Read Time:23 Minute

ഡോ.പി.കെ.സുമോദൻ

സുവോളജി അധ്യാപകൻ

ലൂക്ക എഡിറ്റോറിയൽ ബോർഡ് അംഗം

ജീവന്റെ ഏറ്റവും വലിയ ശക്തികളിലൊന്ന് പുതിയ പുതിയ മേച്ചിൽപുറങ്ങളിലേക്ക് കുടിയേറിപ്പാർക്കാനുള്ള അതിന്റെ അത്ഭുതകരമായ കഴിവാണ്. നാനൂറ് കോടിയിലേറെ വർഷങ്ങൾക്കുമുൻപ് കടലിന്റെ അടിത്തട്ടിലെ ഹൈഡ്രോതെർമൽ വെന്റുകൾക്ക് സമീപം ഉൽഭവിച്ച ജീവൻ അതിദീർഘമായ പരിണാമ പ്രക്രിയയിലൂടെ ഭൂമിയുടെ എല്ലാ മുക്കിലും മൂലയിലും എത്തിയിരിക്കയാണല്ലോ. മഞ്ഞുറയുന്ന ധ്രുവങ്ങൾ, വെട്ടിത്തിളയ്ക്കുന്ന ചൂടൻ പൊയ്കകൾ (hot springs) തുടങ്ങി ജീവന് നിലനിൽക്കാൻ കഴിയുമെന്ന് സങ്കൽപ്പിക്കാൻ പോലും കഴിയാത്ത ചുറ്റുപാടുകൾ പോലും ജൈവമണ്ഡലങ്ങളായിരിക്കയാണ്. പ്രകൃതിയിലെ സ്വാഭാവിക ആവാസവ്യവസ്ഥകൾ മാത്രമല്ല മനുഷ്യനിർമ്മിതമായ പുത്തൻ ആവാസസ്ഥലങ്ങളും കുടിയേറ്റത്തിൽ നിന്ന് വിമുക്തമായില്ല. അങ്ങനെയാണ് ജീവന്റെ ഏറ്റവും പുതിയ മേച്ചിൽപുറങ്ങളിലൊന്നായി പ്ലാസ്റ്റിക്ക് ലോകം അരങ്ങേറുന്നത്. കടലിലെ പ്ലാസ്റ്റിക്ക് മാലിന്യത്തിൽ വളരുന്ന സൂക്ഷ്മജീവികളെ ആദ്യമായി കണ്ടെത്തുന്നത് 1972 ലാണെങ്കിലും പ്ലാസ്റ്റിക്ക് പ്രതലത്തിൽ വളരുന്ന വ്യത്യസ്തമായ ഒരു സൂക്ഷ്മജീവി സമുദായത്തെക്കുറിച്ച് (microbial community) ലോകം അറിയുന്നത് 2013 ൽ ഇ. ആർ. സെറ്റ്ലർ (E. R. Zettler), ടി. ജെ. മിൻസർ (T.J.Mincer), അമറാൽ സെറ്റ്ലർ എന്നിവർ ചേർന്നു പ്രസിദ്ധീകരിച്ച ലേഖനത്തിലൂടെയാണ്. ആ ലേഖനത്തിന്റെ ഒരു ഭാഗം ഇങ്ങനെയാണ്:

“ഉത്തര അറ്റ്ലാന്റിക്ക് സമുദ്രത്തിലെ വിവിധ ഭാഗങ്ങളിൽ നിന്നായി ശേഖരിച്ച പ്ലാസ്റ്റിക്ക് അവശിഷ്ടങ്ങൾ (Plastic marine debris) ഇലക്ട്രോൺ മൈക്രോസ്കോപ്പിന്റെയും നെക്സ്റ്റ് ജനറേഷൻ സീക്വൻസിങ്ങിന്റേയും സഹായത്തോടെ വിശകലനം ചെയ്തപ്പോൾ വൈവിധ്യമാർന്ന ഒരു സൂക്ഷ്മജീവി സമുദായം അനാവരണം ചെയ്യപ്പെട്ടു. അവയുടെ കൂട്ടത്തിൽ ഉൽപാദകരും (producers), ഉപഭോക്താക്കളും (heterotrophs), വേട്ടക്കാരും (predators), സഹവർത്തികളും (symbionts) ഉണ്ടായിരുന്നു. ഈ സമുദായത്തെ ഞങ്ങൾ പ്ലാസ്റ്റിസ്ഫിയർ (plastisphere) എന്ന് വിളിക്കുന്നു. ചുറ്റുമുള്ള സമുദ്രജലത്തിലെ സൂക്ഷ്മജീവി സമുദായത്തിൽ നിന്നും തികച്ചും വ്യത്യസ്തമാണ് പ്ലാസ്റ്റിസ്ഫിയർ സമുദായം. അതിന്റെ അർത്ഥം സമുദ്രോപരിതലത്തിൽ പ്ലാസ്റ്റിക്ക് ഒരു പുത്തൻ ആവാസവ്യവസ്ഥ സംഭാവന ചെയ്യുന്നുണ്ടെന്നാണ്.”

ചുരുക്കത്തിൽ പറഞ്ഞാൽ പ്ലാസ്റ്റിക്ക് പ്രതലത്തിൽ വളരുന്ന സൂക്ഷ്മജീവി സമുദായമാണ് പ്ലാസ്റ്റിസ്ഫിയർ. പ്ലാസ്റ്റിക്കിലെ ബയോസ്ഫിയർ എന്ന അർത്ഥത്തിലാണ് പ്ലാസ്റ്റിസ്ഫിയർ എന്ന പേര് ഉപയോഗിക്കപ്പെട്ടത്. പ്ലാസ്റ്റിക്ക് പ്രതലത്തിൽ നേർത്ത ജൈവപാടകൾ (biofilm) ഉണ്ടാക്കുന്ന സൂക്ഷ്മജീവികളും അവയോടനുബന്ധിച്ചു ജീവിക്കുന്ന മറ്റ് ജീവികളുമടങ്ങിയതാണ് പ്ലാസ്റ്റിസ്ഫിയർ സമുദായം. എളുപ്പത്തിൽ ജൈവവിഘടനത്തിന് (biodegradation) വിധേയമാകാത്ത പ്ലാസ്റ്റിക്ക് ദീർഘകാലം നിലനിൽക്കുന്ന ഒരു ആവാസവ്യവസ്ഥയാണെന്ന പ്രത്യേകതയുമുണ്ട്. ഇതുവരെ നടന്ന പഠനങ്ങളിൽ മഹാഭൂരിപക്ഷവും സമുദ്രങ്ങളിലെ പ്ലാസ്റ്റിസ്ഫിയറുകൾ കേന്ദ്രീകരിച്ചാണ് നടന്നിട്ടുള്ളതെങ്കിലും ഏതാനും പഠനങ്ങൾ ശുദ്ധജല പ്ലാസ്റ്റിസ്ഫിയറുകളിലും മണ്ണിലെ പ്ലാസ്റ്റിസ്ഫിയറുകളിലും നടന്നിട്ടുണ്ട്.

Microbes interacting with the surface of plastics. Credit – Wikimedia Commons

കടലിലെ പ്ലാസ്റ്റിസ്ഫിയർ

കടൽവെള്ളത്തിൽ പൊങ്ങിക്കിടക്കുന്ന മൈക്രോപ്ലാസ്റ്റിക്ക് (5 മില്ലിമീറ്ററിൽ താഴെ വലുപ്പമുള്ള പ്ലാസ്റ്റിക്ക് കഷണങ്ങൾ) ഉൾപ്പെടെയുള്ള പ്ലാസ്റ്റിക്ക് കഷണങ്ങളിലാണ് പ്ലാസ്റ്റിസ്ഫിയർ രൂപപ്പെടുന്നത്. വെള്ളത്തിലെത്തി അധികം കഴിയുന്നതിന് മുൻപ് തന്നെ പ്ലാസ്റ്റിക്കിന്റെ ഉറച്ച ഉപരിതലത്തിൽ സൂക്ഷ്മജീവികൾ കുടിയേറിത്തുടങ്ങും. സെറ്റ്ലറും സംഘവും പോളി എത്തിലീൻ, പോളി പ്രൊപ്പിലീൻ എന്നീ രണ്ട് വിഭാഗം പ്ലാസ്റ്റിക്ക് കഷണങ്ങളിലെ സൂക്ഷ്മജീവികളെയാണ് പഠനവിധേയമാക്കിയത്.

അവയിൽ ബാക്ടീരിയകളും ബാക്ടീരിയകളല്ലാത്ത മറ്റ് ഏകകോശ ജീവികളുമുണ്ടായിരുന്നു. സജീവമായ ഒരു ജൈവസമുദായത്തിനാവശ്യമായ (Biological community) ജീവിഘടകങ്ങളായ ഉല്പാദകരും ഉപഭോക്താക്കളും വിഘാടകരുമടങ്ങിയതാണ് പ്ലാസ്റ്റിസ്ഫിയറിലെ സമുദായമെന്നും കണ്ടെത്തി. അവയെല്ലാം തന്നെ ചുറ്റുമുള്ള കടൽവെള്ളത്തിലെ സൂക്ഷ്മജീവികളിൽ നിന്ന് തികച്ചും വ്യത്യസ്തവുമായിരുന്നു. ഉദാഹരണത്തിന് പ്ലാസ്റ്റിസ്ഫിയറിൽ കണ്ടെത്തിയ പ്രകാശസംശ്ലേഷണ ബാക്റ്റീരിയകളായ ഫോർമിഡിയം, റിവുലേറിയ എന്നീ ബാക്റ്റീരിയകൾ കടൽ വെള്ളത്തിൽ ഇല്ലായിരുന്നു. പകരം മറ്റൊരു ബാക്ടീരിയയായ പ്രോക്ലോറോകോക്കസ് ആയിരുന്നു കൂടുതലും. പ്ലാസ്റ്റിസ്ഫിയർ ഒരു വ്യത്യസ്ത ആവാസവ്യവസ്ഥയാണെന്നതിനുള്ള തെളിവുകൂടിയാണ് ഈ വ്യത്യാസം. പിൽക്കാല പഠനങ്ങളിൽ മറ്റനേകം സൂക്ഷ്മജീവികളെ കണ്ടെത്തിയിട്ടുണ്ട്.

ശുദ്ധജലത്തിലെ പ്ലാസ്റ്റിസ്ഫിയർ

ശുദ്ധജലത്തിൽ പ്ലാസ്റ്റിസ്ഫിയർ ആദ്യമായി കണ്ടെത്തുന്നത് 2014 ലാണെങ്കിലും കൂടുതൽ പഠനങ്ങൾ നടന്നത് 2017 മുതൽ മാത്രമാണ്. യു. എസ്.എ, ചൈന, ഇറ്റലി, ജർമനി എന്നീ നാല് രാജ്യങ്ങളിൽ മാത്രമേ ശുദ്ധജല പ്ലാസ്റ്റിസ്ഫിയറുകളിൽ കാര്യമായ പഠനങ്ങൾ നടന്നിട്ടുള്ളൂ. അതുകൊണ്ട് തന്നെ ആഗോളതലത്തിൽ അവയുടെ വ്യാപ്തിയെക്കുറിച്ചും അവയിൽ ജീവിക്കുന്ന സൂക്ഷ്മജീവി വൈവിദ്ധ്യത്തെക്കുറിച്ചും പരിസ്ഥിതിയിൽ അവയ്ക്കുള്ള പങ്കിനെക്കുറിച്ചും നമുക്ക് പരിമിതമായ അറിവ് മാത്രമേയുള്ളൂ. നിലവിൽ ലഭ്യമായ അറിവ് പ്രകാരം പുഴകളുടെ വ്യത്യസ്ത മേഖലകളിൽ കാണുന്ന പ്ലാസ്റ്റിസ്ഫിയറുകളിൽ വ്യത്യസ്തമായ സൂക്ഷ്മജീവി സമുദായങ്ങളാണുള്ളത്. എന്നാൽ പല സൂക്ഷ്മജീവികളും ശുദ്ധജലത്തോടൊപ്പം സമുദ്രജലത്തിലും ജീവിക്കുന്നവയാണ്. അത്തരം സൂക്ഷ്മജീവികൾ മൈക്രോപ്ലാസ്റ്റിക്ക് വഴി കടലിലെത്തിയതാകാം എന്നാണ് കരുതപ്പെടുന്നത്. അതായത് പ്ലാസ്റ്റിസ്ഫിയറിന്റെ രൂപീകരണം പുഴയിലെ ശുദ്ധജലത്തിൽ ആരംഭിക്കുകയും പിന്നീട് ഒഴുക്കിൽപ്പെട്ട് കടലിലെത്തിയതുമായിരിക്കണം. കടൽവെള്ളത്തിൽ ജീവിക്കാൻ ശേഷിയുള്ള ജീവികൾ അതിജീവിക്കുകയും ബാക്കിയുള്ളവ നശിച്ചു പോവുകയും ചെയ്തിട്ടുണ്ടാകാം. തുടർന്ന് കടലിലെ തനത് സൂക്ഷ്മജീവികൾ പുഴയിലൂടെ വന്ന പ്ലാസ്റ്റിസ്ഫിയറിൽ കൂടിയേറിത്താമസിക്കുകയും ചെയ്തിട്ടുണ്ടാകാം. ശുദ്ധജലത്തിലെ പ്ലാസ്റ്റിസ്ഫിയറുകളുമായി ബന്ധപ്പെട്ട വിശദമായ പഠനങ്ങൾ ഇനിയും നടക്കേണ്ടതായിട്ടുണ്ട്. ഇതുവരെയുള്ള അറിവനുസരിച്ച് പ്രോട്ടിയോബാക്റ്റീരിയ (Proteobacteria), ബാക്റ്റീരോയിഡീറ്റ്സ് (Bacteroidetes), ആക്ടിനോബാക്റ്റീരിയ (Actinobacteria), ഫേമിക്യൂട്സ് (Firmicutes), വെറുകോമൈക്രോബിയ (Verrucomicrobia), പ്ലാൻക്റ്റോമൈസീറ്റ്സ് (Planctomycetes), അസിഡോബാക്റ്റീരിയ ( Acidobacteria) തുടങ്ങിയവയാണ് ശുദ്ധജല പ്ലാസ്റ്റിസ്ഫിയറിലെ സൂക്ഷ്മജീവി വിഭാഗങ്ങൾ. പുഴകളിലും ശുദ്ധജല തടാകങ്ങളിലും കുളങ്ങളിലും പ്ലാസ്റ്റിസ്ഫിയറുകൾ കണ്ടെത്തിയിട്ടുണ്ട്.

മണ്ണിലെ പ്ലാസ്റ്റിസ്ഫിയർ

ജലത്തിലെ പ്ലാസ്റ്റിസ്ഫിയറുകളിൽ നിന്നും വ്യത്യസ്തമാണ് മണ്ണിലെ പ്ലാസ്റ്റിസ്ഫിയറുകൾ. ഒന്നാമത് മണ്ണിലെത്തുന്ന പ്ലാസ്റ്റിക്ക് കണികകൾ അധികം സഞ്ചരിക്കാത്തവയാണ്. നൂറ് വർഷം കൊണ്ട് കൂടിയാൽ അഞ്ച് മീറ്റർ മാത്രമേ മണ്ണിലെ പ്ലാസ്റ്റിക്ക് ഒരിടത്തുനിന്നും മറ്റൊരിടത്തേക്ക് നീങ്ങുകയുള്ളൂ എന്നാണ് കണക്കാക്കപ്പെട്ടിട്ടുള്ളത്. രണ്ടാമത്തെ വ്യത്യാസം സൂക്ഷ്മജീവികളുടെ വൈവിധ്യമാണ്. മണ്ണിലെ പ്ലാസ്റ്റിസ്ഫിയറുകളിലെ സൂക്ഷ്മജീവിവൈവിധ്യം തീരെ കുറവാണ്. പ്രത്യേകിച്ചും ചുറ്റുമുള്ള മണ്ണുമായി താരതമ്യം ചെയ്യുമ്പോൾ. കൃഷിസ്ഥലങ്ങളിലെ പ്ലാസ്റ്റിസ്ഫിയറുകളാണ് കൂടുതലും പഠനവിധേയമാക്കിയിട്ടുള്ളത്. അത്തരത്തിലുള്ള ഭൂരിപക്ഷം പഠനങ്ങളും നടന്നത് ചൈനയിലാണ്. ആക്ടിനോബാക്റ്റീരിയ (Actinobacteria), ബാക്റ്റീരോയിഡീറ്റ്സ് ( Bacteroidetes), സയനോബാക്റ്റീരിയ ( Cyanobacteria) , ഡീനോകോക്സൈ (Deinococci), പ്രോട്ടിയോബാക്റ്റീരിയ ( Proteobacteria), വെറുകോമൈക്രോബിയ (Verrucomicrobia) തുടങ്ങിയ വിഭാഗങ്ങളിൽ പെട്ട ബാക്ടീരിയകളെയാണ് കൃഷിസ്ഥലങ്ങളിലെ പ്ലാസ്റ്റിസ്ഫിയറുകളിൽ കൂടുതലായി കണ്ടെത്തിയത്. ചുറ്റുമുള്ള മണ്ണിലെ സൂക്ഷ്മജീവി സമുദായത്തിൽ നിന്നും തികച്ചും വ്യത്യസ്തമായിരിക്കും പ്ലാസ്റ്റിസ്ഫിയറുകളിലെ സൂക്ഷ്മജീവി സമുദായം. അവയിൽ പല അംഗങ്ങളും രോഗാണുക്കളാണ്. മാത്രമല്ല പലതും ആന്റിബയോട്ടിക്കിനെതിരെ പ്രതിരോധശക്തി പ്രദാനം ചെയ്യുന്ന ജീനുകളടങ്ങിയവയുമാണ്. അത്തരം ബാക്ടീരിയകളിൽ ഗവേഷകരുടെ പ്രത്യേക ശ്രദ്ധ കേന്ദ്രീകരിക്കുന്നുണ്ട്. അതുപോലെ പ്ലാസ്റ്റിക്ക് വിഘടിപ്പിക്കാൻ കഴിവുള്ള ബാക്ടീരിയകളും മണ്ണിലെ പ്ലാസ്റ്റിസ്ഫിയറുകളിൽ നിന്ന് കണ്ടെത്തിയിട്ടുണ്ട്. സമുദ്രങ്ങളിലെ പ്ലാസ്റ്റിസ്ഫിയറുകളിൽ നിന്ന് വ്യത്യസ്തമായി മണ്ണിലെ പ്ലാസ്റ്റിസ്ഫിയറുകളിൽ വിവിധതരം ഫംഗസുകളും കണ്ടെത്തിയിട്ടുണ്ട്.

പ്ലാസ്റ്റിസ്ഫിയർ എന്ന വ്യത്യസ്ത ജീവിലോകം

തികച്ചും വ്യത്യസ്തമായ സൂക്ഷ്മജീവി സമുദായങ്ങളാണ് പ്ലാസ്റ്റിസ്ഫിയറിലുള്ളതെന്ന് പറഞ്ഞല്ലോ. എന്തായിരിക്കാം അതിന്റെ കാരണം? ചൈനീസ് ഗവേഷകരായ ചാങ്ചാവോ ലിയുടേയും (Changchao Li) കൂട്ടരുടേയും അഭിപ്രായത്തിൽ ഈ പ്രത്യേകതയ്ക്ക് രണ്ട് കാരണങ്ങളാണുള്ളത്.

സൂക്ഷ്മജീവികളെ അരിച്ചെടുക്കാനുള്ള മൈക്രോപ്ലാസ്റ്റിക്കിന്റെ കഴിവ്. അതെങ്ങനെയാണെന്ന് വിശദീകരിക്കാം. കാർബൺ (organic carbon) അടങ്ങിയ കീടനാശിനികൾ, മാലിന്യങ്ങൾ, പോളി സൈക്ളിക്ക് ആരോമാറ്റിക്ക് ഹൈഡ്രോകാർബണുകൾ, തുടങ്ങിയ ഓർഗാനിക്ക് പദാർത്ഥങ്ങൾ (organic matter) ചുറ്റുപാടിൽ നിന്നും എളുപ്പത്തിൽ വലിച്ചെടുക്കാൻ മൈക്രോപ്ലാസ്റ്റിക്കിന് കഴിവുണ്ട്. അതിന് പുറമേ, പ്ലാസ്റ്റിക്കിന്റെ നിർമ്മാണ സമയത്ത് ചേർക്കുന്ന പല രാസപദാർത്ഥങ്ങളും ചില സൂക്ഷമാണുക്കൾക്ക് വിഷവും മറ്റു ചിലവയ്ക്ക് ആഹാരവുമാണ്. ഈ രണ്ടുതരത്തിലുമുള്ള രാസവസ്തുക്കൾ ഒരുക്കുന്ന വ്യത്യസ്തമായ ചുറ്റുപാടിൽ ജീവിക്കാൻ കഴിയുന്ന സൂക്ഷ്മജീവികളാണ് പ്ലാസ്റ്റിസ്ഫിയർ സമുദായാംഗങ്ങൾ.
വൈവിധ്യമാർന്ന പ്രദേശങ്ങളിൽ നിന്നായിരിക്കുമല്ലോ പ്ലാസ്റ്റിക്ക് ജലത്തിലും മണ്ണിലുമെത്തുന്നത്. അങ്ങനെ വരുന്ന പ്ലാസ്റ്റിക്കിൽ തദ്ദേശീയമായ സൂക്ഷ്മജീവികളും ഒട്ടിപ്പിടിച്ചിരിക്കാൻ സാദ്ധ്യതയുണ്ട്. അതും പ്ലാസ്റ്റിസ്ഫിയറിന്റെ സൂക്ഷമാണുവൈവിദ്ധ്യത്തിന് സംഭാവന നൽകുന്നുണ്ടാകാം.

പ്ലാസ്റ്റിസ്ഫിയറിന്റെ പ്രസക്തി

പ്ലാസ്റ്റിസ്ഫിയർ പരിസ്ഥിതിയിലുണ്ടാക്കുന്ന നല്ലതും ചീത്തയുമായ ആഘാതങ്ങളെക്കുറിച്ച് അധികം പഠനങ്ങളൊന്നും നടന്നിട്ടില്ല. ഇതുവരെ നടന്ന പഠനങ്ങളെ ആസ്പദമാക്കി എത്തിപ്പെടാവുന്ന നിഗമനങ്ങളെ ക്രോഡീകരിക്കാൻ ശ്രമിക്കാം.

മൂലകങ്ങളുടെ ചംക്രമണം: കാർബൺ, നൈട്രജൻ, സൾഫർ തുടങ്ങിയ മൂലകങ്ങളുടെ ചംക്രമണത്തെ സഹായിക്കുന്ന ബാക്ടീരിയകളുടെ വ്യത്യസ്തത കാരണം പ്ലാസ്റ്റിസ്ഫിയർ ഉൾക്കൊള്ളുന്ന പരിസ്ഥിതിയിൽ നടക്കുന്ന മൂലകങ്ങളുടെ ചംക്രമണം സാധാരണയായി നടക്കുന്ന മൂലക ചംക്രമണത്തിൽ വ്യത്യസ്തമായിരിക്കുമെന്നാണ് പഠനങ്ങൾ സൂചിപ്പിക്കുന്നത്. എന്നാൽ അതിന്റെ ആഴവും പരപ്പും പൂർണ്ണമായി അനാവരണം ചെയ്യപ്പെട്ടിട്ടില്ല.
പ്ലാസ്റ്റിക്ക് നിർമ്മാർജ്ജനം: പ്ലാസ്റ്റിക്ക് വിഘടനം ചെയ്യാൻ കഴിവുള്ള സൂക്ഷ്മജീവികളുടെ എണ്ണവും വൈവിദ്ധ്യവും മറ്റ് ആവാസവ്യവസ്ഥകളെക്കാൾ പ്ലാസ്റ്റിസ്ഫിയറിൽ കൂടുതലാണ്. അതുകൊണ്ട് അത്തരം സൂക്ഷ്മജീവികളെ ലഭിക്കാൻ കൂടുതൽ സാധ്യതയുള്ള ആവാസവ്യവസ്ഥയാണ് പ്ലാസ്റ്റിസ്ഫിയർ.
ആരോഗ്യരംഗം: രോഗകാരികളാകാൻ സാദ്ധ്യതയുള്ള അനേകം ബാക്ടീരിയകളെ പ്ലാസ്റ്റിസ്ഫിയറുകളിൽ നിന്ന് വേർതിരിച്ചെടുത്തിട്ടുണ്ട്. വിബ്രിയോ (Vibrio), സ്യൂഡോമോണാസ് ( Pseudomonas) മുതലായവ ഉദാഹരണങ്ങൾ.

General structure of the bacterial communities in seawater, freshwater, and soil plastisphere Source : 10.1002/imt2.101

കൂടാതെ, നേരത്തെ സൂചിപ്പിച്ചതുപോലെ, ആന്റിബയോട്ടിക്കുകൾക്കെതിരെ പ്രതിരോധശക്തിയുള്ള ബാക്ടീരിയകളെയും കണ്ടെത്തിയിട്ടുണ്ട്. ഇങ്ങനെയുള്ള ബാക്ടീരിയകളെ ദീർഘദൂരം അതിവേഗത്തിൽ വഹിച്ചുകൊണ്ടുപോകാനുള്ള മൈക്രോപ്ലാസ്റ്റിക്കിനുള്ള കഴിവ് പരിസ്ഥിതിയുടെയും മനുഷ്യരുടെ തന്നെയും ആരോഗ്യത്തിന് ഭീഷണിയാകാനുള്ള സാദ്ധ്യതയുമുണ്ട്.

പ്ലാസ്റ്റിസ്ഫിയർ പഠനത്തിന്റെ ഭാവി

കേവലം 12 വർഷങ്ങൾ മാത്രം പഴക്കമുള്ള പ്ലാസ്റ്റിസ്ഫിയർ പഠനം ഇനിയും ബഹുദൂരം മുൻപോട്ട് പോകേണ്ടതുണ്ട്. പ്ലാസ്റ്റിക്ക് പലവിധമുണ്ടല്ലോ. വിവിധതരം പ്ലാസ്റ്റിക്കുകളുടെ പ്രത്യേകതകൾ അവയിൽ വളരുന്ന സൂക്ഷ്മജീവി സമുദായങ്ങളിലെ ജൈവവൈവിദ്ധ്യത്തെ ഏത് തരത്തിൽ സ്വാധീനിക്കുന്നുവെന്നതിനെ കുറിച്ച് ഇപ്പോഴും പൂർണ്ണമായ അറിവില്ല. അതുപോലെ ഏതുതരം ജീവികൾ ഏത് സമയത്ത് പ്ലാസ്റ്റിക്കിൽ കുടിയേറുന്നുവെന്നും ഓരോ കുടിയേറ്റ ഘട്ടത്തിലും കാണുന്ന സൂക്ഷ്മജീവി വിഭാഗമേതെന്നും ഇപ്പോഴും വ്യക്തമല്ല. പ്ലാസ്റ്റിസ്ഫിയറിലെ രോഗകാരികളാകാൻ സാധ്യതയുള്ള സൂക്ഷ്മജീവികൾ ഏതുതരത്തിൽ മനുഷ്യരുടെയും മൃഗങ്ങളുടെയും ആരോഗ്യത്തെ സ്വാധീനിക്കും, പ്ലാസ്റ്റിസ്ഫിയറിലെ ബാക്ടീരിയകളിൽ കണ്ടെത്തിയ ആന്റിബയോട്ടിക്കുകൾക്കെതിരെ പ്രതിരോധമുണ്ടാക്കാൻ കഴിവുള്ള ജീനുകൾ മനുഷ്യരെ ബാധിക്കുന്ന രോഗാണുക്കളിൽ കടന്നുകയറാൻ സാദ്ധ്യതയുണ്ടോ, പ്ലാസ്റ്റിസ്ഫിയറിലെ ജീവികൾക്ക് പരിണാമം സംഭവിക്കുന്നുണ്ടോ തുടങ്ങി ഒട്ടേറെ കാര്യങ്ങൾ ഇനിയും പഠിക്കേണ്ടതായിട്ടുണ്ട്.

അധികവായനയ്ക്ക്

Amaral-Zettler, L.A., Zettler, E.R. & Mincer, T.J. (2020). Ecology of the plastisphere. Nat Rev Microbiol 18, 139–151.
Bocci V, Galafassi S, Levantesi C, Crognale S, Amalfitano S, Congestri R, Matturro B, Rossetti S and Di Pippo F (2024) Freshwater plastisphere: a review on biodiversity, risks, and biodegradation potential with implications for the aquatic ecosystem health. Front. Microbiol. 15:1395401.
Juliana Barros, Sahadevan Seena (2021). Plastisphere in freshwaters: An emerging concern. Environmental Pollution, Volume 290.
Li, C., Gillings, M. R., Zhang, C., Chen, Q., Zhu, D., Wang, J., Zhao, K., Xu, Q., Leung, P. H., Li, X., Liu, J., & Jin, L. (2024). Ecology and risks of the global plastisphere as a newly expanding microbial habitat. Innovation, 5(1), Article 100543.
Rillig C Mathias, Shin Woong Kim, Yong-Guan Zhu (2023). The soil plastisphere. Nat Rev Microbiol. 22(2): 64–74
Zettler, E. R., Mincer, T. J. & Amaral- Zettler, L. A. (2013). Life in the ‘plastisphere’: microbial communities on plastic marine debris. Environ. Sci. Technol. 47, 7137–7146 (2013).
Zhu D, Ma J, Li G, Rillig C Matthias, Zhu Yong-Guan (2022). Soil plastispheres as hotspots of antibiotic resistance genes and potential pathogens. The ISME Journal, 16:521–532.