Read Time:12 Minute
ഡോ.സുരേഷ് വി
ഗവ. വിക്ടോറിയ കോളേജ് പാലക്കാട്
പ്രിയപ്പെട്ട ആളെ മിസ് ചെയ്യുമ്പോൾ അവരുടെ വസ്ത്രം എടുത്ത് മുഖം പൂഴ്ത്തിയിട്ടുണ്ടോ?
ആദ്യമായി അടുത്ത് നിൽക്കുമ്പോൾ തന്നെ ചിലരുമായി നമ്മൾക്ക് അറിയാതെ ഒരു ആകർഷണം തോന്നിയിട്ടില്ലേ? അടുത്തയിടെ അന്തരിച്ച ഒരു മിമിക്രി കലാകാരന്റെ ഭാര്യ അദ്ദേഹത്തിന്റെ ഗന്ധമുള്ള പെർഫ്യൂം ഉണ്ടാക്കി സ്വന്തമാക്കിയത് വാർത്തകളിൽ നിറഞ്ഞു നിന്നിരുന്നു.
ശരീര ഗന്ധം… അത് വെറുമൊരു ഓർമ്മപ്പെടുത്തൽ മാത്രമല്ല, അതിലൊരു ശാസ്ത്രമുണ്ട്. പ്രണയത്തിന് ഒരു ‘കെമിസ്ട്രി’ ഉണ്ടെന്ന് നമ്മൾ വെറുതെ പറയുന്നതല്ല, ആ കെമിസ്ട്രിയുടെ രഹസ്യകോഡ് ഒളിപ്പിച്ചുവെച്ചിരിക്കുന്നത് നമ്മുടെ വിയർപ്പിലാണ്!
വിയർപ്പൻ ടീ-ഷർട്ട് പരീക്ഷണം
ഈ ഗന്ധരഹസ്യത്തിന്റെ ചുരുളഴിക്കാൻ നമുക്ക് സ്വിറ്റ്സർലൻഡിലേക്ക് പോകണം. 1995-ൽ ക്ലോസ് വെഡേകിൻഡ് എന്നൊരു ശാസ്ത്രജ്ഞൻ ഒരു കിടിലൻ പരീക്ഷണം നടത്തി. അത് വിയർപ്പൻ ടീ-ഷർട്ട് പരീക്ഷണം (Sweaty T Shirt Experiment) എന്നറിയപ്പെട്ടു!
സംഭവം സിമ്പിളാണ്. കുറച്ച് പുരുഷന്മാരോട് തുടർച്ചയായി രണ്ട് രാത്രി ഒരേ ടീ-ഷർട്ട് ഇട്ട് ഉറങ്ങാൻ ആവശ്യപ്പെട്ടു. പെർഫ്യൂം വേണ്ട, മസാലക്കറികൾ വേണ്ട, പുറത്തുനിന്നുള്ള ഒരു മണവും ആ ടീ-ഷർട്ടിൽ പതിയരുത്. രണ്ട് ദിവസത്തിന് ശേഷം ആ വിയർപ്പ് പടർന്ന ടീ-ഷർട്ടുകൾ അദ്ദേഹം ശേഖരിച്ചു.
എന്നിട്ട് ഒരു കൂട്ടം സ്ത്രീകളോട് ആ ടീ-ഷർട്ടുകൾ മണത്തുനോക്കി ഇഷ്ടപ്പെട്ട ഗന്ധം തിരഞ്ഞെടുക്കാൻ പറഞ്ഞു. ഫലം വന്നപ്പോൾ എല്ലാവരും അമ്പരന്നു! സ്ത്രീകൾക്ക് ഏറ്റവും ആകർഷകമായി തോന്നിയത്, തങ്ങളുമായി ജനിതകപരമായി ഏറ്റവും അകലം പാലിക്കുന്ന പുരുഷന്മാരുടെ ഗന്ധമായിരുന്നു.
അപ്പോൾ എന്താണ് ഇതിന്റെ ഗുട്ടൻസ്?.
ഈ ഗന്ധ വ്യത്യാസത്തിന്റെ അടിസ്ഥാനം മേജർ ഹിസ്റ്റോകോംപാറ്റിബിലിറ്റി കോംപ്ലക്സ് (MHC) എന്നറിയപ്പെടുന്ന ഒരു കൂട്ടം ജീനുകളാണ്. നമ്മുടെ രോഗപ്രതിരോധ സംവിധാനത്തിന്റെ കാവൽക്കാരാണ് ഈ ജീനുകൾ. മനുഷ്യരിൽ ഈ ജീനുകൾ HLA എന്നാണ് അറിയപ്പെടുന്നത്. പക്ഷേ ഇവ എങ്ങനെ ഗന്ധം നിയന്ത്രിക്കുന്നു എന്ന കാര്യത്തിൽ വ്യക്തത വന്നിട്ടില്ല.
പഠനത്തിൽ MHC ഘടനയിലുള്ള വ്യത്യാസം ആണ് നോക്കിയത്. സ്ത്രീകൾക്ക് ആകർഷകമായി തോന്നിയത്, തങ്ങളുമായി MHC വ്യത്യാസം നല്ല പോലെ ഉള്ള പുരുഷന്മാരുടെ ഗന്ധമായിരുന്നു. വ്യത്യസ്ത MHC ഘടനയുള്ള മാതാപിതാക്കൾക്ക് ജനിക്കുന്ന കുഞ്ഞുങ്ങൾക്ക് കൂടുതൽ വൈവിധ്യമാർന്ന രോഗപ്രതിരോധ ശേഷിയുണ്ടാകും.
വെഡേകിൻഡിന്റെ ഈ കണ്ടെത്തൽ ശാസ്ത്രലോകത്ത് ഒരു പുതിയ വാതിൽ തുറന്നു. ലോകത്തിന്റെ പല ഭാഗത്തുള്ള ഗവേഷകർ ഈ ‘ഗന്ധസിദ്ധാന്തം’ വീണ്ടും വീണ്ടും പരീക്ഷിച്ചുനോക്കി.
ഓസ്ട്രിയൻ ഗവേഷകരായ റിക്ലോവ്സ്കിയും ഗ്രാമറും നടത്തിയ പഠനവും ഇതേ ഫലം തന്നെയാണ് ആവർത്തിച്ചത്; സ്ത്രീകൾ MHC-വ്യത്യസ്തരായ പുരുഷന്മാരുടെ ഗന്ധം ഇഷ്ടപ്പെടുന്നു. ജനിതകപരമായി വ്യത്യസ്തരായ അച്ഛനും അമ്മയ്ക്കും ജനിക്കുന്ന കുഞ്ഞിന് സ്വാഭാവികമായും കൂടുതൽ ശക്തമായ രോഗപ്രതിരോധ ശേഷിയുണ്ടാകും.
അപ്പോൾ നമ്മുടെ മൂക്ക് എന്താണ് യഥാർത്ഥത്തിൽ ചെയ്യുന്നത്?
അതായത്, നമ്മുടെ മൂക്ക് യഥാർത്ഥത്തിൽ ഭാവിതലമുറയുടെ ആരോഗ്യത്തിന് വേണ്ടിയുള്ള ഏറ്റവും മികച്ച പങ്കാളിയെ കണ്ടെത്താൻ ശ്രമിക്കുകയായിരുന്നു! ഭാവി തലമുറയുടെ ആരോഗ്യത്തിന് വേണ്ടി, ജനിതകമായി ഏറ്റവും മികച്ച പങ്കാളിയെ നമുക്ക് കാണിച്ചുതരികയാണ്. അപ്പോൾ ആളെ കണ്ടല്ല ഗന്ധം നോക്കി വേണം പങ്കാളിയെ തിരഞ്ഞെടുക്കാൻ എന്ന് ഈ വിയർപ്പൻ ശാസ്ത്രം പറയുന്നു.
ആധുനിക മനുഷ്യന്റെ കുടുംബം എന്നൊക്കെ ഉള്ള ആശയങ്ങൾ വരുന്നതിന് മുൻപ് ഗുഹാ മനുഷ്യർക്ക് ഏറ്റവും അനുയോജ്യ പങ്കാളിയെ തിരഞ്ഞെടുക്കാൻ ഉള്ള അവസരം പരിണാമം വഴി ലഭിച്ചത് ആവണം ഈ പ്രണയ ഗന്ധം.
കഥ ഇവിടെ തീരുന്നില്ല.
ഈ ഗന്ധത്തിന്റെ സ്വാധീനം കല്യാണം കഴിഞ്ഞാൽ തീരുമോ? അതോ ദാമ്പത്യത്തിലും ഇതിനൊരു റോളുണ്ടോ? ഈ ചോദ്യവുമായി ഒരു പറ്റം ഗവേഷകർ ദമ്പതികളെ സമീപിച്ചു. അവരുടെ കണ്ടെത്തലുകൾ കൂടുതൽ നാടകീയമായിരുന്നു.
തങ്ങളുടെ ഭർത്താക്കന്മാരുമായി MHC ജീനുകളിൽ സാമ്യമുള്ള സ്ത്രീകൾക്ക് മറ്റ് പുരുഷന്മാരോട് ആകർഷണം തോന്നാനുള്ള സാധ്യത കൂടുതലാണെന്നും ആ പഠനം കണ്ടെത്തി. ശരീരം, ഏറ്റവും മികച്ച ജനിതകമുള്ള കുഞ്ഞിനുവേണ്ടി ഒരു പങ്കാളിയെ കണ്ടെത്താൻ സ്ത്രീകളെ നിശബ്ദമായി പ്രേരിപ്പിച്ചുകൊണ്ടേയിരിക്കുന്നു!
അപ്പോൾ സൗന്ദര്യത്തിനൊന്നും ഒരു വിലയുമില്ലേ?
സത്യത്തിൽ, ഗന്ധവും സൗന്ദര്യവും തമ്മിൽ ഒരു മത്സരവുമില്ല. ഒരാളുടെ മുഖം നമുക്ക് അത്ര ആകർഷകമായി തോന്നിയില്ലെങ്കിലും, അയാളുടെ ശരീരഗന്ധം നമുക്ക് ആകർഷകമായി തോന്നാം. കാരണം, കാഴ്ച നൽകുന്ന വിവരങ്ങളല്ല, ഗന്ധം നൽകുന്നത്. അത് തലമുറകളുടെ ആരോഗ്യത്തിന്റെ രഹസ്യമാണ്.
കഥയിൽ ഒരു വില്ലനുമുണ്ട്. ഗർഭനിരോധന ഗുളികകൾ! ഈ ഗുളികകൾ കഴിക്കുമ്പോൾ, സ്ത്രീ ശരീരം ഗർഭിണിയാണെന്ന് ‘തെറ്റിദ്ധരിക്കും’. ആ സമയത്ത്, സഹായത്തിനും സുരക്ഷിതത്വത്തിനുമായി ശരീരം കൊതിക്കുന്നത് ജനിതകപരമായി അടുത്ത ബന്ധുക്കളുടെ സാമീപ്യമാണ്. അതിന്റെ ഫലമായി, ഗുളികകൾ കഴിക്കുന്ന സ്ത്രീകൾ തങ്ങളുമായി ജനിതക സാമ്യമുള്ള പുരുഷന്മാരുടെ ഗന്ധം ഇഷ്ടപ്പെട്ടു തുടങ്ങും. ശരീരം ഗർഭിണിയാണെന്ന് തെറ്റിദ്ധരിക്കുമ്പോൾ, സുരക്ഷിതത്വത്തിനായി ജനിതകബന്ധുക്കളുടെ സാമീപ്യം ആഗ്രഹിക്കുന്നു.
ഒരു സ്ത്രീ ഗർഭ നിരോധന ഗുളിക കഴിക്കുമ്പോൾ ജനിതക സാമ്യമുള്ള ഒരാളുമായി പ്രണയത്തിലാവാൻ സാധ്യത ഉണ്ട്, വിവാഹശേഷം കുഞ്ഞിനുവേണ്ടി ഗുളിക നിർത്തുമ്പോൾ അവരുടെ ഹോർമോണുകൾ സാധാരണ നിലയിലാകുന്നു (വിദേശ സംസ്കാരങ്ങളിൽ വിവാഹത്തിന് മുന്പേ ഉള്ള ബന്ധങ്ങൾ സാധാരണമാണല്ലോ). അതോടെ, അതുവരെ ഇഷ്ടമായിരുന്ന ഭർത്താവിന്റെ ഗന്ധം അവർക്ക് അസഹനീയമായി തോന്നാൻ തുടങ്ങാം! പ്രത്യേകിച്ചും അണ്ഡോത്പാദന സമയത്ത് (fertile window) ഈ അന്യപുരുഷ ആകർഷണം അതിന്റെ പാരമ്യത്തിലെത്തുമെന്നും അവർ നിരീക്ഷിച്ചു. അതായത്, ശരീരം ജനിതകമായി മികച്ച ഒരു ഇണയെ കണ്ടെത്താൻ സ്ത്രീകളെ പ്രേരിപ്പിച്ചുകൊണ്ടേയിരിക്കുന്നു! പല ദാമ്പത്യപ്രശ്നങ്ങളുടെയും തുടക്കം ഒരുപക്ഷേ ഇങ്ങനെയൊക്കെയാവാം.
അപ്പോൾ പ്രണയം വെറും ഗന്ധത്തിലാണോ? ഒരിക്കലുമല്ല. സ്നേഹവും പരസ്പര ബഹുമാനവും പങ്കുവെക്കലുമൊക്കെയാണ് ഏതൊരു ബന്ധത്തിന്റെയും അടിത്തറ. എങ്കിലും, ആരും കാണാതെ, നമ്മൾ പോലുമറിയാതെ, നമ്മുടെ മൂക്ക് നമുക്കായി നടത്തുന്ന ഈ നിശബ്ദമായ തിരഞ്ഞെടുപ്പുകൾ…
ആ ആദ്യത്തെ ‘കെമിസ്ട്രി’ക്ക് പിന്നിലെ ഈ ശാസ്ത്രം ശരിക്കും കൌതുകകരമാണ്.
അവലംബം
- Garver-Apgar, C. E., Gangestad, S. W., Thornhill, R., Miller, R. D., & Olp, J. J. (2006). Major histocompatibility complex alleles, sexual responsivity, and unfaithfulness in romantic couples. Psychological Science, 17(10), 830–835. >>>
- Rikowski, A., & Grammer, K. (1999). Human body odour, symmetry and attractiveness. Proceedings of the Royal Society of London. Series B: Biological Sciences, 266(1422), 869–874. >>>
- Roberts, S. C., Gosling, L. M., Carter, V., & Petrie, M. (2008). MHC-correlated odour preferences in humans and the use of oral contraceptives. Proceedings of the Royal Society B: Biological Sciences, 275(1652), 2715–2722. >>>
- Roberts, S. C., Little, A. C., Lyndon, A., Roberts, J., Havlicek, J., & Wright, R. L. (2011). Manipulation of body odour alters men’s self-confidence and judgments of their visual attractiveness by women. International Journal of Cosmetic Science, 33(5), 425-432. >>>
- Wedോekind, C., Seebeck, T., Bettens, F., & Paepke, A. J. (1995). MHC-dependent mate preferences in humans. Proceedings of the Royal Society of London. Series B: Biological Sciences, 260(1359), 245–249. >>>
അനുബന്ധവായനയ്ക്ക്
Happy
0 %
Sad
0 %
Excited
0 %
Sleepy
0 %
Angry
0 %
Surprise
100 %
0
0
