വളർത്തുമൃഗങ്ങളുടെ ജനിതകവൈവിധ്യം കേരളത്തിൽ- നമ്മുടെ തനത്  ജനുസ്സുകളെ അടുത്തറിയാം

ജൈവവൈവിധ്യത്തിന്റെ കാര്യത്തിൽ മെഗാഡൈവേഴ്‌സിറ്റി എന്ന് ലോകം വിശേഷിപ്പിക്കുന്ന ഇരുപത് രാഷ്ട്രങ്ങളിൽ ഒന്നാണ് നമ്മുടെ ഇന്ത്യ. ഭൂമിയിലെ ജൈവവൈവിധ്യത്തിന്റെ വലിയ ഒരു ഭാഗം ഉൾക്കൊള്ളുന്നതും ഒരു ഭൂമേഖലയിൽ മാത്രം കാണപ്പെടുന്നതും എൻഡെമിക് ആയി കണക്കാക്കുന്നതുമായ ജീവജാലങ്ങളുടെ എണ്ണം ഏറെയുള്ളതുമായ രാജ്യങ്ങളെയാണ് മഹാജൈവവൈവിധ്യമുള്ള പ്രദേശങ്ങളായി പരിഗണിക്കുന്നത്. വന്യജീവികളുടെയും പക്ഷികളുടെയും സസ്യജാലങ്ങളുടേയും ജലജീവികളുടെയും ഉഭയജീവികളുടേയും നമ്മുടെ ശാസ്ത്രാന്വേഷണങ്ങൾക്ക് ഇതുവരെ കണ്ടെത്താൻ കഴിഞ്ഞിട്ടില്ലാത്തതുമായ മറ്റനേകം രഹസ്യജീവജാലങ്ങളുടെയും വൈവിധ്യത്തിൽ  മാത്രമല്ല, ഉപജീവനോപാധിക്കായി പരിപാലിക്കുന്ന വളർത്തുമൃഗങ്ങളുടെ വൈവിധ്യത്തിലും നമ്മുടെ രാജ്യത്തിന്റെ സ്ഥാനം ലോകരാഷ്ട്രങ്ങൾക്കിടയിൽ  മുൻനിരയിലാണ്.

വെച്ചൂർ പശു – കാഴ്ചയിൽ ചെറുതെങ്കിലും കേരളത്തിന്റെ തലപ്പൊക്കം

വംശനാശത്തിന്‍റെ വക്കില്‍ നിന്നും കണ്ടെടുത്തതും പരിരക്ഷിച്ച് പരിപാലിച്ച് വളര്‍ത്തി വംശവര്‍ദ്ധനവ് നടത്തി സംരക്ഷിച്ചെടുത്തതുമായ കേരളത്തിന്‍റെ തനത് ജനുസ്സ് പശുക്കളാണ് വെച്ചൂര്‍ പശുക്കള്‍. തൃശൂർ വെറ്ററിനറി കോളേജിൽ ജനിതകശാസ്ത്രം അധ്യാപികയായിരുന്ന ഡോ.ശോശാമ്മ ഐപ്പിന്റെയും വിദ്യാർത്ഥികളുടെയും നേതൃത്വത്തിൽ 1989 -ൽ ആരംഭിച്ച വെച്ചൂർ പരിരക്ഷണപദ്ധതി ഇന്ന് അഭിമാനകരമായ മൂന്ന് പതിറ്റാണ്ടുകൾ പിന്നിടുമ്പോൾ വെച്ചൂർ പശുവിന്‍റെ പേരും പെരുമയും ലോകത്തോളം വളര്‍ന്നുകഴിഞ്ഞു. മണ്ണുത്തി വെറ്ററിനറി കോളേജിൽ വിപുലമായ രീതിയിൽ വെച്ചൂർ പശുക്കൾക്ക് വേണ്ടിയുള്ള പരിരക്ഷണകേന്ദ്രം പ്രവർത്തിക്കുന്നുണ്ട്. കേവലം എട്ട് പശുക്കളിൽ നിന്നും ആരംഭിച്ച ഈ കേന്ദ്രത്തിൽ ശാസ്ത്രീയ പ്രജനനപ്രവർത്തനങ്ങളുടെ ഫലമായി 120 -ൽ അധികം വെച്ചൂർ ജനുസ്സിൽ പെട്ട കന്നുകാലികളെ  ഇപ്പോൾ സംരക്ഷിക്കുന്നുണ്ട്. സംരക്ഷണത്തോടൊപ്പം തന്നെ വെച്ചൂർ പശുവുമായി ബന്ധപ്പെട്ട ഗവേഷണങ്ങളും ഈ കേന്ദ്രത്തിൽ നടന്നു വരുന്നു.  മണ്ണുത്തിയിലെ കേന്ദ്രം കൂടാതെ  വെറ്ററിനറി സർവ്വകലാശാലയുടെ തൃശ്ശൂർ തുമ്പൂർമുഴി കേന്ദ്രത്തിലും പാലക്കാട് തിരുവാഴംകുന്ന് കേന്ദ്രത്തിലും വയനാട് പൂക്കോട് കേന്ദ്രത്തിലും വെച്ചൂർ പരിരക്ഷണത്തിനായി ഫാമുകൾ പ്രവർത്തിക്കുന്നുണ്ട്. വെച്ചൂർ പശുക്കളെ ഒരു അമൂല്യനിധി പോലെ കരുതി പരിപാലിക്കുന്ന അനേകം കർഷകരും ഇന്ന് സംസ്ഥാനത്തുണ്ട്.

പേരുകൊണ്ടും പെരുമകൊണ്ടും ഏറെ ഉന്നതിയിലാണെങ്കിലും മൂന്നടി അഥവാ തൊണ്ണൂറ് സെന്റിമീറ്ററിൽ ചുവടെ മാത്രമാണ് വെച്ചൂർ പശുക്കളുടെ ഉയരം. വെച്ചൂർ കാളകൾക്ക് 90 – 100 സെന്റിമീറ്റർ വരെ ഉയരമുണ്ടാവും. 101 – 103 സെന്റിമീറ്റർ വരെയാണ്  ആകെ നീളം. പരമാവധി 150 – 180 കിലോഗ്രാം വരെയാണ് പശുക്കളുടെ ശരീരതൂക്കം. പിറന്നുവീഴുന്ന കിടാക്കളുടെ ജനനത്തൂക്കം 10 കിലോഗ്രാമോളം മാത്രമായിരിക്കും. വെളുപ്പ് ,കറുപ്പ്, ചന്ദന വെളുപ്പ് ,ചുവപ്പ്, ഇളം ചുവപ്പ് കലർന്ന തവിട്ട്, തവിട്ട് കലർന്ന കറുപ്പ് എന്നീ  നിറങ്ങളിലാണ് പ്രധാനമായും പശുക്കള്‍ കാണപ്പെടുന്നത്. ഒറ്റ നിറമുള്ള മേനിയിൽ മറ്റ് പുള്ളികളോ പാണ്ടുകളോ ഉണ്ടാവില്ല. കഴുത്തില്‍ നന്നായി ഇറങ്ങി വളര്‍ന്ന താടയും,ചെറുതും മുന്നോട്ട് ചാഞ്ഞ് നില്‍ക്കുന്നതുമായ  മുതുകിലെ പൂഞ്ഞയും, മുന്നോട്ട്  വളര്‍ന്ന്  വളഞ്ഞ ചെറിയ കൊമ്പുകളും,  നിലത്തറ്റം മുട്ടുന്ന വാലുകളും ചെറിയ മിനുമിനുത്ത രോമങ്ങളും ഉരുണ്ട അഗ്രത്തോടുകൂടിയ ചെറിയ മുലക്കാമ്പുകളുമെല്ലാം വെച്ചൂർ പശുവിന്‍റെ കുഞ്ഞൻ മേനിക്ക് മാറ്റ് കൂട്ടും. മൂന്ന് വയസ്സിനുള്ളിൽ ആദ്യ പ്രസവം നടക്കും. ദിവസം  മുതല്‍ പരമാവധി  2 – 2 .5  ലിറ്റര്‍ വരെ നല്ല കൊഴുപ്പുള്ള പാല്‍ ലഭിയ്ക്കും. കറവക്കാലം 6 – 6. 5 മാസം വരെ നീണ്ടുനിൽക്കും. വെച്ചൂർ പശുവിന്റെ പാൽ മാത്രമല്ല മൂത്രവും ചാണകവുമെല്ലാം വിപണിയിൽ ആവശ്യക്കാർ ഏറെയുള്ള ഉൽപ്പന്നങ്ങൾ തന്നെ. ഒരു പ്രസവം കഴിഞ്ഞ് രണ്ടര മാസം പിന്നിടുമ്പോള്‍ തന്നെ പശുക്കള്‍ വീണ്ടും മദിലക്ഷണങ്ങള്‍ കാണിച്ചു തുടങ്ങും. പ്രസവാനന്തരം മൂന്ന് മാസമെത്തുമ്പോള്‍ ഇണ ചേര്‍ക്കാം. സാംക്രമികരോഗാണുക്കള്‍ മൂലമുണ്ടാവുന്ന രോഗങ്ങള്‍ പിടിപെടുന്നതും അപൂര്‍വ്വം. മറ്റ് സങ്കരയിനം, വിദേശ ഇനം പശുക്കളെ അപേക്ഷിച്ച്   വെച്ചൂർ പശുക്കൾക്കുള്ള കാലാവസ്ഥാതിജീവനശേഷിയും എടുത്തുപറയേണ്ട മികവ് തന്നെ.

2001-ൽ ആണ് വെച്ചൂർ പശുക്കളെ തേടി ബ്രീഡ് പദവിയെത്തുന്നത്. ലോക ഭക്ഷ്യ കാർഷിക സംഘടന ( Food and agriculture organization ) 2012 – ൽ പ്രത്യേക പരിരക്ഷണം അനിവാര്യമായ വളർത്തുമൃഗങ്ങളുടെ ജനിതകവൈവിധ്യ രേഖയിൽ വെച്ചൂർ പശുക്കളെ ഉൾപ്പെടുത്തി. ഉയരക്കുറവിന്റെ പേരിൽ വെച്ചൂർ പശുക്കളുടെ തലപ്പൊക്കം ഗിന്നസ് ബുക്കോളം ഉയർന്നു. വെച്ചൂര്‍ പശുക്കളുടെ വംശവര്‍ദ്ധനവിന്  കൃത്രിമ ബീജാദാനമടക്കമുള്ള സേവനങ്ങള്‍ ഇന്ന്  സര്‍ക്കാര്‍ തലത്തില്‍ ലഭ്യമാണ്. കേരള ലൈവ്സ്റ്റോക്ക് ഡെവലപ്മെന്റ് ബോർഡ് സംസ്ഥാനത്തെ മൃഗാശുപത്രികൾ വഴിയാണ് വെച്ചൂർ പശുക്കളുടെ ബീജം ലഭ്യമാക്കുന്നത്. വെച്ചൂര്‍ പശുക്കളുടെ വംശശുദ്ധി ഉറപ്പ് വരുത്തുന്നതിനും സംരക്ഷണ ശ്രമങ്ങള്‍ക്ക് ചുക്കാന്‍ പിടിക്കുന്നതിനുമായി വെച്ചൂര്‍ കണ്‍സര്‍വേഷൻ  ട്രസ്റ്റ് ഇന്ന്‌  സജീവമായി രംഗത്തുണ്ട്.

അട്ടപ്പാടി കരിയാടുകൾ അജലോകത്തെ കറുത്തമുത്ത്

പാലക്കാട് ജില്ലയുടെ വടക്ക് കിഴക്ക് മേഖലയിൽ  നീലഗിരി കുന്നുകളുടെ തായ്‌വരയിൽ  ഭവാനി പുഴയുടെ  തീരത്ത് ഏകദേശം 827 ചതുരശ്ര കിലോമീറ്റർ വിസ്തൃതിയിൽ  വ്യാപിച്ചു കിടക്കുന്ന  അട്ടപ്പാടി  മേഖലയില്‍ ഉരുത്തിരിഞ്ഞ  കേരളത്തിന്റെ  തനത് ആടുകളാണ്  അട്ടപ്പാടി ബ്ലാക്ക് അഥവാ അട്ടപ്പാടി കരിയാടുകള്‍. അട്ടപ്പാടി മേഖലയിൽ ഉൾപ്പെടുന്ന പോഡൂർ, അഗളി, ഷോളയാർ എന്നീ  ഗ്രാമപഞ്ചായത്തുകളിലെ ഗോത്രഗ്രാമങ്ങളിലാണ് പ്രധാനമായും ഈ ജനുസ് ആടുകൾ കാണുന്നതും പരിപാലിക്കപ്പെടുന്നതും.   ഇരുളരും കുറുമ്പരും മുതുകരും ഉള്‍പ്പെടെയുള്ള പരമ്പരാഗത ഗോത്രസമൂഹമാണ്  അട്ടപ്പാടി ബ്ലാക്ക് ആടുകളുടെ വംശരക്ഷകര്‍. തങ്ങളുടെ കുടുംബത്തിലെ ഒരംഗത്തെ പോലെയാണ് ഗോത്രജനത അട്ടപ്പാടി ആടുകളെ പരിപാലിക്കുന്നത്. ഗോത്രജനതയുടെ സാമൂഹിക- സാമ്പത്തിക- സാംസ്‌കാരിക ജീവിതത്തിൽ അട്ടപ്പാടി കരിയാടുകൾക്ക്  വലിയ സ്ഥാനമുണ്ട് . ഒരു കുടുംബത്തിന്റെ സമ്പത്തും ധനസ്ഥിതിയും കണക്കാക്കുന്നത് പോലും അവർക്ക് സ്വന്തമായുള്ള ആടുകളുടെ എന്നതിന്റെ അടിസ്ഥാനത്തിലാണ്.  അട്ടപ്പാടി ആടുകളുടെ പാലും ഇറച്ചിയും ആരോഗ്യദായകവും ഔഷധവുമാണെന്നാണ് ഗോത്രസമൂഹത്തിനിടയിലെ പരമ്പരാഗതവിശ്വാസം. പകല്‍ മുഴുവന്‍ അട്ടപ്പാടി വനമേഖലയില്‍ മേയാന്‍ വിട്ടും  രാത്രികാലങ്ങളില്‍ ഈറ്റകൊണ്ടും മരത്തടികൊണ്ടും നിര്‍മ്മിച്ച കൂടുകളില്‍ പാര്‍പ്പിച്ചുമാണ്  പരമ്പരാഗത കർഷകർ  അട്ടപ്പാടി ആടുകളെ പരിപാലിക്കുന്നത്.

പൊതുവെ മെലിഞ്ഞ ശരീരപ്രകൃതിയുള്ളവയാണ് അട്ടപ്പാടി കരിയാടുകൾ.  എണ്ണകറുപ്പുള്ള രോമാവരണവും ചെമ്പന്‍ കണ്ണുകളുമാണ് (Bronze)  അട്ടപ്പാടി കരിയാടുകൾക്കുള്ളത് .  അരയടിയോളം മാത്രം നീളത്തിൽ തൂങ്ങിക്കിടക്കുന്ന വീതി കുറഞ്ഞ കറുത്ത ചെവികളും കുത്തനെ വളർന്ന് പിന്നോട്ട് പിരിഞ്ഞ് വളരുന്ന ചാരനിറമുള്ള കൊമ്പുകളുമാണ് അട്ടപ്പാടി  ആടുകളുടെ മുഖലക്ഷണം. പെണ്ണാടുകളിലും ആണാടുകളിലുമെല്ലാം കൊമ്പുകൾ കാണാം. ചെറിയ ശതമാനം ആടുകളുടെ കഴുത്തിൽ തൂങ്ങിക്കിടക്കുന്ന  തൊങ്ങലുകൾ കാണാം, അതും കറുപ്പ് തന്നെ. കുന്നുകളും, പാറക്കല്ലുകളും നിറഞ്ഞ അട്ടപ്പാടിയിലെ  മലമേഖലയിലും വനമേഖലയിലും  മേയുന്നതിന് അനുയോജ്യമായ കരുത്തുള്ള നീളന്‍ കൈകാലുകളും ഉറപ്പുള്ള കുളമ്പുകളും  അട്ടപ്പാടി കരിയാടുകളുടെ  സവിശേഷതയാണ്.

ഉയർന്ന  രോഗപ്രതിരോധശേഷിയും  ചൂടുള്ളതും വരണ്ടതുമായ  കാലാവസ്ഥയെ പ്രതിരോധിക്കാനുള്ള  അതിജീവനശേഷിയും അട്ടപ്പാടി ബ്ലാക്ക് ആടുകള്‍ക്കുണ്ട്. വളരെ കുറഞ്ഞ അളവ് വെള്ളം മാത്രമേ ഈ ആടുകൾക്ക് ആവശ്യമുള്ളൂ. മറ്റിനം ആടുകൾ പൊതുവെ കഴിക്കാൻ മടിക്കുന്ന ഗുണമേന്മ കുറഞ്ഞ പുല്ലും പച്ചിലകളും എല്ലാം അട്ടപ്പാടി ആടുകൾ ഒരു മടിയും കൂടാതെ ആഹരിക്കും. 8 –  9 മാസമെത്തുമ്പോൾ പെണ്ണാടുകൾ ആദ്യ മദി ലക്ഷണങ്ങൾ കാണിക്കും . 13 – 14 മാസം പ്രായമെത്തുമ്പോൾ തന്നെ ആദ്യ പ്രസവം നടക്കും . ഭൂരിഭാഗം പ്രസവങ്ങളിലും ഒറ്റ കുഞ്ഞുങ്ങൾ മാത്രമേ ഉണ്ടാവുകയുള്ളു .കുഞ്ഞുങ്ങൾക്ക് 1. 65 കിലോഗ്രാം വരെ ശരീരതൂക്കമുണ്ടാവും.  പ്രതിദിനം കാല്‍ ലിറ്ററില്‍ താഴെ മാത്രമാണ്  പാലുത്പാദനം .   മാംസാവശ്യത്തിനായാണ് അട്ടപ്പാടി ആടുകളെ പ്രധാനമായും വളര്‍ത്തുന്നത്. മുതിർന്ന 18 മാസത്തിലധികം പ്രായമുള്ള  മുട്ടനാടുകൾക്ക് ശരാശരി 35 – 40  കിലോഗ്രാം വരെയും പെണ്ണാടുകൾക്ക് 30 – 32   കിലോഗ്രാം വരെയും ശരീരതൂക്കമുണ്ടാവും . പകൽ മുഴുവൻ മേഞ്ഞുനടന്നുള്ള  ജീവിതം ഇഷ്ടപെടുന്ന ആടുകളായതിനാൽ കൂട്ടിൽ തന്നെ കെട്ടിയിട്ട് വളർത്താൻ ഈ ആടുകൾ അനിയോജ്യമല്ല.

മാംസാവശ്യത്തിനുള്ള വില്പനയും കശാപ്പും വ്യാപകമായതോടെ അട്ടപ്പാടി ആടുകൾ ഇന്ന് വംശനാശത്തിന്റെ വക്കിലാണ്. ആദിവാസികർഷകരുടെ സാമൂഹിക സാമ്പത്തിക സാഹചര്യങ്ങളെ ചൂഷണം ചെയ്‌ത്‌ അവരിൽ നിന്നും തീരെ  തുച്ഛമായ വിലയിൽ ആടുകളെ വാങ്ങി മറിച്ചുവിൽക്കുന്ന  ലോബിയും സജീവം. ആടുകളുടെ എണ്ണം കുറഞ്ഞതോടെ രക്തബന്ധമുള്ള ആടുകൾ തമ്മിലുള്ള അന്തർപ്രജനനം (ഇൻബ്രീഡിങ് ) വ്യാപകമായതും വനമേഖലയില്‍ മേയുന്നതിനിടെ മറ്റ് ജനുസ്സിൽ പെട്ട ആടുകളുമായുള്ള   വര്‍ഗ്ഗസങ്കരണവും (ക്രോസ്സ്ബ്രീഡിങ് ) അട്ടപ്പാടി ആടുകളുടെ വംശനാശത്തിന് ആക്കം കൂട്ടിയിട്ടുണ്ട് .   ഇന്ന്  ഏകദേശം നാലായിരത്തോളം മാത്രമാണ് അട്ടപ്പാടിമേഖലയിൽ ശുദ്ധജനുസ്സ് കരിയാടുകൾ അവശേഷിക്കുന്നത്.അട്ടപ്പാടി ആടുകളെ സംരക്ഷിക്കുന്നതിനായി അട്ടപ്പാടിയിൽ മൃഗസംരക്ഷണവകുപ്പിന്റെ കീഴിൽ സംരക്ഷണകേന്ദ്രം പ്രവർത്തിക്കുന്നുണ്ട്. പാലക്കാട് ധോണിയിലെ കേരള ലൈവ്സ്റ്റോക്ക് ഡെവലപ്മെന്റ് ബോർഡിന്റെ  ഫാമിലും വെറ്ററിനറി സർവകലാശാലയുടെ കീഴിലുള്ള  മണ്ണുത്തി വെറ്ററിനറി കോളേജിലെ ആട് വളർത്തൽ കേന്ദ്രത്തിലും പാലക്കാട് തിരുവിഴാംകുന്ന് ഫാമിലും അട്ടപ്പാടി ആടുകളെ പരിരക്ഷിക്കുന്നുണ്ട് .അട്ടപ്പാടി ആടുകളുടെ സവിശേഷതകളിലേക്ക് വെളിച്ചം വീശുന്ന  നിരവധി ഗവേഷണപഠനങ്ങളും ഈ കേന്ദ്രങ്ങളിൽ നടന്നുവരുന്നു.