Read Time:19 Minute

ഡോ.സുരേഷ് വി

ഗവ. വിക്ടോറിയ കോളേജ് പാലക്കാട്

ലൂക്ക എഡിറ്റോറിയൽ ബോർഡ് ആംഗം

വിഷുക്കാലം വന്നെത്തുമ്പോൾ മലയാളിയുടെ മനസ്സിലേക്ക് ആദ്യമെത്തുന്ന സുവർണ്ണദൃശ്യമാണ് കണിക്കൊന്ന പൂത്തുലഞ്ഞു നിൽക്കുന്നത്. തലമുറകളായി കൈമാറിവന്ന ഗൃഹാതുരമായ ഓർമ്മകളുടെയും ഐശ്വര്യത്തിൻ്റെയും പ്രതീകമാണത്. കടുംമഞ്ഞ നിറമുള്ള ഈ പൂക്കൾ പ്രകൃതിയുടെ ഒരു വിസ്മയം തന്നെയാണ്. കാസ്സിയ ഫിസ്റ്റുല (Cassia fistula) എന്ന് ശാസ്ത്രീയനാമമുള്ള ഈ മരം, പയർവർഗ്ഗത്തിൽപ്പെട്ട ലെഗുമിനോസെ (Leguminosae) കുടുംബത്തിലെ സീസാൽപിനിയേസി (Caesalpiniaceae) എന്ന ഉപകുടുംബത്തിലെ അംഗമാണ്. തെക്കുകിഴക്കൻ ഏഷ്യയിൽ ഉത്ഭവിച്ച ഈ ചെറുവൃക്ഷം, അതിൻ്റെ ആകർഷകമായ പൂക്കൾ കാരണം ലോകമെമ്പാടുമുള്ള ഉഷ്ണമേഖലാപ്രദേശങ്ങളിൽ ഒരു അലങ്കാരസസ്യമായി നട്ടുപിടിപ്പിക്കപ്പെട്ടു. വരണ്ട കാലാവസ്ഥയെ അതിജീവിക്കാനുള്ള കഴിവ് ഇതിൻ്റെ വ്യാപനത്തിനു സഹായകമായി. കേരളത്തിന്റെയും തായ്‌ലൻഡിന്റെയും ദേശീയപുഷ്പം കൂടിയാണ് കണിക്കൊന്ന. ‘രോഗസംഹാരി’ എന്ന് അർത്ഥം വരുന്ന ‘അരഗ്വത’ എന്ന് ആയുർവേദത്തിൽ അറിയപ്പെടുന്ന കണിക്കൊന്നയ്ക്ക് നിരവധി ഔഷധഗുണങ്ങളുമുണ്ട് .

കണിക്കൊന്നയുടെ സ്വാഭാവിക ജീവിതചക്രം

സാധാരണയായി, കേരളത്തിലെ വേനൽക്കാലം കടുക്കുന്ന മാർച്ച്, ഏപ്രിൽ, മെയ് മാസങ്ങളിലാണ് കണിക്കൊന്ന പൂവണിയുന്നത്. അന്തരീക്ഷതാപനില ഉയരുന്ന ഈ സമയത്ത്, മരം അതിൻ്റെ ഇലകൾ പൊഴിക്കുകയും ശിഖരങ്ങളിൽ നിറയെ സ്വർണ്ണ മഞ്ഞ നിറത്തിലുള്ള പൂക്കുലകൾ പ്രത്യക്ഷപ്പെടുകയും ചെയ്യും. കാഴ്ചയിൽ സ്വർണ്ണമഴ പെയ്യുന്നതുപോലെ തോന്നുന്നതുകൊണ്ടാണ് ഇതിന് ‘ഗോൾഡൻ ഷവർ’ (Golden Shower) എന്ന ഇംഗ്ലീഷ് പേര് ലഭിച്ചത്.

ഈ പൂവിടൽസമയം വെറുതെ സംഭവിക്കുന്ന ഒന്നല്ല. സസ്യങ്ങളുടെ ജീവിതത്തിലെ ഓരോ സംഭവവും – ഇല തളിർക്കുന്നതും പൂക്കുന്നതും കായ്ക്കുന്നതും ഇല പൊഴിക്കുന്നതുമെല്ലാം – കൃത്യമായ പാരിസ്ഥിതികഘടകങ്ങളാൽ നിയന്ത്രിക്കപ്പെടുന്ന ഒരു സമയക്രമം അനുസരിച്ചാണു നടക്കുന്നത്. ഇതിനെയാണു ‘ഫിനോളജി’ (Phenology) എന്നു പറയുന്നത്. താപനില, അന്തരീക്ഷ ആർദ്രത, പകലിൻ്റെ ദൈർഘ്യം, മഴയുടെ ലഭ്യത എന്നിവയെല്ലാം ഈ പ്രകൃതിയുടെ കലണ്ടറിനെ സ്വാധീനിക്കുന്ന ഘടകങ്ങളാണ്. കണിക്കൊന്നയുടെ കാര്യത്തിൽ, വർദ്ധിച്ചുവരുന്ന വേനൽച്ചൂടും വരണ്ട കാലാവസ്ഥയുമാണ് പൂവിടാനുള്ള പ്രധാനസൂചനകൾ. ഇങ്ങനെ ഒരേസമയം കൂട്ടമായി പൂക്കുന്നതുവഴി പരാഗണത്തിനു സഹായിക്കുന്ന തേനീച്ചകൾ (പ്രത്യേകിച്ച് കാർപെൻ്റർ ബീ – Xylocopa spp.), ശലഭങ്ങൾ തുടങ്ങിയ പ്രാണികളെ ധാരാളമായി ആകർഷിക്കാനും അതുവഴി വിജയകരമായി പരാഗണം നടത്തി ധാരാളം വിത്തുകൾ ഉത്പാദിപ്പിക്കാനും സാധിക്കുന്നു. ഇതിൻ്റെ കായയിലെ പൾപ്പ് ഭക്ഷിക്കുന്ന ചെറിയ മൃഗങ്ങളും പക്ഷികളും വിത്തുവിതരണത്തിനും സഹായിക്കുന്നു.

കാലാവസ്ഥാവ്യതിയാനം താളം തെറ്റിക്കുമ്പോൾ

എന്നാൽ, ആഗോളതാപനവും കാലാവസ്ഥാവ്യതിയാനവും പ്രകൃതിയുടെ ഈ സ്വാഭാവികതാളത്തെയും സമയക്രമത്തെയും സാരമായി ബാധിച്ചിരിക്കുന്നു. ഫോസിൽ ഇന്ധനങ്ങളുടെ ജ്വലനം, വനനശീകരണം, വ്യവസായവൽക്കരണം എന്നിവയെല്ലാം അന്തരീക്ഷത്തിലെ കാർബൺ ഡൈ ഓക്സൈഡ് പോലുള്ള ഹരിതഗൃഹവാതകങ്ങളുടെ അളവു വർദ്ധിപ്പിക്കുകയും അതു ഭൂമിയുടെ ശരാശരിതാപനില ഉയർത്തുകയും ചെയ്യുന്നു. ഇത് ഋതുക്കൾ മാറിമറിയുന്നതിനും മഴയുടെ ലഭ്യതയിലും തീവ്രതയിലും മാറ്റങ്ങൾ വരുന്നതിനും ചൂടും തണുപ്പും ക്രമം തെറ്റുന്നതിനും കാരണമാകുന്നു.

ഈ മാറ്റങ്ങൾ കണിക്കൊന്നപോലുള്ള സസ്യങ്ങൾക്കു കാലഗണന തെറ്റാൻ ഇടയാക്കുന്നുണ്ട് . പൂവിടാൻ ആവശ്യമായ പാരിസ്ഥിതികസൂചനകൾ (Environmental cues) അവ പ്രതീക്ഷിക്കുന്ന സമയത്തിനു മുൻപേയോ ശേഷമോ എത്തുമ്പോൾ, സസ്യങ്ങളുടെ ആന്തരിക ജൈവഘടികാരം ആശയക്കുഴപ്പത്തിലാവുകയും അവയുടെ സ്വാഭാവികഫിനോളജിയിൽ മാറ്റങ്ങൾ സംഭവിക്കുകയും ചെയ്യുന്നു. ഇതിൻ്റെ ഫലമായാണ് വിഷുക്കാലത്തിന് മാസങ്ങൾക്ക് മുൻപേ, ചിലപ്പോൾ ഡിസംബർ, ജനുവരി മാസങ്ങളിൽ പോലും, കണിക്കൊന്നകൾ പൂത്തുലഞ്ഞുനിൽക്കുന്ന അസാധാരണ കാഴ്ചകൾ നാം ഇപ്പോൾ കൂടുതലായി കാണുന്നത്. ഈ നിരീക്ഷണങ്ങളെ സാധൂകരിക്കുന്ന നിരവധി ശാസ്ത്രീയ പഠനങ്ങൾ പുറത്തുവന്നിട്ടുണ്ട്.

ഇന്ത്യയിലെ പഠനം (ആഗ്ര)

1965 മുതൽ 2019 വരെയുള്ള 50 വർഷക്കാലയളവിൽ ഉത്തരേന്ത്യൻ നഗരമായ ആഗ്രയിലെ കണിക്കൊന്നമരങ്ങളെ നിരീക്ഷിച്ച ഒരു പഠനം (Chauhan & Chauhan, 2020) വളരെ വ്യക്തമായ മാറ്റങ്ങളാണു രേഖപ്പെടുത്തിയത്. 1965-2000 കാലഘട്ടത്തിൽ, ഇല പൊഴിയുന്നത് ഫെബ്രുവരി രണ്ടാംവാരത്തിൽ ആരംഭിച്ച് മാർച്ച് ആദ്യവാരം മരം പൂർണ്ണമായും ഇലയില്ലാത്ത അവസ്ഥയിലെത്തുകയും തുടർന്ന് മാർച്ച് രണ്ടാംവാരത്തോടെ പൂക്കൾ വിരിഞ്ഞുതുടങ്ങി ജൂൺ രണ്ടാം വാരത്തോടെ പൂക്കാലം അവസാനിക്കുകയും ചെയ്തിരുന്നു. എന്നാൽ 2001-ന് ശേഷം ഈ സമയക്രമത്തിൽ ക്രമേണ മാറ്റം വന്നുതുടങ്ങി. 2009-2019 ആയപ്പോഴേക്കും ഇല പൊഴിയുന്നത് മാർച്ച് ആദ്യവാരത്തിലേക്കും പൂക്കാലം ഏപ്രിൽ ആദ്യവാരം തുടങ്ങി ജൂലൈ അവസാനം വരെയും ചിലപ്പോൾ ഓഗസ്റ്റ് രണ്ടാം വാരം വരെയും നീണ്ടുനിൽക്കുന്നതായും മാറി. ഈ കാലയളവിൽ ആഗ്രയിലെ ശരാശരി വാർഷികതാപനിലയിൽ ഏകദേശം 0.75 മുതൽ 1.0 വരെ ഡിഗ്രി സെൽഷ്യസ് വർദ്ധന രേഖപ്പെടുത്തിയിട്ടുണ്ട്. ഈ വർദ്ധിച്ച താപനിലയാണ് കണിക്കൊന്നയുടെ ഫിനോളജിയിലുണ്ടായ മാറ്റത്തിനു കാരണമെന്ന് പഠനം ഉറപ്പിച്ചു പറയുന്നു. സമാനമായ മാറ്റങ്ങൾ ഇന്ത്യയിലെ മറ്റ് നഗരങ്ങളായ ഗ്വാളിയോർ, ജയ്പൂർ എന്നിവിടങ്ങളിലും ഗവേഷകർ നിരീക്ഷിച്ചിട്ടുണ്ട്.

നൈജീരിയയിലെ പഠനം

പടിഞ്ഞാറൻ ആഫ്രിക്കൻ രാജ്യമായ നൈജീരിയയിൽ നടത്തിയ മറ്റൊരു പഠനം (Okusanya et al., 2016) താപനിലയും മഴയുമാണ് അവിടുത്തെ കണിക്കൊന്നയുടെ പൂക്കാലത്തെ പ്രധാനമായും നിയന്ത്രിക്കുന്നതെന്നു കണ്ടെത്തി. താപനില കുറയുന്നത് (ജൂലൈ-ഓഗസ്റ്റ് മാസങ്ങളിൽ) പൂവിടാൻ തുടങ്ങുന്നതിന് ഒരു സൂചനയായി വർത്തിക്കുമ്പോൾ, വരണ്ട കാലാവസ്ഥയിലെ ഉയർന്ന താപനില (നവംബർ-ഏപ്രിൽ) പൂക്കളുടെ എണ്ണം കൂടാൻ സഹായിക്കുന്നു. എന്നാൽ, കനത്ത മഴയും കൊടുങ്കാറ്റും പൂക്കളെ നശിപ്പിക്കുന്നതിനാൽ, മഴ കൂടുന്നതോടെ പൂക്കാലം അവസാനിക്കുന്നതായും നിരീക്ഷിച്ചു. ഇന്ത്യയിൽ വർഷത്തിലൊരിക്കൽ ഏതാനും മാസങ്ങൾ മാത്രം പൂക്കുന്നതിൽനിന്നു വ്യത്യസ്തമായി, നൈജീരിയയിലെ പ്രത്യേക കാലാവസ്ഥാസാഹചര്യങ്ങളിൽ (ചൂടും മഴയും മാറിമാറി വരുന്നതും എന്നാൽ അതിതീവ്രമല്ലാത്തതും) കണിക്കൊന്നയുടെ പൂക്കാലം ഓഗസ്റ്റിൽ തുടങ്ങി അടുത്ത ജൂൺ/ജൂലൈ വരെ നീണ്ടുനിൽക്കുകയും ഒരു വർഷത്തെ പൂക്കാലം അവസാനിക്കുന്നതിനു തൊട്ടുമുൻപ് അടുത്ത വർഷത്തെ പൂവിടൽ ആരംഭിക്കുകയും ചെയ്യുന്നതിനാൽ ഫലത്തിൽ വർഷം മുഴുവൻ പൂക്കൾ ഉണ്ടാകുന്ന അവസ്ഥയിലേക്കു മാറിയതായും പഠനം രേഖപ്പെടുത്തുന്നു. ഒരു പുതിയ കാലാവസ്ഥയോട് ഇണങ്ങിച്ചേരാനുള്ള കണിക്കൊന്നയുടെ ഈ കഴിവിനെ ‘ഫ്ലവറിങ് പ്ലാസ്റ്റിസിറ്റി’ (Flowering plasticity) എന്നു വിശേഷിപ്പിക്കാം.

പാരിസ്ഥിതികപ്രത്യാഘാതങ്ങൾ: കേവലം കാഴ്ചയുടെ മാറ്റത്തിനപ്പുറം

കണിക്കൊന്നയുടെ പൂക്കാലം മാറുന്നത് കേവലം ഒരു കലണ്ടർ മാറ്റമോ കാഴ്ചയുടെ കൗതുകമോ മാത്രമല്ല. ഇത് ദൂരവ്യാപകമായ പാരിസ്ഥിതികപ്രത്യാഘാതങ്ങൾ ഉണ്ടാക്കാൻ സാധ്യതയുണ്ട്.

പരാഗണത്തിലെ പ്രശ്നങ്ങൾ

സസ്യങ്ങളും അവയെ ആശ്രയിക്കുന്ന പരാഗണസഹായികളായ പ്രാണികളും തമ്മിൽ ദശലക്ഷക്കണക്കിനു വർഷങ്ങളിലൂടെ രൂപപ്പെട്ടുവന്ന ഒരു താളമുണ്ട്. പൂക്കൾ വിരിയുന്ന സമയത്തുതന്നെ പ്രാണികൾ സജീവമാകുകയും ഭക്ഷണം തേടിയെത്തുകയും ചെയ്യുമ്പോളാണ് പരാഗണം വിജയകരമാകുന്നത്. പൂക്കാലം നേരത്തെയോ വൈകിയോ ആകുന്നത് ഈ താളം തെറ്റിക്കാം. പരാഗണസഹായികൾ സജീവമാകുന്നതിനു മുൻപേ പൂക്കൾ വിരിയുകയോ അവ സജീവമാകുമ്പോഴേക്കും പൂക്കൾ കൊഴിഞ്ഞുപോകുകയോ ചെയ്താൽ അത് പരാഗണത്തെയും അതുവഴി വിത്തുൽപ്പാദനത്തെയും സാരമായി ബാധിക്കാം. (നൈജീരിയയിലെ പഠനം തുടർച്ചയായ പൂക്കാലം പരാഗണസാധ്യത വർദ്ധിപ്പിക്കുമെന്നു പറയുമ്പോഴും ലോകമെമ്പാടുമുള്ള പൊതുവായ ആശങ്ക സമയക്രമം തെറ്റുന്നത് പ്രശ്നമാകാം എന്നതാണ് ).

വിത്തുവിതരണത്തിലെ മാറ്റങ്ങൾ

പൂക്കാലം മാറുന്നത് കായ്ക്കുന്ന സമയത്തെയും ബാധിക്കും. ഇത് കായ ഭക്ഷിക്കുകയും വിത്തുകൾ വിതരണം ചെയ്യുകയും ചെയ്യുന്ന മൃഗങ്ങളെയും പക്ഷികളെയും ആശ്രയിച്ചുള്ള വിത്തുവിതരണപ്രക്രിയയെ തടസ്സപ്പെടുത്തിയേക്കാം. കണിക്കൊന്നയെ ഭക്ഷണത്തിനോ വാസസ്ഥലത്തിനോ ആശ്രയിക്കുന്ന മറ്റു ജീവികളുടെ ജീവിതചക്രത്തെയും ഈ മാറ്റങ്ങൾ ബാധിക്കാം. ഉദാഹരണത്തിന്, കണിക്കൊന്നയുടെ ഇല ഭക്ഷിക്കുന്ന കാലികൾക്ക് അല്ലെങ്കിൽ അതിൽ കൂടുകൂട്ടുന്ന പക്ഷികൾക്ക് അവയുടെ സമയക്രമത്തിൽ മാറ്റം വരുത്തേണ്ടി വന്നേക്കാം. ഒരു ജീവിയുടെ ഫിനോളജിയിലുണ്ടാകുന്ന മാറ്റം ഭക്ഷ്യശൃംഖലയിലെ മറ്റ് കണ്ണികളെയും ബാധിക്കുകയും കാലക്രമേണ ഇത് ജൈവവൈവിധ്യശോഷണത്തിലേക്കു നയിക്കുകയും ചെയ്യും

കണിക്കൊന്ന നൽകുന്ന മുന്നറിയിപ്പ്

നമ്മുടെയെല്ലാം പ്രിയപ്പെട്ട, കേരളത്തിന്റെ സാംസ്കാരിക ബിംബമായ കണിക്കൊന്നയുടെ താളം തെറ്റുന്ന പൂക്കാലം, കാലാവസ്ഥാവ്യതിയാനം എന്ന ആഗോളപ്രതിഭാസം നമ്മുടെ തൊട്ടുമുൻപിൽ എത്തിനിൽക്കുന്നു എന്നതിൻ്റെ വ്യക്തമായ, എന്നാൽ ആശങ്കാജനകമായ സൂചനയാണ്. പ്രകൃതിയിലെ ഓരോ മാറ്റവും പരസ്പരം ബന്ധപ്പെട്ടിരിക്കുന്നു എന്നും മനുഷ്യരുടെ പ്രവൃത്തികൾക്കു പ്രകൃതിയുടെ സന്തുലിതാവസ്ഥയെ തകിടം മറിക്കാൻ ശേഷിയുണ്ടെന്നും ഇതു നമ്മെ ഓർമ്മിപ്പിക്കുന്നു.

കഠിനമായ സാഹചര്യങ്ങളെപ്പോലും അതിജീവിക്കാൻ കഴിവുള്ള കണിക്കൊന്ന, മാറുന്ന കാലാവസ്ഥയോടും പൊരുത്തപ്പെട്ട് ഇനിയും നമ്മുടെ വിഷുവാഘോഷത്തിനു സുവർണ്ണശോഭ പകരുമെന്ന് നമുക്കു പ്രത്യാശിക്കാം. എന്നാൽ ഈ പ്രത്യാശ നിലനിൽക്കണമെങ്കിൽ, പ്രകൃതിയുടെ താളം ഇനിയും തെറ്റാതിരിക്കാൻ, നമ്മുടെ ഭൂമിയെ സംരക്ഷിക്കാൻ ആഗോളതാപനത്തിനും കാലാവസ്ഥാവ്യതിയാനത്തിനും കാരണമാകുന്ന പ്രവർത്തനങ്ങൾ നിയന്ത്രിക്കേണ്ടത് അത്യാവശ്യമാണ്. കണിക്കൊന്ന നൽകുന്ന ഈ മഞ്ഞക്കാർഡ് ഒരു മുന്നറിയിപ്പായി കണ്ട് പ്രകൃതി സംരക്ഷണത്തിനായി നമുക്കോരോരുത്തർക്കും പ്രവർത്തിക്കാം.

References

Okusanya, O. T., et al. “Variation in flowering phenology of Cassia fistula Linn. population in Ota, Ogun state, Nigeria.” Ife Journal of Science 18.4 (2016): 887-894. >>>
Chauhan, Shyam Vir Singh, and Seema Chauhan. “Climate changes and trends in phenology of Cassia fistula L. in Agra (India)—1965-2019.” Journal of Native and Alien Plant Studies 16 (2020): 23-31. >>>