. അതിനു മുകളിലായി സുതാര്യമായ പാത്രത്തിൽ വെള്ളം നിറച്ചു വയ്ക്കുന്നു. ഫ്ലാഷ് ലൈറ്റിലെ പ്രകാശം ആ പാത്രത്തിലുടനീളം പടരുന്നത് പോലെ കാണാം. ഇനിയാണ് മാജിക്കിന്റെ പ്രധാന സ്റ്റെപ്പ്. ഇതിലേക്ക് മഞ്ഞൾപ്പൊടി വിതറുന്നു. മഞ്ഞൾ ചെറുതരികളായി വെള്ളത്തിലൂടെ ഊർന്നിറങ്ങി പാത്രത്തിനുള്ളിൽ സ്വർണ്ണമഴ പെയ്യുന്നത് കാണാനാവും. ഈ മാജിക്‌ ആക്ടിവിറ്റി മഞ്ഞളുപയോഗിച്ച് മാത്രമല്ല വിറ്റാമിൻ ബി2 ഗുളിക പൊടിച്ചതുപയോഗിച്ചും ചെയ്യാനാവും.

ട്രൻഡ് ആയ മഞ്ഞൾ മാജിക്

ഗ്ലോ മാജിക്കിന് പിന്നിലെ ശാസ്ത്രം

മഞ്ഞൾപൊടി മഞ്ഞച്ചിരിക്കാൻ കാരണം അതിലെ കുർക്കുമിൻ എന്ന പിഗ്മെൻ്റാണ്. ഇതൊരു പോളിഫിനോള്‍ സംയുക്തമാണ്. കുർക്കുമിൻ പിഗ്മെന്റിന് ഫ്ലൂറസൻസ് (Flouroscence) എന്ന സവിശേഷ സ്വഭാവമുള്ളതാണ് മാജിക്കിലെ മഞ്ഞത്തിളക്കത്തിന് കാരണം.

എന്താണ് ഈ ഫ്ലൂറസൻസ് ??

വസ്തുക്കളിൽ പ്രകാശം പതിക്കുമ്പോൾ അവയിലെ ഇലക്ട്രോണുകൾക്ക് താഴ്ന്ന ഊർജ്ജനിലയിൽ നിന്നും ഉയർന്ന ഊർജ്ജനിലയിലേക്ക് സ്ഥാനമാറ്റം സംഭവിക്കുന്നു. ഉയർന്ന ഊർജ്ജനില അസ്ഥിരമായതിനാൽ താഴ്ന്ന ഊർജ്ജനിലയിലേക്കുതന്നെ ഇലക്ട്രോണുകൾ തിരികെ എത്തുന്നു. ഇതിൻ്റെ ഫലമായി കുറച്ച് പ്രകാശവും പുറന്തള്ളപ്പെടുന്നു. ഈ പ്രകാശത്തിന്റെ തരംഗദൈർഘ്യം ആഗിരണം ചെയ്ത പ്രകാശത്തേക്കാൾ കൂടുതലായിരിക്കും. ഈ പുറംതള്ളുന്ന പ്രകാശം നമുക്ക് കാണാൻ പറ്റുമോ? പറ്റണമെങ്കിൽ പുറംതള്ളുന്ന പ്രകാശത്തിൻ്റെ തരംഗദൈർഘ്യം ദൃശ്യപ്രകാശത്തിൻ്റെ തരംഗദൈർഘ്യത്തിൻ്റെ റെയ്ഞ്ചിലായിരിക്കണം (400nm – 700nm). ഈ റെയിഞ്ചിൽ പ്രകാശം പുറംതള്ളപ്പെടുന്ന പ്രതിഭാസത്തിനെയാണ് നമ്മൾ ഫ്ലൂറസെൻസ് എന്ന് പറയുക. ചില വസ്തുക്കൾക്ക് മാത്രമാണ് ഇങ്ങനെ ദൃശ്യപ്രകാശത്തെ പുറന്തള്ളാൻ കഴിയുന്ന സവിശേഷതയുള്ളത്. ഇങ്ങനെയൊരു വൈഭവം നമ്മുടെ കുർക്കുമിനുമുണ്ട്. മഞ്ഞൾപൊടിയിലുള്ള കുറുക്കുമിന്റെ ഫ്ലൂറസൻസാണ് നാടാകെ ഹിറ്റായ മാജിക് പ്രകാശത്തിന് പിന്നിൽ. പിന്നെ, ഈ ഇലക്ട്രോണുകളുടെ സ്ഥാനചലനം എന്നൊക്കെ പറയുന്നത് വളരെ കുറഞ്ഞ സമയത്തിനുള്ളിൽ നടക്കുന്ന പ്രവർത്തനമാണ് കേട്ടോ ( 10^{– 9} മുതൽ 10^-7 സെക്കൻ്റ് വരെ). ഈ തിളക്കത്തിന് പിന്നിൽ ഒരു കുഞ്ഞുകാര്യം കൂടെയുണ്ട്.

പിന്നെയും ചിലതുണ്ട് പറയാൻ…

മഞ്ഞൾ തരികൾ വെള്ളത്തിൽ സ്വർണ്ണ മഴയായ് പെയ്ത് പ്രകാശം തരുന്നതായാണ് കാണാൻ സാധിക്കുന്നത്. അപ്പോൾ ഇത് വെള്ളത്തിൽ പൂർണ്ണമായും ലയിക്കില്ലേ? ഇല്ല …’ ഭാഗികമായി മാത്രമേ മഞ്ഞൾ വെള്ളത്തിൽ ലയിക്കൂ. അതുകൊണ്ടുതന്നെ പരീക്ഷണത്തിൽ നാം കാണുന്നത് മഞ്ഞൾ ലായനി അല്ല മറിച്ച് മഞ്ഞൾപൊടിയുടെ വെള്ളത്തിലുള്ള സസ്പെൻഷൻ ആണ്. അതിനാലാണ് മഞ്ഞൾ തരികളുടെ ഒരുതരം മാജിക് തിളക്കം നമുക്ക് കാണാൻ സാധിക്കുന്നത്. ഇതിൻ്റെ പിന്നിൽ ചെറിയൊരു കാര്യം കൂടെയുണ്ടേ. മഞ്ഞൾപൊടിയുടെ ചെറുതരികൾ പ്രകാശത്തെ ചിതറിക്കുകയും പല ദിശകളിലേക്ക് പായിക്കുകയും ചെയ്യും. ഇതു മഞ്ഞൾപൊടി വെള്ളത്തിന് കൂടുതൽ തെളിച്ചം നൽകും. പ്രകാശത്തിൻ്റെ ഈ തട്ടി തെറിക്കലിനെയാണ് ടിൻഡൽ ഇഫക്ട് (Tyndall effect) എന്ന് പറയുന്നത്. വെള്ളത്തിൽ മഞ്ഞൾപൊടിയുടെ തരികളുടെ വലുപ്പം ദൃശ്യപ്രകാശത്തിൻ്റെ തരംഗ ദൈർഘ്യത്തോട് അടുത്തോ അതിനേക്കാൾ അൽപ്പം കൂടുതലോ ആണെങ്കിലെ ടിൻഡൽ ഇഫക്ട് ദൃശ്യമാവൂ.

സസ്പെൻഷൻ : എത്ര ശ്രമിച്ചാലും ചെളി വെള്ളത്തിൽ ലയിക്കുകയില്ലല്ലോ. കുറേ നേരം അനക്കാതെ വച്ചാൽ വെള്ളം മേലെയും ചെളി താഴെയുമായി വേർതിരിയുകയും ചെയ്യും. പരസ്പരം അലിഞ്ഞു ചേരാത്ത, ചെളിവെള്ളം പോലുള്ള കൂടിക്കുഴയലുകളെയാണ് സസ്പെൻഷൻ എന്നു പറയുന്നത്..

വിറ്റാമിൻ ബി2 ഗുളിക പൊടിച്ചും സ്വർണ്ണതിളക്കം സാധ്യമോ???

മഞ്ഞൾപൊടി ഉപയോഗിച്ചപ്പോൾ കിട്ടിയ സ്വർണ്ണമഴ മാജിക് നമുക്ക് വിറ്റാമിൻ ബി 2 ഗുളിക പൊടിച്ച് വെള്ളത്തിൽ വിതറിയാലും കിട്ടും. ഇവിടെ താരം കുർക്കുമിനല്ല, പകരം റൈബോഫ്ലേവിൻ ആണ്. വിറ്റാമിൻ ബി2 ഘടനാപരമായ റൈബോഫ്ലേവിൻ എന്ന രാസവസ്തുവാണ്.

ഭാഗികമായി മാത്രം ജലത്തിൽ ലയിക്കുന്ന റൈബോഫ്ലേവിൻ ഫ്ലൂറസൻസാണ് ഇവിടെ മാജിക്കിന് പിന്നിൽ. ആദ്യം വിദേശരാജ്യങ്ങളിൽ വൈറലായ മാജിക്ക് ചേരുവ വിറ്റാമിൻ ബി 2 ഗുളിക പൊടിച്ചതായിരുന്നു. ഇന്ത്യയിലാണ് മഞ്ഞൾ മാജിക്കിനു പ്രചാരം കൂടിയത്.