ബോബ് പി.എൻ

കേരളത്തിലെ (മാനം നോക്കികളുടെ) വാനനിരീക്ഷകരുടെ, മഹാസംഗമത്തിൽ പങ്കെടുക്കാൻ കഴിഞ്ഞതിന്റെ ആവേശം ഇപ്പോഴും വിട്ടു മാറിയിട്ടില്ല.

മാർച്ച്‌ 22,23 തിയതികളിലായി തൃശൂർ ചേർപ്പിൽ വെച്ച് സംഘടിപ്പിച്ച ദ്വിദിന ക്യാമ്പിൽ 70 പേരെന്ന് പറഞ്ഞ് എത്തിച്ചേർന്നത് നൂറ്റി അൻപതോളം പേരാണ്. പക്ഷെ മികച്ച സൗകര്യങ്ങളാണ് ചേർപ്പിലെ ശ്രീലകം എന്ന വിജ്ഞാനകേന്ദ്രത്തിൽ ഒരുക്കിയിരുന്നത്. കേരളത്തിലെ വിവിധ ജില്ലകളിൽ നിന്നുള്ള വാന നിരീക്ഷകർക്കു പുറമെ തമിഴ്നാട്, ലക്ഷദ്വീപ് എന്നിവിടങ്ങളിൽ നിന്നും പ്രതിനിധികൾ എത്തിച്ചേർന്നിരുന്നു. ക്യാമ്പ് വ്യത്യസ്തമാക്കാൻ സംഘാടകർ കാണിച്ച മികവിനെ അഭിനന്ദിക്കാതെ പോകാൻ കഴിയില്ല

ഓറിയോൺ നക്ഷത്രഗണത്തിന്റെ പതാക ഉയർത്തിയാണ് ക്യാമ്പ് ആരംഭിച്ചത്.
കേരളത്തിലെ വാനനിരീക്ഷണത്തിന് ബീജാവാപം ചെയ്ത പാപ്പുട്ടി മാഷാണ് കൊടിയുയർത്തിയത്.അതിന് ശേഷം സിറിയസ് എന്ന് പേരിട്ട വേദിയിൽ വാന നിരീക്ഷകരെല്ലാവരും ഒത്തു ചേർന്നു. ക്യാമ്പ് യാഥാർഥ്യമാക്കിയ റിസ്വാൻ എല്ലാവരെയും ബഹിരാകാശ പേടകത്തിൽ കയറ്റി കൗണ്ട് ഡൗൺ ബട്ടൺ അമർത്തി. 10.00 മണിക്ക് നിശ്ചയിച്ച പേടകം സാങ്കേതിക തകരാറു മൂലം 10.30 നാണ് യാത്ര തിരിച്ചത്.

യാത്രയെ കുറിച്ച് കൃത്യമായി വിവരങ്ങൾ പറഞ്ഞ് തന്ന എൻ. സാനു പേടകം സുരക്ഷിതമായി ടേക്ക് ഓഫ്‌ ചെയ്‌തു. ഗ്രഹങ്ങളും, ഉപഗ്രഹങ്ങളും, ഉൽക്കകളും, നക്ഷത്രങ്ങളും, നെബുലകളും അടങ്ങിയ അതിവിശാലമായ, ആകാശമെന്ന് ചുരുക്കി വിളിക്കുന്ന മഹാ സാഗരത്തിന്റെ ഒരു തുള്ളിമാത്രം കൗതുകത്തോടെ നോക്കി നിന്നവരായി രുന്നു ആ പേടകത്തിൽ ഉള്ളവരെല്ലാം.
അവരുടെ മനസ്സിൽ തോന്നിയ കൗതുകത്തിനും സംശയങ്ങൾക്കും ഉത്തരം തേടിയാണ് അവരോരുത്തരും ഈ യാത്ര ആരംഭിച്ചത്. ഹാലി ധൂമകേതുനെ അന്വേഷിച്ചു പോയ പപ്പൂട്ടി മാഷാണ് വാഹനത്തിലെ ആദ്യ ബഹിരാകാശ സഞ്ചാരി. ആദ്യ യാത്രക്ക് വന്ന കുറച്ചു പേരും ഉണ്ട്.

അഞ്ചും പത്തും തവണ ബഹിരകാശത്തു പോയി വന്ന പലരും കൂട്ടത്തിൽ ഉണ്ട്. ആകാശ സത്യങ്ങൾ ആഴത്തിൽ പഠിച്ച് അതിൽ ഗവേഷണം ചെയ്യുന്ന അന്വേഷണകുതുകികകളായ ഈ വാനനിരീക്ഷകർ കൂടുതൽ അറിവുകൾ നേടാനും ഈ രംഗത്തെ ഏറ്റവും പുതിയ അറിവുകൾ പങ്കു വെക്കാനും ആയാണ് വീണ്ടും വീണ്ടും യാത്ര ചെയ്യുന്നത്.

150 പേരുമായി പ്രകാശ വേഗത്തിൽ കുതിച്ച ബഹിരാകാശപേടകത്തിനെ നിയന്ത്രിക്കാൻ പ്രഗത്ഭർ മാറി മാറി വന്നു. ഇടക്ക് സാമാന്തര സെഷൻ എന്ന പേരിൽ ചെറിയ കൂട്ടങ്ങളായി വേർ പിരിഞ്ഞ് ചെറു പേടകങ്ങളിൽ ഓറി യോൺ, ആൻഡ്രോമീഡ എന്നിവിടങ്ങളിലേക്ക് പിരിഞ്ഞു.എങ്കിലും ഏതാണ്ട് 30 മിനിറ്റ് ഭൗമ സമയത്തിന് ശേഷം പ്രകാശ വേഗത യിൽ മിക്കവരും മാതൃ പേടകത്തിൽ തിരിച്ചെത്തുമായിരുന്നു

പക്ഷെ ഒട്ടേറെ പേർ മാതൃപേടകത്തിൽ നിന്നും നിയന്ത്രണം നഷ്ടപ്പെട്ട് ജ്യോതിശാസ്ത്രതെരുവിൽ ഏറെ നേരം അലഞ്ഞു നടന്നു. ചെറുതും വലുതുമായി, പല വിലയിലും തരത്തിലുള്ള ടെലസ്കോപ്പുകൾ, വാനനിരീക്ഷണവുമായി ബന്ധപ്പെട്ട അപൂർവ്വ പുസ്തകങ്ങൾ എന്നിവയൊക്കെ കാണാൻ സാധിച്ചു.

വാനം എന്നത് അറിവിന്റെ മഹാ പ്രപഞ്ചമാണെന്നും, നമുക്കറിയാവുന്നത് വളരെ കുറച്ചാ ണെന്നും, കൂടുതൽ അന്വേഷിച്ചു കണ്ടെത്തണം എന്നും ഓരോ യാത്രികരും തിരിച്ചറിഞ്ഞു. നിലം തൊടാതെ ആകാശ ഗോളങ്ങൾ ക്കിടയിൽ പറന്നു നടക്കുന്നതിനിടയിലും സ്കൂൾ, കോളേജ് വിദ്യാർഥികളും, അധ്യാപകർ, പോലീസുകാർ, സാധാരണക്കാർ എന്നിങ്ങനെ സമൂഹത്തിന്റെ നാനാ തുറകളിൽ നിന്നുള്ളവർ പരസ്പരം പരിചയപ്പെട്ടു.

ഇടക്ക് ചായക്കും, ഊണിനും വിശ്രമത്തിനുമായി ശ്രീലകം അന്താരാഷ്ട്ര ബഹിരാകാശ നിലയവുമായി ഡോക്ക് ചെയ്‌തു എങ്കിലും 3 പേടകങ്ങളി ലായി എല്ലാവരും മിക്ക സമയവും ചന്ദ്രനിലോ, ചൊവ്വയിലോ വ്യാഴത്തിലോ, തിരുവാതിര( Betelgeuse), യിലോ ഒക്കെ ആയിരുന്നു. യാത്രയിലുട നീളം വിദഗ്ധർ തങ്ങളുടെ ബഹിരാകാശ യാത്രകളിലെ അറിവുകൾ പങ്കു വെച്ചു.

‘ നക്ഷത്ര ദൂരം അളക്കുന്നതെങ്ങനെ’, ‘ജ്യോതിഷവും ജ്യോതി ശാസ്ത്രവും’, ‘വാന നിരീക്ഷണ ആപ്പുകൾ/പ്രോഗ്രാമുകൾ ഉപയോഗിക്കേണ്ട വിധം’, ‘ടെലിസ്കോപ്പുകൾ എപ്പോൾ /എങ്ങനെ തിരഞ്ഞെടുക്കാം’, ‘അസ്ട്രോണമിയിലെ സിറ്റിസൺ സയൻസ്’, ‘അസ്ട്രോ ഫോട്ടോ ഗ്രാഫി’ എന്നിങ്ങനെ ഒട്ടേറെ വിലപ്പെട്ട അറിവുകൾ . വിശദമായ ചർച്ചയും…

അതിനിടയിൽ പേടകത്തിൽ കൊണ്ട് പോയ, എടുത്താൽ പൊങ്ങാത്ത ചോദ്യപ്പെട്ടി 😎 യിലെ നിസ്സാരമെന്ന് കരുതിയ ചോദ്യങ്ങൾ ഇഴ കീറി പരിശോധിച്ച് ഉത്തരങ്ങൾ വിക്ഷേപിച്ചു. സമയക്കുറവ് കൊണ്ട് എല്ലാ ചോദ്യ ഉപഗ്രഹങ്ങളും വിക്ഷേപിക്കാൻ കഴിഞ്ഞില്ല

വിശ്വാസത്തിന്റെയും അന്ധ വിശ്വാസത്തിന്റെയും ഇടയിൽ പെട്ട് ഉഴറുന്ന ഈ ശാസ്ത്ര വിഭാഗത്തെ ലളിതമായി യുക്തിപരമായി ജനങ്ങളിലേക്ക് എത്തിക്കാൻ ജീവിതം നീക്കി വെച്ച പ്രൊഫ. പാപ്പൂട്ടി മാഷ് ആകാശക്യാമ്പിൽ orion നക്ഷത്രഗണത്തെ പോലെ വഴികാട്ടി.

പാപ്പൂട്ടി മാഷും, ഷാജി മാഷും കർത്താ മാഷും ഒക്കെ പണ്ട് തെളിയിച്ച വിളക്കിൽ നിന്ന് ഒരായിരം ദീപങ്ങളായി എൻ സാനു, ഡോ..വി. എസ് ശ്യാം, നിജോ വർഗ്ഗീസ്, ജയകൃഷ്ണൻ, ബിനോയ്‌ പി ജോണി, ശ്രുതി.കെ. എസ്, ശരത് പ്രഭവ്, വിപിൻ, റിസ്വാൻ എന്നിവരെ പോലുള്ളവർ അടുത്ത തലമുറക്ക് വഴികാട്ടുന്ന നക്ഷത്രങ്ങളായി.

കോട്ടയം ആസ്ട്രോയിൽ നിന്നും എത്തിയ കൊച്ചു മിടുക്കി നയനയുടെ ലഘു അവതരണവും, ഏഴാംക്ലാസുകാരൻ ഭഗത്തിന്റെ ക്യാമ്പിനെ കുറിച്ചുള്ള സൂക്ഷ്മമായ വിശകലനവും, ടെലിസ്കോപ്പുകൾ നിർമ്മിക്കുന്നത് എങ്ങനെയെന്ന് ജ്യോതി ശാസ്ത്രതെരുവിൽ ഭംഗിയായി വിശദീകരിച്ചു കൊടുത്ത ( പേര് അറിയില്ല, ബിനോയ്‌ ജോണിയുടെ കൂടെ വന്ന കുട്ടിയാണ്) യും ഏവരുടെയും പ്രശംസ പിടിച്ചു പറ്റി

ക്യാമ്പിൽ ലഭിച്ച വെളിച്ചം വിവിധ ഇടങ്ങളിൽ വാന നിരീക്ഷണ പരിപാടികൾ സംഘടിപ്പിച്ച് കൂടുതൽ പേർക്ക് പകർന്നു കൊടുക്കും എന്ന ഉറപ്പ് നൽകിയതോടെ ആസ്ട്രോകേരള 2025 പേടകം സുരക്ഷിതമായി താഴെയിറങ്ങി… 🙏🏼

🌿🌿🌿🌿🌿🌿🌿

രാത്രിയിലെ വാന നിരീക്ഷണം മഴ വന്ന് കുളമാക്കിയത് മാത്രം കടുത്ത നിരാശ യുളവാക്കി. (രാഹുകാലം നോക്കാതെ തുടങ്ങിയത് കാരണമാണോ എന്തോ 😃 ) നിരാശയകറ്റിയത് ഗിറ്റാറിലും, വയലിനിലും ഗംഭീരമായ സംഗീതവിരുന്ന് തന്നെ നൽകിയ ടീം തൃശ്ശൂർ യുവസമിതിയാണ്.