ഫസീല മുഹമ്മദ് റഷീദ്

Department of Community Science, College of Agriculture Vellayani Thiruvananthapuram

Add your content…

ഒരു പ്രസിദ്ധ പരസ്യവാചകത്തിൽ പറയുന്നത് പോലെ- ആരാണ് സന്തോഷം ആഗ്രഹിക്കാത്തത്? സന്തോഷകരമായ മാനസിക നില കൈവരിക്കാൻ  മനുഷ്യർ എന്തെല്ലാം ആണ് പ്രാചീനകാലം തൊട്ട് ചെയ്തുവരുന്നത്. എന്നാൽ ആധുനിക ശാസ്ത്രത്തിന്റെ കണ്ടെത്തൽ പ്രകാരം സന്തോഷകരവും  ആരോഗ്യകരവുമായ മാനസിക നിലക്കു  നമ്മുടെ ആഹാരക്രമത്തിനും വിശിഷ്യാ നമ്മുടെ ദഹനനാളത്തിലെ പല രാസപ്രക്രിയകൾക്കും വലിയ പങ്കുണ്ട്.

സൈക്കോബയോട്ടിക്‌സ്

നമ്മുടെ ദഹനവ്യവസ്ഥ കേവലം ഭക്ഷണം സംസ്കരിക്കുക മാത്രമല്ല ചെയ്യുന്നത്- അത് നമ്മുടെ ചിന്തകളെയും വികാരങ്ങളെയും ഓർമ്മയെയും സ്വാധീനിക്കുന്ന ഒരു സങ്കീർണ്ണമായ നിയന്ത്രണ കേന്ദ്രം കൂടിയാണെന്ന ശ്രദ്ധേയമായ സത്യം 1920-കൾ മുതൽ ശാസ്ത്രജ്ഞർ കണ്ടെത്തിയിരുന്നു.  2013 ൽ ന്യൂറോസയൻസിൽ ഗവേഷണങ്ങൾ നടത്തിയിരുന്ന ഐറിഷ് ശാസ്ത്രജ്ഞർ ജോൺ ക്രയാനും റ്റെഡ് ഡിനാനും  ചേർന്നാണ് സൈക്കോബയോട്ടിക്‌സ് എന്ന പദവും അതിലൂടെ ഒരു നൂതന പഠനശാഖയും  വിഭാവനം ചെയ്തത്.

ഗട്ട്-ബ്രെയിൻ ആക്സിസ് (GBA)

ദഹനത്തിനും വിശപ്പ് നിയന്ത്രണത്തിനും അതീതമായ ഒരു ബന്ധമാണ് കുടലും തലച്ചോറും തമ്മിൽ ഉള്ളത്.  ഗട്ട്-ബ്രെയിൻ ആക്സിസ് (ജിബിഎ) എന്നറിയപ്പെടുന്ന ഈ സങ്കീർണ്ണമായ ആശയവിനിമയ ശൃംഖല ദഹനനാളത്തെയും കേന്ദ്ര നാഡീവ്യവസ്ഥയെയും ബന്ധിപ്പിക്കുക മാത്രമല്ല പരസ്പരപ്രവർത്തനങ്ങളെ സ്വാധീനിക്കാൻ പ്രാപ്തമാക്കുകയും ചെയ്യുന്നു. “രണ്ടാമത്തെ മസ്തിഷ്കം” എന്ന് പലപ്പോഴും വിളിക്കപ്പെടുന്ന കുടൽ, ന്യൂറോ ട്രാൻസ്മിറ്ററുകളും മറ്റ് സംയുക്തങ്ങളും ഉൽപാദിപ്പിക്കുന്ന ട്രില്യൺ കണക്കിന് സൂക്ഷ്മാണുക്കളുടെ ആവാസ കേന്ദ്രമാണ്, ഇത് നമ്മുടെ ദഹന ആരോഗ്യത്തെ മാത്രമല്ല, നമ്മുടെ മാനസികാവസ്ഥ, സമ്മർദ്ദ പ്രതികരണം എന്നിവയെയും രൂപപ്പെടുത്തുന്നു. വാഗസ് നാഡിയുടെ നേരിട്ടുള്ള ന്യൂറൽ കണക്ഷനുകൾ,  ഹോർമോണുകൾ, രോഗപ്രതിരോധ സിഗ്നലുകൾ എന്നിവയുടെ പ്രവർത്തനങ്ങൾ -ഇവയെല്ലാം  ജിബിഎ.യുമായി ആഴത്തിൽ ബന്ധിപ്പിച്ചിരിക്കുന്നു.

നമ്മുടെ കുടലിലെ സൂക്ഷമജീവികളും തലച്ചോറും തമ്മിലുള്ള ഈ ചലനാത്മകബന്ധം സമ്മർദ്ദം കൈകാര്യം ചെയ്യാൻ സഹായിക്കുകയും ഡിമെൻഷ്യ വരാനുള്ള സാദ്ധ്യത കുറയ്ക്കുകയും ചെയ്യുന്നു. ഉദാഹരണത്തിന്, ഗട്ട് മൈക്രോബയോട്ടയ്ക്ക് മാനസികാവസ്ഥ നിയന്ത്രിക്കുന്നതിന് അത്യന്താപേക്ഷിതമായ ഗാമ-അമിനോബ്യൂട്ടിറിക് ആസിഡ് (GABA), സെറോടോണിൻ തുടങ്ങിയ പ്രധാന ന്യൂറോ ട്രാൻസ്മിറ്ററുകൾ ഉത്പാദിപ്പിക്കാൻ കഴിയും. ഡിസ്ബയോസിസ് അഥവാ ദഹനനാളത്തിൽ വസിക്കുന്ന സൂക്ഷ്മജീവികളുടെ അസന്തുലിതാവസ്ഥ പലപ്പോഴും കുടലിന്റെ Permeability വർദ്ധിപ്പിക്കുന്നതിന് കാരണമാകുന്നു, സാധാരണയായി “ലീക്കി ഗട്ട്” എന്ന് വിളിക്കപ്പെടുന്ന ഇത് വീക്കം (Inflammation) കൂട്ടുന്ന സൈറ്റോകൈനുകൾ രക്തപ്രവാഹത്തിലേക്ക് പ്രവേശിക്കാൻ അനുവദിക്കുന്നു, ഇത് തലച്ചോറിന്റെ പ്രവർത്തനത്തെ പ്രതികൂലമായി ബാധിക്കുകയും ഉത്കണ്ഠ, വിഷാദം തുടങ്ങിയ മാനസിക ലക്ഷണങ്ങളിലേക്ക് നയിക്കുകയും ചെയ്യും.

ഹാപ്പിനെസ്സ് ഹോർമോൺ എന്നറിയപ്പെടുന്ന സെറോടോണിന്റെ 90 % ഉത്പാദനവും ദഹനനാളത്തിലെ എന്ററോക്രോമാഫിൻ കോശങ്ങളിൽ ആണ് നടക്കുന്നത്. രാസസന്ദേശങ്ങൾ അയയ്ക്കുകയും, മാനസികാവസ്ഥ നിയന്ത്രിക്കുന്നതിനും സെറോടോണിൻ പോലുള്ള ഹോർമോണുകൾ സമന്വയിപ്പിക്കുകയും  കോശങ്ങളുടെ വീക്കം നിയന്ത്രിക്കാൻ പോലും സഹായിക്കുകയും ചെയ്യുന്നതിലൂടെ കുടൽ നമ്മുടെ മൊത്തത്തിലുള്ള ക്ഷേമത്തിന് സജീവമായി സംഭാവന നൽകുന്നു.

അടുത്തിടെ, നമ്മുടെ കുടലിലെ ചെറിയ സൂക്ഷ്മാണുക്കളും തലച്ചോറിന്റെ ആരോഗ്യവും തമ്മിലുള്ള അത്ഭുതകരവും സങ്കീർണ്ണവുമായ പരസ്പരബന്ധം ശാസ്ത്ര ലോകത്ത് വലിയ ശ്രദ്ധ നേടിയിട്ടുണ്ട്. ഭക്ഷണശീലങ്ങളും ജീവിതശൈലിയും കുടൽ സുക്ഷ്മാണുവ്യവസ്ഥയെ എങ്ങനെ ആഴത്തിൽ രൂപപ്പെടുത്തുന്നുവെന്നും, ഗട്ട്-ബ്രെയിൻ ആക്സിസ് (GBA) വഴിയുള്ള Cognitive പ്രവർത്തനങ്ങളെ എങ്ങനെ സ്വാധീനിക്കുന്നുവെന്നും ഉയർന്നുവരുന്ന ഗവേഷണങ്ങൾ അടിവരയിടുന്നു.

ശരീരത്തെ സംരക്ഷിക്കാനും സൂക്ഷ്മാണുക്കളുടെ വൈവിധ്യം ഉറപ്പുവരുത്താനും സഹായിക്കുന്ന ആഹാരത്തിലെ ഘടകങ്ങളാണ് പ്രീബയോട്ടിക്കുകളും പ്രോബയോട്ടിക്കുകളും.  ഭക്ഷ്യനാരുകൾ അടങ്ങിയ ആഹാരമാണ് പ്രീബയോട്ടിക്കുകൾ. ആരോ​ഗ്യകരമായ ബാക്ടീരിയകൾ അടങ്ങിയതാണ് പ്രോബയോട്ടിക് ഭക്ഷണങ്ങൾ. ഗട്ട്-ബ്രെയിൻ ആക്സിസ് (GBA) രംഗത്തെ പുതിയ ഗവേഷങ്ങൾ പ്രോബയോട്ടിക്സ്, പ്രീബയോട്ടിക്സ്, ഭക്ഷണക്രമത്തിന്റെ പ്രാധാന്യം വ്യക്തമാക്കുന്നതാണ്. ആരോഗ്യമുള്ള കുടൽ കൂടുതൽ ഊർജ്ജസ്വലമായ തലച്ചോറിനെ സൂചിപ്പിക്കുന്നുവെന്ന് പഠനങ്ങൾ തെളിയിക്കുന്നു. കുടലിന്റെ ആരോ​ഗ്യം ഒരു വ്യക്തിയുടെ ആരോ​ഗ്യത്തിന്റെ അടിസ്ഥാനം കൂടിയാണ്.

കുടൽ സൂക്ഷ്മാണു വ്യവസ്ഥയിലും മസ്തിഷ്ക ആരോഗ്യത്തിലും ഭക്ഷണത്തിന്റെ സ്വാധീനം

നാം കഴിക്കുന്ന ഭക്ഷണം നമ്മുടെ ആമാശയത്തിലെയും കുടലിലെയും സൂക്ഷ്മ ജീവികളെയും അവരുടെ വൈവിധ്യത്തെയും സാരമായി ബാധിക്കുന്നു. വളരെയധികം പഞ്ചസാര, കൊഴുപ്പ് അല്ലെങ്കിൽ കുറഞ്ഞ നാരുകൾ അടങ്ങിയ സംസ്കരിച്ച ഭക്ഷണം ഈ സൂക്ഷ്മാണുക്കളെ ദോഷകരമായി ബാധിക്കും. കൃത്രിമ ചേരുവകളും ധാരാളം പ്രോസസ്സിംഗും ഉള്ള ഭക്ഷണങ്ങൾ കഴിക്കുന്നത് നമ്മുടെ കുടലിലെ നല്ല ബാക്ടീരിയകളുടെ സന്തുലിതാവസ്ഥ കൂടുതൽ വഷളാക്കുകയും ഇത് ഡിസ്ബയോസിസിന് കാരണമാകുകയും ചെയ്യും. ഭക്ഷണത്തിനുപുറമെ, വ്യായാമ വിമുഖത, വിട്ടുമാറാത്ത സമ്മർദ്ദം തുടങ്ങി മറ്റ് ജീവിത രീതികൾ എന്നിവ കുടലിലെ നല്ല ബാക്ടീരിയകളുടെ സന്തുലിതാവസ്ഥയെയും തലച്ചോറിന്റെ ആരോഗ്യത്തെയും ബാധിക്കുന്നു.

സമീപ വർഷങ്ങളിൽ, കുടലിന്റെ ആരോഗ്യവുമായി ബന്ധപ്പെട്ട മാനസികാരോഗ്യ വൈകല്യങ്ങൾ കൈകാര്യം ചെയ്യുന്നതിനുള്ള സാധ്യതയുള്ള ഇടപെടലായി പ്രോബയോട്ടിക്സ് ശ്രദ്ധ നേടിയിട്ടുണ്ട്. പ്രോബയോട്ടിക്സിന് കുടൽ മൈക്രോബയോട്ടയുടെ ഘടനയെ സ്വാധീനിക്കാൻ ഗവേഷണങ്ങൾ സൂചിപ്പിക്കുന്നു, ഇവയെല്ലാം മികച്ച മാനസികാരോഗ്യ ഫലങ്ങൾക്ക് കാരണമാകുന്നു. ക്ലിനിക്കൽ പരീക്ഷണങ്ങൾ കാണിക്കുന്നത്, പ്രോബയോട്ടിക്സിന്റെ നിർദ്ദിഷ്ട സ്ട്രെയിനുകൾ കഴിക്കുമ്പോൾ, വിഷാദത്തിന്റെയും ഉത്കണ്ഠയുടെയും ലക്ഷണങ്ങളിൽ കുറവു വരുന്നുണ്ട് എന്നാണ്. ഉദാഹരണത്തിന്, പ്രോബയോട്ടിക് ഉപഭോഗവുമായി ബന്ധപ്പെട്ട പഠനങ്ങളിൽ പരീക്ഷണ വിധേയരുടെ മാനസികാവസ്ഥയിലും മൊത്തത്തിലുള്ള മാനസിക ക്ഷേമവും മെച്ചപ്പെട്ടതായി റിപ്പോർട്ട് ചെയ്തു, ഒപ്പം സ്ട്രെസ് ഹോർമോൺ അളവ് സാധാരണ നിലയിലാക്കുകയും ചെയ്തു. മാനസികരോഗത്തിനുള്ള ചികിത്സയായി പ്രോബയോട്ടിക്സ് ഇതുവരെ ഔദ്യോഗികമായി നിർദേശിക്കപ്പെട്ടിട്ടില്ല. എങ്കിലും ഈ രംഗത്തെ പുതിയ ഗവേഷണങ്ങൾ ചില പ്രതീക്ഷകൾ നൽകുന്നുണ്ട്.

ആന്റിബയോട്ടിക്കുകളുടെ അമിതമായ ഉപയോഗം കുടലിന്റെ ആരോഗ്യത്തെ ബാധിക്കുന്ന മറ്റൊരു നിർണായക ഘടകമാണ്. ആൻറിബയോട്ടിക്കുകൾ അണുബാധകളെ ഫലപ്രദമായി നേരിടുന്നുണ്ടെങ്കിലും, അവ പ്രയോജനകരമായ കുടൽ ബാക്ടീരിയകളെ വിവേചനരഹിതമായി ഇല്ലാതാക്കുകയും ഗട്ട്-ബ്രെയിൻ ആക്സിസിൽ ദീർഘകാല പ്രത്യാഘാതങ്ങളിലേക്ക് നയിക്കുകയും ചെയ്യുന്നു. ഈ തെളിവുകൾ വർദ്ധിച്ചുവരുന്ന ഗവേഷണവുമായി യോജിക്കുകയും, മാനസിക ക്ഷേമത്തിനും ആരോഗ്യകരമായ സുക്ഷ്മാണുവ്യവസ്ഥ നിലനിർത്തേണ്ടതിന്റെ പ്രാധാന്യം ഊന്നിപ്പറയുകയും ചെയ്യുന്നു. .

പ്രോബയോട്ടിക്സ്, പ്രീബയോട്ടിക്സ്, സിൻബയോട്ടിക്സ്: ബൗദ്ധിക ആരോഗ്യത്തിനുള്ള പോഷക ഘടകങ്ങൾ

നമ്മുടെ കുടലിലെ നല്ല ബാക്ടീരിയകളെ പോഷിപ്പിക്കാനും സന്തുലിതമാക്കാനും സഹായിക്കുന്ന പ്രോബയോട്ടിക്സ്, പ്രീബയോട്ടിക്സ്, സിൻബയോട്ടിക്സ് എന്നിവയുൾപ്പെടെയുള്ള നിർദ്ദിഷ്ട ഭക്ഷണങ്ങളിലൂടെയും അനുബന്ധങ്ങളിലൂടെയും കുടൽ സൂഷ്മാണുവ്യവസ്ഥയിലൂടെയും (Gut microbiota) ആരോഗ്യത്തെ പിന്തുണയ്ക്കാൻ കഴിയും.

വാർദ്ധക്യവും ബൗദ്ധിക വ്യതിയാനങ്ങളും

വരും ദശകങ്ങളിൽ  ജനസംഖ്യയിൽ  ഗണ്യമായ മാറ്റങ്ങളാണ് പ്രതീക്ഷിക്കുന്നത്. 2030 ആകുമ്പോഴേക്കും, ആഗോളതലത്തിൽ ആറ് വ്യക്തികളിൽ ഒരാൾ 60 വയസ്സിനു മുകളിലുള്ളവരായിരിക്കും, 2050 ഓടെ 80 വയസ്സും അതിൽ കൂടുതലുമുള്ള ജനസംഖ്യ മൂന്നിരട്ടിയാകുമെന്ന് പ്രതീക്ഷിക്കുന്നു. പ്രായമാകലിന് കുടൽ സുക്ഷ്മാണുവ്യവസ്ഥയിലെ മാറ്റങ്ങളുമായി ബന്ധമുണ്ട്, പലപ്പോഴും സുക്ഷ്മാണുവൈവിധ്യത്തെയും അവയുടെ ഗുണതയെയും ബാധിക്കുന്നു. , ഇത് പ്രായവുമായി ബന്ധപ്പെട്ട cognitive decline കാരണമായേക്കാം.

ന്യൂറോ ഇൻഫ്ലമേഷൻ, ഓക്സിഡേറ്റീവ് സ്ട്രെസ്, സിനാപ്റ്റിക് പ്ലാസ്റ്റിറ്റി കുറയ്ക്കുക തുടങ്ങിയ മാറ്റങ്ങൾ വാർദ്ധക്യത്തിൽ അധികമായി കണ്ടുവരുന്നു. ഈ ഘടകങ്ങൾ ഓർമ്മശക്തി നഷ്ടപ്പെടുന്നതിനും പ്രശ്നപരിഹാര കഴിവുകൾ കുറയുന്നതിനും അൽഷിമേഴ്സ് പോലുള്ള ന്യൂറോ ഡീജനറേറ്റീവ് രോഗങ്ങൾക്കുള്ള സാധ്യത വർദ്ധിപ്പിക്കുന്നതിനും കാരണമാകും.

ഫൈബർ സമ്പുഷ്ടമായ ഭക്ഷണക്രമത്താലും, പ്രോബയോട്ടിക്സ്, പ്രീബയോട്ടിക്സ് എന്നിവയാലും സമ്പുഷ്ടമായ ഒരു ഗെട്ട് മൈക്രോബയോട്ടയിലൂടെ  “ലീക്കി ഗട്ട്” എന്ന് വിളിക്കപ്പെടുന്ന വീക്കം നിയന്ത്രിക്കാനാകുന്നു. സെറോടോണിൻ പോലുള്ള ന്യൂറോ ട്രാൻസ്മിറ്ററുകളുടെ പ്രവർത്തനത്തെ പ്രോത്സാഹിപ്പിക്കുകുകയും അതിലൂടെ തലച്ചോറിന്റെ പ്രവർത്തനത്തെ പിന്തുണയ്ക്കുകയും ചെയ്യുന്നു.

ഉപസംഹാരം

വിഷാദം, വിട്ടുമാറാത്ത ക്ഷീണം, അറ്റൻഷൻ ഡെഫിസിറ്റ് ഹൈപ്പർ ആക്ടിവിറ്റി ഡിസോർഡർ (ADHD), ഇറിറ്റബിൾ ബോവൽ സിൻഡ്രോം(IBS)മായി ബന്ധപ്പെട്ട വിഷാദം എന്നിവയുൾപ്പെടെ വിവിധ മാനസികാരോഗ്യ അവസ്ഥകളെ അഭിസംബോധന ചെയ്യാനുള്ള കഴിവ് ഗട്ട്-ബ്രെയിൻ ആക്സിസ് (GBA) നെക്കുറിച്ചുള്ള ഗവേഷണങ്ങൾ വെളിപ്പെടുത്തിയിട്ടുണ്ട്. പ്രോബയോട്ടിക്സും സിൻബയോട്ടിക്സും ഈ അവസ്ഥകളെ നിയന്ത്രിക്കാൻ സഹായിക്കുമെന്ന് പഠനങ്ങൾ തെളിയിച്ചിട്ടുണ്ട്.

ആഗോള ജനസംഖ്യയുടെ പ്രായമേറുന്നതും, മാറുന്ന ജീവിതശൈലിയും, ആരോഗ്യഫലങ്ങളെ സാരമായി ബാധിക്കുന്നത് തുടരുന്ന സാഹചര്യത്തിൽ, കുടലിലെ സൂക്ഷ്മാണുവ്യവസ്ഥ സന്തുലിതമായി നിലനിർത്തേണ്ടത് അനിവാര്യമാണ്. ഭക്ഷണക്രമം, ശാരീരിക അധ്വാനം, മാനസിക ആരോഗ്യ സംരക്ഷണം  എന്നിവ ആധുനിക ജീവിതത്തിന്റെയും വാർദ്ധക്യത്തിന്റെയും വെല്ലുവിളികളെ നേരിടുന്നതിൽ നിർണായകമാകും. ആരോഗ്യമുള്ള ഒരു സമൂഹത്തെ വളർത്തിയെടുക്കുന്നതിന് സമഗ്ര സമീപനമാണ് ആവശ്യം

അധിക വായനയ്ക്ക് 

1. Appleton J. (2018). The Gut-Brain Axis: Influence of Microbiota on Mood and Mental Health. Integrative medicine (Encinitas, Calif.), 17(4), 28–32.
2. Berding, K., Vlckova, K., Marx, W., Schellekens, H., Stanton, C., Clarke, G., Jacka, F., Dinan, T. G., & Cryan, J. F. (2020). Diet and the Microbiota–Gut–Brain axis: sowing the seeds of good mental health. Advances in Nutrition, 12(4), 1239–1285. https://doi.org/10.1093/advances/nmaa181
3. Cryan, J. F., & Dinan, T. G. (2012). Mind-altering microorganisms: the impact of the gut microbiota on brain and behaviour. Nature Reviews. Neuroscience, 13(10), 701–712. https://doi.org/10.1038/nrn3346
4. Hofer, U. (2022). Gut–brain axis in ageing. Nature Reviews Microbiology, 20(8), 446. https://doi.org/10.1038/s41579-022-00762-5
5. Mayer, E. A., Savidge, T., & Shulman, R. J. (2014). Brain–Gut microbiome interactions and functional bowel disorders. Gastroenterology, 146(6), 1500–1512. https://doi.org/10.1053/j.gastro.2014.02.037
6. Minghui, R. & World Health Organization. (2019). Risk reduction of cognitive decline and dementia. >>>>

മറ്റു ലേഖനങ്ങൾ

Happy

0 0 %

Sad

0 0 %

Excited

0 0 %

Sleepy

0 0 %

Angry

0 0 %

Surprise

0 0 %