എന്താണ് ആക്സിയോം 4 ?

Read Time:6 Minute

അനുരാഗ് എസ്.

Space science communicator

M Tech,

Thermal Engineering NITK

ആക്സിയോം 4 എന്നത് അമേരിക്കൻ സ്വകാര്യ ബഹിരാകാശ കമ്പനിയായ ആക്സിയോം സ്പേസ്, സ്പേസ് എക്സ്, നാസ എന്നിവരുടെ സഹകരണത്തോടു കൂടി നടത്തിയ ഒരു അന്താരാഷ്ട്ര ബഹിരാകാശ നിലയത്തിലേക്കുള്ള ഒരു മിഷനാണ്. സ്പേസ് എക്സിന്റെ ക്രൂ ഡ്രാഗൺ ‘ഗ്രേസ്’ എന്ന പേടകവും ഫാൽക്കൺ 9 റോക്കറ്റും ആണ് ഈ മിഷനായി ഉപയോഗപ്പെടുത്തിയത്. സാങ്കേതിക പ്രശ്നങ്ങൾ കാരണം ഒരുപാട് മാറ്റിവെക്കലുകൾക്ക് ഒടുവിൽ 2025 ജൂൺ 25ന് വിജയകരമായി ഇത് വിക്ഷേപ്പിക്കപ്പെട്ടു.

മുൻ നാസ ബഹിരാകാശയാത്രികയുമായ കമാൻഡർ പെഗ്ഗി വിറ്റ്‌സൺ, ഇന്ത്യൻ എയർഫോഴ്സിന്റെ പൈലറ്റ് ശുഭാൻഷു ശുക്ല, മിഷൻ സ്‌പെഷ്യലിസ്റ്റുകളായ പോളണ്ടിൽ നിന്നുള്ള യൂറോപ്യൻ സ്പേസ് ഏജൻസിയുടെ അസ്‌ട്രോനോട്ട് സ്ലാവോസ് ഉസ്‌നാൻസ്‌കി-വിസ്‌നിയേവ്‌സ്‌കി, ഹംഗേറിയൻ സ്പേസ് ഓഫീസിനെ പ്രതിനിധീകരിക്കുന്ന ടിബോർ കാപു എന്നിവർ ഉൾപ്പെടുന്നതാണ് നാല് പേരടങ്ങുന്ന സംഘം. ഏകദേശം 14 ദിവസം ആണിവർ ISSൽ ചിലവഴിക്കുക. പൈലറ്റ് ശുഭാൻഷു ശുക്ല ഗഗൻയാൻ മിഷന് തയ്യാറെടുത്തിരിക്കുന്ന നാല് വ്യമനോട്ടുകളിൽ ഒരാളാണ്.

അന്താരാഷ്ട്ര ബഹിരാകാശ നിലയത്തിലേക്ക് ഒരുപാട് മനുഷ്യർ പോയിട്ടുണ്ടെങ്കിലും എന്ത്കൊണ്ട് ആക്സിയോം 4 ചർച്ച ചെയ്യപ്പെടുന്നു?

ഏകദേശം നാൽപതിലതികം വർഷങ്ങൾക്ക് ശേഷമാണ് ഇന്ത്യ, ഹംഗറി, പോളണ്ട് എന്നി രാജ്യങ്ങളിലെ പൗരന്മാർ ബഹിരാകാശത്തേക്ക് ഗവൺമെന്റ് ഫണ്ടഡ് ആയി പോകുന്നത്. മൂന്ന് രാജ്യങ്ങളുടെയും അന്താരാഷ്ട്ര ബഹിരാകാശ നിലയത്തിലേക്കുള്ള ആദ്യ ദൗത്യം കൂടിയാണിത്. ഈ രാജ്യങ്ങളിലെയും പൗരന്മാർ സോവിയറ്റ് ഇന്റർകോസ്മോസ് മിഷന്റെ ഭാഗമായാണ് ഇതിനു മുൻപ് ബഹിരാകാശയാത്ര നടത്തിയത്. മിഷന്റെ ഭാഗമായി സല്യൂട്ട് 6 അല്ലെങ്കിൽ 7 ബഹിരാകാശനിലയത്തിലേക്ക് പോയിട്ടുണ്ട്..

1984 ൽ സോയുസ് ടി 11 ലാണ് ആദ്യ ഇന്ത്യകാരൻ, വിങ് കമാൻഡർ രാകേഷ് ശർമ്മ ബഹിരാകാശയാത്ര നടത്തിയത്. അതിന് ശേഷം കല്പന ചൗള, സുനിത വില്യംസ് എന്നീ ഇന്ത്യൻ വംശജരായ അമേരിക്കൻ പൗരന്മാർ ബഹിരാകാശ യാത്ര നടത്തിയിട്ടുണ്ട്.

പരീക്ഷണങ്ങൾ

ഇസ്രോ(ISRO)യുടെ നേതൃത്വത്തിൽ ഏതാനും പരീക്ഷണങ്ങൾ മിഷന്റെ ഭാഗമായി ISSൽ നടത്തുവാൻ തീരുമാനിച്ചിട്ടുണ്ട്.

സ്പേസ് മൈക്രോആൽഗകൾ (ICGEB & NIPGR) – ഭക്ഷ്യയോഗ്യമായ സൂക്ഷ്മ ആൽഗകളെ മൈക്രോഗ്രാവിറ്റിയും വികിരണവും എങ്ങനെ ബാധിക്കുന്നു എന്ന് പഠിക്കുന്നു.
മയോജെനിസിസ് (InStem) – മൈക്രോഗ്രാവിറ്റിയിൽ പേശികളുടെ പുനരുജ്ജീവനത്തെ ഉപാപചയ സപ്ലിമെന്റുകൾ എങ്ങനെ സ്വാധീനിക്കുന്നു എന്ന് പഠിക്കുന്നു.
മുളകൾ (UAS ധാർവാഡ് & IIT ധാർവാഡ്) – ബഹിരാകാശത്ത് സാലഡ് വിത്തുകൾ മുളയ്ക്കുന്നതും ബഹിരാകാശയാത്രിക പോഷകാഹാരത്തിൽ അവയുടെ പ്രസക്തിയും പഠനവിധേയമാക്കുന്നു.
വോയേജർ ടാർഡിഗ്രേഡ് (IISc) – ബഹിരാകാശത്ത് ഒരു ടാർഡിഗ്രേഡ് സ്പീഷിസിന്റെ അതിജീവനം, പുനരുൽപാദനം, ജീൻ എക്സ്പ്രഷൻ എന്നിവ പരിശോധിക്കുന്നു.
വോയേജർ ഡിസ്പ്ലേകൾ (IISc) – മൈക്രോഗ്രാവിറ്റിയിലെ ഇലക്ട്രോണിക് ഡിസ്പ്ലേകളുമായുള്ള മനുഷ്യന്റെ ഇടപെടൽ വിലയിരുത്തുന്നു.
മൈക്രോഗ്രാവിറ്റിയിലെ സയനോബാക്ടീരിയ (ICGEB) – ബഹിരാകാശ സാഹചര്യങ്ങളിൽ യൂറിയയും നൈട്രേറ്റും ഉപയോഗിച്ച് സയനോബാക്ടീരിയയിലെ വളർച്ചയും പ്രോട്ടീൻ എക്സ്പ്രഷനും താരതമ്യം ചെയ്യുന്നു.
ഭക്ഷ്യവിള വിത്തുകൾ മൈക്രോഗ്രാവിറ്റിയിൽ (ഐഐഎസ്ടി & കേരള കാർഷിക സർവകലാശാല) – ഭക്ഷ്യവിളകളുടെ വളർച്ചയിലും വിളവിലും ബഹിരാകാശ പരിസ്ഥിതിയുടെ സ്വാധീനം പഠിക്കുന്നു.