കാക്കപ്പൂ

Read Time:2 Minute

കാക്കപ്പൂ/നെല്ലിപ്പൂ ശാസ്ത്രീയനാമം: Utricularia reticulata Sm. കുടുംബം: Lentibulariaceae ഇംഗ്ലീഷ്: Reticulated Bladderwort

കാക്കപ്പൂക്കൾ ഇരപിടിയന്മാരാണ്. പ്രോട്ടോസോവ, റോട്ടിഫർ എന്നീ സൂക്ഷ്മജീവികൾ മുതൽ ജലച്ചെള്ളുകൾ, കൊതുകിന്റെ കൂത്താടികൾ, ചെറു വാൽമാക്രികൾ തുടങ്ങിയ ചെറുജീവികളെ വരെ കെണിയിലാക്കുവാൻ ഇവയ്ക്ക് കഴിയും. ഇതിനനുയോജ്യമായ ചെറുസഞ്ചികൾ (bladders) ഈ സസ്യങ്ങൾക്കുണ്ട്. വേരുകളിലോ ഇലകളിലോ ഉള്ള ബ്ലാഡറുകളുടെ കെണിവാതിലി (trap door)നോട് ചേർന്നുള്ള സംവേദനമൂലങ്ങളിൽ (sensitive hairs) ഇരകൾ സ്പർശിക്കുന്ന മാത്രയിൽ തന്നെ കെണിവാതിൽ തുറക്കപ്പെടുകയും വെള്ളത്തിനോടൊപ്പം ഇരകൾ അകത്താക്കപ്പെടുകയും ചെയ്യുന്നു. ഈ പ്രക്രിയ നടക്കുന്നത് പലപ്പോഴും ഒരു സെക്കണ്ടിന്റെ പതിനായിരത്തിലൊരംശം സമയംകൊണ്ടാണ്. ഇരകളെ ദഹിപ്പിക്കാനുള്ള പ്രത്യേക ദഹനരസം (digestive enzymes) പുറപ്പെടുവിക്കുകയും ഇരകളിലുള്ള പോഷകം വലിച്ചെടുക്കുകയും ചെയ്യുന്നു. ഇരകളുടെ അവശിഷ്ടം ഈ ബ്ലാഡറുകളിൽ തന്നെ ബാക്കിയിരിക്കുന്നത് കാണാം. അതിനാൽ ഇവയെ പൊതുവായി Bladderwort എന്നാണു പറയുക. കാക്കപ്പൂക്കളുടെ ജനുസ്സിൽപ്പെടുന്ന 233 സ്പീഷീസുകളിൽ നാലപ്പത് സ്പീഷീസുകൾ ഇന്ത്യയിൽ കാണപ്പെടുന്നു. കേരളത്തിൽ 23 സ്പീഷീസ് ഉണ്ട്. നമ്മുടെ നെൽവയലുകളിലും ഈർപ്പമുള്ള മറ്റു പ്രദേശങ്ങളിലും കാക്കപ്പൂക്കൾ കാണപ്പെടുന്നു.