ആർസെനികം ആൽബം എന്ന ഹോമിയോ ഔഷധവും ഗുജറാത്തിലെ കോവിഡും.

• കോവിഡ് രോഗം ആഗോളപ്രശ്നമാണ്. നമ്മുടെ രാജ്യത്തും വലിയ പ്രശ്നം തന്നെയാണ്. ലോകാരോഗ്യ സംഘടനയും പല ലോകരാഷ്ട്രങ്ങളും വൈറസിനെ കുറിച്ചും, രോഗവ്യാപനം, ചികിത്സ എന്നിവയെക്കുറിച്ചും വിശ്രമമില്ലാതെ പഠിച്ചുകൊണ്ടിരിക്കുന്നു. ലോകാരോഗ്യ സംഘടനയുടെ സമിതി ആഗോളതലത്തിൽ വാക്‌സിൻ, ചികിത്സ, ഗവേഷണം എന്നിവയ്ക്കായി നിക്ഷേപം സമാഹരിച്ചിട്ടുണ്ട്. ഏതാനും ദിവസങ്ങൾക്കു മുമ്പ്, യൂറോപ്യൻ കമ്മീഷൻ വഴി 740 കോടി യൂറോ ഇതിലേക്കായി കണ്ടെത്തി. ഇതിനുപുറമെ അമേരിക്ക പോലുള്ള രാജ്യങ്ങളും, സ്വകാര്യ ഗവേഷണ സ്ഥാപനങ്ങളും സ്വന്തം നിലയ്ക്കും പണം നിക്ഷേപിച്ചു പഠനങ്ങളുമായി മുന്നോട്ടു പോകുന്നു. നിക്ഷേപങ്ങളിലേറെയും മരുന്ന് ഗവേഷണത്തിനോ പ്രതിരോധ വാക്സിൻ കണ്ടെത്താനോ ആണ്.
• എന്നാൽ ഇന്ത്യയിൽ നടക്കുന്ന തമാശ ശ്രദ്ധിക്കുക. ഇന്ത്യയിൽ വ്യാപകമായി ആർസെനികം ആൽബം 30 എന്ന ഔഷധം പ്രതിരോധം വർധിപ്പിക്കാനായി നൽകിവരുന്നു. വാക്സിൻ ഗവേഷണത്തിനായി ആയിരക്കണക്കിന് ഡോളർ ചിലവാക്കുമ്പോഴാണ് ആർസെനികം ആൽബം പ്രചരിപ്പിക്കുന്നത്. ഒന്നോർത്തുനോക്കൂ; ഇവർക്കാർക്കും ഇങ്ങനൊരു മരുന്നിനെക്കുറിച്ചു ധാരണയില്ലെന്നു വരുമോ? ആശയവിനിമയ മേഖല ഇത്രയും വികസിച്ചിരിക്കുന്ന ഇക്കാലത്ത് ഇന്ത്യയിലുള്ള അത്ഭുത മരുന്ന് ലോകശ്രദ്ധ നേടേണ്ടതല്ലേ?
• ഇനി, അവർക്കാർക്കും ഇതേക്കുറിച്ചു അറിവില്ലെന്നു കരുതുക, നമ്മുടെ ആയുഷ് വകുപ്പിനോ, ഹോമിയോയുടെ കേന്ദ്ര ഗവേഷണ കൗൺസിലിനോ ഇതെടുത്ത് ലോകാരോഗ്യ സംഘടനയുടെ മുന്നിൽ വെയ്ക്കാൻ എന്താണ് തടസ്സം?
• എന്നാൽ ആവർത്തിച്ച് വരുന്ന പല വൈറസ് രോഗങ്ങളിലും ഫലമുണ്ടായിരുന്നെന്നു വെറുതെ അവകാശപ്പെടുന്നതിനു പകരം എന്തുകൊണ്ട് ഇപ്പോഴെങ്കിലും രജിസ്റ്റർചെയ്ത ഒരു പഠനമെങ്കിലും നടത്തിക്കൂടാ?
• കേരളമുൾപ്പടെ പല സംസ്ഥാനങ്ങളിലും ആർസനികം ആൽബം നൽകിവരുന്നു. സൗജന്യമായി വിതരണം ചെയ്യുന്ന ഇതിന് സർക്കാർ എത്ര ചിലവാക്കേണ്ടിവരും എന്ന് നോക്കാം. ഒരു യൂണിറ്റിന് വില 80 മുതൽ 120 രൂപവരെ. ഗുജറാത്തിൽ ഇതിനകം ലക്ഷങ്ങൾക്കാണ് സൗജന്യ വിതരണം ചെയ്തിരിക്കുന്നത്. കേരളമുൾപ്പടെ മറ്റു സംസ്ഥാനങ്ങളിലും സ്ഥിതി വ്യത്യസ്തമല്ല. കോടിയിലധികം ജനസംഖ്യയുള്ള സംസ്ഥാനങ്ങളിൽ വിതരണം ചെയ്താൽ എത്രകോടി രൂപ സർക്കാർ ചിലവാക്കേണ്ടിവരും? ആർസനികം ദിവ്യ ഔഷധമെന്നു കരുതുന്നവർക്ക് ഒന്നും നഷ്ടപ്പെടാനില്ല.
• എന്നാൽ രോഗികൾക്ക് മെച്ചപ്പെട്ട സൗകര്യങ്ങളൊരുക്കാനും, മുൻ നിരയിൽ പ്രവർത്തിക്കുന്നവർക്ക് മെച്ചപ്പെട്ട ഉപകരണങ്ങൾ ലഭ്യമാക്കാനും, പരിശോധനയ്ക്ക് വേണ്ടത്ര കിറ്റുകൾ സംഘടിപ്പിക്കാനും ഇതൊരു താങ്ങായി ഭവിച്ചേനെ. ഒരു സംസ്ഥാനം വെറും 50 ലക്ഷം ആർസെനികം യൂണിറ്റ് വാങ്ങിയാൽ നൂറു രൂപ നിരക്കിൽ 50 കോടി ചിലവാകുന്നു. പിന്നെ വിതരണത്തിനും സംഭരണത്തിനും വരുന്ന ചിലവ്.
• ഗൗരവമായി കാണേണ്ട ഒരു കാര്യമുണ്ട്. 6000 പേരിൽ നടത്തിയ പഠനത്തിൽ ആർസെനികം കഴിച്ച ആർക്കും കോവിഡ് ബാധിച്ചില്ല എന്നത് തെളിവാണെന്ന് ഗുജറാത്ത് ഹെല്‍ത്ത് സെക്രെട്ടറി പറയുന്നു. ഇത് ശരിയെന്നു കരുതുക. ഇന്നത്തെ കണക്കനുസരിച്ചു ഗുജറാത്തിൽ 5804 രോഗികളുണ്ട്; മരണം 319. മെയ് ഒന്ന് മുതൽ വലിയ വർദ്ധനവാണ് സംസ്ഥാനം രേഖപ്പെടുത്തുന്നത്. ഏപ്രിൽ 10 ആം തിയ്യതി മുതൽ നടത്തിയ പരീക്ഷണത്തിൽ തെളിഞ്ഞതല്ലേ? എന്തുകൊണ്ട് അടുത്ത വാരം ഇവർക്കെല്ലാം മരുന്ന് കൊടുത്തു സംരക്ഷിച്ചില്ല. അവർക്ക് ദിവ്യ ഔഷധം കിട്ടിയില്ലെങ്കിൽ അതിന്റെ ഉത്തരവാദിത്തത്തിൽ നിന്ന് വീഡിയോ പുറത്തുവിട്ട ഉദ്യോഗസ്ഥ കൂടി കുറ്റാരോപിതയാകുന്നില്ലേ?. അത് പോട്ടെ, എന്തുകൊണ്ടാണ്, ഹോമിയോപ്പതി വിദഗ്ദ്‌ഗർ സ്റ്റേറ്റ് ഹെൽത് ഡിപ്പാർട്മെന്റിനെതിരെ അനാസ്ഥ ആരോപിക്കാത്തത്, അറ്റ് ലീസ്റ്റ്, ഒരു അന്വേഷണമെങ്കിലും വേണമെന്നു പറയേണ്ടേ? ശാസ്ത്രാവബോധമുള്ളവർ ഗൗരവമായി ചിന്തിക്കേണ്ട വിഷയമാണിത്.

ഈ പ്രചരണത്തില്‍ വിശ്വസിച്ച് ആ മരുന്നും കഴിച്ച് ബ്രയിക് ദ ചയിനും മാസ്ക്കുും ശാരീരിക അകലവുമെല്ലാം വേണ്ടെന്ന് ആരെങ്കിലുമൊക്കെ തീരുമാനിച്ചാല്‍ അത് സൃഷ്ടിക്കാവുന്ന ദുരന്തം ചില്ലറയാവില്ല.  നമ്മള്‍ കോവിഡിനെതിരായ പോരാട്ടത്തിന്റെ പാതിപോലും പിന്നിട്ടില്ല. രാജ്യത്ത് കോവിഡ് പെരുകുകയാണ്. അതിനിടയില്‍ പൂര്‍ണ്ണബോധ്യമുള്ള കാര്യങ്ങളെയേ നാം പ്രത്സാഹിപ്പിക്കാവൂ. അക്കാര്യത്തിലും ജാഗ്രത ആവശ്യമാണ്.