നിരീക്ഷണ കാലവും രോഗനിര്‍ണയവും

പി സി ആർ ടെസ്റ്റ് ഇൻക്യുബേഷൻ പിരീഡിന്റെ അവസാന രണ്ട് ദിവസം മുതൽ രോഗലക്ഷണങ്ങൾ അവസാനിക്കുന്നത് വരെയാണ് സാധാരണ ഗതിയിൽ പോസിറ്റീവായിരിക്കുക. എന്നാൽ ചിലരിൽ ഇത് പിന്നീടും പോസിറ്റീവ് ആകാം. എന്നാൽ അവർക്ക് രോഗവ്യാപന സാധ്യത (Infectivity) ഉണ്ടാവില്ല. മറ്റുള്ളവരിലേക്ക് രോഗം പകരില്ലെന്നർത്ഥം. രോഗശമന ശേഷം രോഗിയുടെ ശരീരത്തിൽ നിന്നും രോഗ വ്യാപനത്തിനാവശ്യമായ അളവിൽ (<100000) വൈറസ് പുറത്തേക്ക് വരില്ല. ഈ ഘട്ടത്തിൽ പുറത്തേക്ക് വരുന്ന വൈറസ് ഘടകങ്ങളെ വൈറസ് മാലിന്യം (Virus Litter) എന്ന് ചില വിദ്ഗ്ധർ വിളിക്കുന്നുണ്ട്.

പി.സി.ആർ. പോസിറ്റീവായ ഒരാൾക്ക് രോഗവ്യാപന സാധ്യതയുണ്ടോ എന്നറിയാൻ മൂന്ന് ടെസ്റ്റ്കളിലേതെങ്കിലും ഒന്ന് ചെയ്ത് നോക്കാവുന്നതാണ്.

1. വൈറസിനെ കൾചർചെയ്യുക (Viral Culture) എന്നതാണ് ആദ്യത്തേത്. വൈറസിനെ കൃത്രിമ മാധ്യമങ്ങളിൽ വളർത്തിയെടുക്കാനാണ് കൾചറിൽ ശ്രമിക്കുന്നത്. ലെവൽ -3 ലാബറട്ടറിയിൽ മാത്രമേ വൈറസ് കൾചർ ചെയ്യാനാവൂ. കേരളത്തിൽ അതിന് സൌകര്യമില്ല. പൂനയിലെ നാഷണൽ വൈറോളജി ലാബറട്ടറിയിൽ അയക്കേണ്ടിവരും.
2. മറ്റൊന്ന് ആന്റിബോഡി ടെസ്റ്റ് ചെയ്യുക എന്നതാണ്. ഐ ജി എം (IgM) ആന്റിബോഡിയുണ്ടെങ്കിൽ രോഗം ഇപ്പോഴുമുണ്ടെന്നും ഐ ജി ജി യും ഐ ജി എമ്മുമും ഉണ്ടെങ്കിൽ (IgG+IGM) രോഗ ഭേദമായെന്നും കരുതാവുന്നതാണ്.
3. വൈറസ് ആന്റിജൻ ടെസ്റ്റാണ് മറ്റൊരു രീതി. അന്റിജൻ ടെസ്റ്റ് പോസിറ്റീവായാൽ രോഗമുണ്ടെന്നാണ് സൂചിപ്പിക്കുന്നത്. ശ്രീ ചിത്ര മെഡിക്കൽ ഇൻസ്റ്റിറ്റ്യൂട്ട് ആന്റിജൻ ടെസ്റ്റ് വികസിപ്പിച്ചെടുക്കുന്നതിന്റെ അവസാന ഘട്ടത്തിലാണ്.

ആശയക്കുഴപ്പം വേണ്ട

പി സി ആർ ടെസ്റ്റ് പോസ്റ്റിറ്റ് ആണോയെന്ന് ഉറപ്പ് വരുത്തുന്നതിനായി മറ്റൊരു ലാബിൽ കൂടി പരിശോധിക്കുന്നതും പരിഗണിക്കാവുന്നതാണ്. ഇന്നത്തെ സ്ഥിതിയിൽ ആന്റിബോഡി കിറ്റ് ലഭ്യമായി കഴിഞ്ഞാൽ സംശയമുള്ള കേസുകളിൽ ആന്റിബോഡി ടെസ്റ്റ് ചെയ്ത് നോക്കുന്നതാവും ഉചിതം. ഏതായാലും ഇക്കാര്യത്തിൽ ആശയക്കുഴപ്പവും ആശങ്കയും ആവശ്യമില്ല.