വലിയ പേക്കുയിൽ

കുയിൽ വർഗ്ഗത്തിൽപ്പെട്ട ദേശാടകരായ മറ്റൊരു പക്ഷിയാണ് വലിയ പേക്കുയിൽ. നമ്മുടെ നാട്ടിൽ സാധാരണയായി കാണപ്പെടുന്ന പേക്കുയിലിനെക്കാളും (Common Hawk Cuckoo) ശരീര വലിപ്പം കൂടിയവർ ആണ് വലിയ പേക്കുയിൽ. വലിയ പേക്കുയിലിന്‌ തവിട്ടു നിറത്തിൽ ഉള്ള മേൽമുതുകും , ചാര നിറത്തിൽ ഉള്ള തലയും, കറുത്ത താടിയും, ചെമ്പൻ നിറത്തിൽ ഉള്ള മാറിടവും, വെള്ള നിറത്തിൽ ഉള്ള വയറും അടിഭാഗവും അതിൽ കുറുകെ കടുത്ത തവിട്ടു നിറത്തിൽ ഉള്ള വരകളും ഉണ്ടാകും. നീണ്ട വാലിൽ ഇരുണ്ട തവിട്ടു നിറത്തിൽ വീതിയേറിയ പട്ടകളും അറ്റത്തു വെള്ളനിറത്തിൽ കരകളും കാണും. ഇരുണ്ട തവിട്ടു നിറത്തിൽ ഉള്ള കണ്ണുകളും കണ്ണിനു ചുറ്റും മഞ്ഞ നിറത്തിലുള്ള ഒരു വളയവും ഉണ്ടാകും. കൊക്കിന് ഇരുണ്ട നിറമാണ്. കൊക്കിന്റെ തുടക്കത്തിൽ ഒരു മഞ്ഞ പട്ടയും ഉണ്ടാകും. കാലുകൾക്ക് മഞ്ഞ നിറമാണ്. പ്രായപൂർത്തി ആകാത്ത വലിയ പേക്കുയിലിന്റെ  തൊണ്ട, മാറിടം, അടിഭാഗം എന്നിവ വെള്ള നിറത്തിലും അതിൽ ചാര നിറത്തിൽ അപൂർണ്ണമായ വരകളും ഉണ്ടാകും.