സയൻസ് ലളിതവും ആകർഷകവുമായി സാധാരണക്കാക്കു പകർന്നുകൊടുക്കൽ (Science Communication) പരിപോഷിപ്പിക്കാൻ ലോകവ്യാപകമായി  നടത്തുന്ന ഒരു പരിപാടിയാണ് സയൻസ് സ്ലാം. സയൻസ് അറിയുന്നവരും അറിയാത്തവരുമായ പ്രേക്ഷകർക്കുമുന്നിൽ യുവശാസ്ത്രജ്ഞർ അവരുടെ ഗവേഷണപ്രോജക്റ്റുകൾ സാധാരണക്കരുടെ ഭാഷയിൽ ലളിതമായ ചെറിയ സംഭാഷണത്തിലൂടെ 10 മിനിറ്റുകൊണ്ടു  വിശദീകരിക്കുന്നു. അവതരണത്തിൽ പ്രേക്ഷകരെ പരമാവധി എൻ‌ഗേജ് ചെയ്യിക്കൽ പ്രധാനമാണ്. അവതരണത്തിൽ സദസിന്റെ ശ്രദ്ധ പിടിച്ചുനിർത്തുകയും അതിന് അനുസൃതമായ പ്രതികരണങ്ങൾ സൃഷ്ടിക്കുകയും ചെയ്യുമ്പോഴാണ് അവതരണം ഇൻ‌ഗേജിങ് ആകുന്നത്. അതിനനുസരിച്ച് പ്രേക്ഷകർക്ക് വോട്ടുചെയ്യാനാകും.

ഗവേഷണത്തിന്റെ പ്രാധാന്യമോ ശാസ്ത്രീയഫലമോ അല്ല സയൻസ് സ്ലാമിൽ പരിഗണിക്കുന്നത്. മറിച്ച്, വിഷയം എന്തായാലും അത് മനസ്സിലാക്കാവുന്നതും രസകരവും  സംക്ഷിപ്തവുമായ രീതിയിൽ വിശദീകരിക്കുന്നോ എന്നതാണ് വിലയിരുത്തുക. അതാണ് സയൻസ് സ്ലാമുകളുടെ പ്രധാന ഉദ്ദേശ്യവും ആകർഷണവും.

സയൻസ് സ്ലാമുകൾ യൂണിവേഴ്സിറ്റികൾക്കും ലക്ചർ ഹാളുകൾക്കും പുറത്ത് സാംസ്കാരികകേന്ദ്രങ്ങൾ, തിയേറ്ററുകൾ, വായനശാലകൾ, ക്ലബ്ബുകൾ പോലെയുള്ള, സാധാരണക്കാരുടെ  പൊതുവിടങ്ങളിലാണ് വൈകുന്നേരങ്ങളിലും‌ മറ്റും നടത്തുന്നത്.  ഇതിനു രണ്ടു പ്രയോജനങ്ങൾ ഉണ്ട്. ഒന്ന്, ശാസ്ത്രജ്ഞർ ദന്തഗോപുരം ഉപേക്ഷിച്ച് ജനകീയസംസ്കാരത്തിന്റെ ഭാഗമാകുന്നു. രണ്ട്,  ശാസ്ത്രത്തിന്റെ സാങ്കേതികഭാഷയിലല്ലാതെ സാധാരണക്കാരോട് അവരുടെ ഭാഷയിൽ നേരിട്ട് ശാസ്ത്രവിനിമയം നടത്താൻ ഗവേഷകരെ പ്രാപ്താരാക്കുന്നു. ഇതുവഴി നല്ല സയൻസ് കമ്മ്യൂണിക്കേറ്റേഴ്സിനെ (എഴുത്തുകാരും പ്രഭാഷകരും അടക്കം) വളർത്തിയെടുക്കാനുമാവും. ശാസ്ത്രത്തിന്റെ ജനകീയവത്ക്കരണത്തിനും വ്യാപനത്തിനും അതുവഴി നാടിന്റെ പുരോഗതിക്കും ഇത് വളരെ പ്രധാനമാണ്.