• മെയ് 4ന്  സംസ്ഥാനത്ത് ആര്‍ക്കും കോവിഡ്-19 സ്ഥിരീകരിച്ചില്ല. രോഗമുക്തി നേടിയത് 61 പേര്‍; ഇനി ചികിത്സയിലുള്ളത് 34 പേര്‍; ഇതുവരെ രോഗമുക്തി നേടിയവര്‍ 462
• കണ്ണൂര്‍ ജില്ലയില്‍ നിന്നുള്ള 19 പേരും കോട്ടയം ജില്ലയില്‍ നിന്നുള്ള 12 പേരും ഇടുക്കി ജില്ലയില്‍ നിന്നുള്ള 11 പേരും കൊല്ലം ജില്ലയില്‍ നിന്നുള്ള 9 പേരും കോഴിക്കോട് ജില്ലയില്‍ നിന്നുള്ള 4 പേരും മലപ്പുറം, കാസര്‍ഗോഡ്, തിരുവനന്തപുരം ജില്ലകളില്‍ നിന്നുള്ള 2 പേരുടെ വീതവും പരിശോധനാ ഫലമാണ് നെഗറ്റീവായത്. ഇതോടെ തിരുവനന്തപുരം, മലപ്പുറം, കോഴിക്കോട് ജില്ലകളില്‍ കോവിഡ് രോഗികള്‍ ഇല്ലാത്ത ജില്ലയായി.
• സംസ്ഥാനത്തെ വിവിധ ജില്ലകളിലായി 21,724 പേര്‍ നിരീക്ഷണത്തിലാണ്. ഇവരില്‍ 21,352 പേര്‍ വീടുകളിലും 372 പേര്‍ ആശുപത്രികളിലും നിരീക്ഷണത്തിലാണ്. 62 പേരെയാണ് ഇന്ന് ആശുപത്രിയില്‍ പ്രവേശിപ്പിച്ചത്. ഇതുവരെ 33,010 വ്യക്തികളുടെ (ഓഗ്‌മെന്റഡ് സാമ്പിള്‍ ഉള്‍പ്പെടെ) സാമ്പിള്‍ പരിശോധനയ്ക്ക് അയച്ചിട്ടുണ്ട്. ഇതില്‍ ലഭ്യമായ 32,315 സാമ്പിളുകളുടെ പരിശോധനാഫലം നെഗറ്റിവ് ആണ്. ഇതുകൂടാതെ സെന്റിനല്‍ സര്‍വൈലന്‍സിന്റെ ഭാഗമായി ആരോഗ്യ പ്രവര്‍ത്തകര്‍, അതിഥി തൊഴിലാളികള്‍, സാമൂഹിക സമ്പര്‍ക്കം കൂടുതലുള്ള വ്യക്തികള്‍ മുതലായ മുന്‍ഗണനാ ഗ്രൂപ്പുകളില്‍ നിന്ന് 2431 സാമ്പിളുകള്‍ ശേഖരിച്ചതില്‍ 1846 സാമ്പിളുകള്‍ നെഗറ്റീവ് ആയി.
• വ്യാഴാഴ്ച്ച പ്രവാസികളുമായി എയർ ഇന്ത്യയുടെ രണ്ട് വിമാനങ്ങൾ കേരളത്തിലേക്ക്
• അടച്ചുപൂട്ടലിനെ തുടർന്ന്‌ മറ്റ്‌ സംസ്ഥാനങ്ങളിൽ കുടുങ്ങിയ മലയാളികൾ തിരിച്ചെത്തുന്നു. ആദ്യദിനമായ തിങ്കളാഴ്‌ച ആറ്‌ അതിർത്തി ചെക്ക്‌ പോസ്‌റ്റുകൾ വഴി എത്തിയത് ആയിരത്തിലേറെപേർ‌. നോർക്കയിൽ രജിസ്‌റ്റർ ചെയ്‌ത 1,70,917 പേരിൽ  28,820 പേരാണ്‌ പാസിന്‌ അപേക്ഷിച്ചത്‌. ഇതിൽ പാസ്‌ ലഭിച്ചവരാണ്‌ ‌ എത്തിയത്‌.

ലോക്ക്ഡൗണ്‍ ഉണ്ടാക്കിയ നഷ്ടം

• കോവിഡ്‌ സൃഷ്ടിച്ച അടച്ചുപൂട്ടലിൽ സംസ്ഥാനത്തിന്റെ മൊത്ത നഷ്ടം 29,000 കോടി രൂപ. സമ്പദ്‌ഘടനയിൽ മൊത്തം മൂല്യവർധനയിൽ ഇക്കാലയളവിൽ 80 ശതമാനത്തിന്റെ കുറവ്‌ കണക്കാക്കി. സംസ്ഥാന ആസൂത്രണ ബോർഡിന്റെ ദ്രുതഗതി വിലയിരുത്തലിലാണ്‌ കോവിഡും തുടർന്നുള്ള അടച്ചുപൂട്ടലും കേരള സമ്പദ്‌ഘടനയിൽ ചെലുത്തിയ ആഘാതം വ്യക്തമാക്കിയത്‌. തോട്ടമുൾപ്പെടെ കാർഷിക മേഖലയിലെ മൊത്ത നഷ്ടം 1570.75 കോടിയാണ്‌. നെൽക്കൃഷിയിലിത്‌ 15 കോടിയാണ്‌‌. മത്സ്യമേഖലയ്‌ക്ക്‌ മൊത്ത നഷ്ടം 1371 കോടിയാണ്‌.  വ്യവസായ മേഖലയിൽ ഉൽപ്പാദനമുല്യവർധന നഷ്ടം 8000 കോടി  കവിയുമെന്നാണ്‌ അനുമാനം. പരമ്പരാഗത വ്യവസായത്തിലടക്കം 35.2 ലക്ഷം സാധാരണ തൊഴിലാളികൾക്ക്‌ പൂർണ വരുമാന നഷ്ടവുമുണ്ട്‌. . വിനോദസഞ്ചാര കലണ്ടറിന്റെ മുഖ്യപങ്കും പ്രതിസന്ധിയിലായി. 20,000 കോടി രൂപയാണ്‌ താൽക്കാലിക നഷ്‌ടം. റോഡ്‌ ഗതാഗത മേഖലയിൽ പ്രതിദിന അറ്റവരുമാന നഷ്ടം 241 കോടി കവിയും. ഐടി മേഖലയിൽ പ്രതിദിനം 26,200 തൊഴിൽ നഷ്ടമുണ്ട്‌. അനുബന്ധ പരോക്ഷ തൊഴിൽ നഷ്ടം 80,000 ദിനവും. കെഎസ്‌ഇബിക്ക്‌ 210 കോടിയുടെ വരുമാന നഷ്ടമുണ്ടാകും. വ്യവസായ, വാണിജ്യ, സ്ഥാപന ഉപയോക്താക്കളിൽനിന്നുള്ള വരുമാന കുറവാണിത്‌.

മറ്റു സംസ്ഥാനങ്ങളില്‍ നിന്നും വിദേശത്തുനിന്നും മലയാളികള്‍ തിരികെയെത്തുമ്പോള്‍ പ്രായമായവർക്കും രോഗികൾക്കും പ്രത്യേക ശ്രദ്ധ വേണം

• ഇവർക്ക്‌ ടെലിമെഡിസിൻ സൗകര്യം ലഭ്യമാക്കണം. ഡോക്ടർമാരുടെ വിവരം ആരോഗ്യപ്രവർത്തകർ വീടുകളിലെത്തിക്കണം.
• ഡോക്ടർക്ക്‌ രോഗിയെ കാണണമെന്ന്‌ തോന്നിയാൽ പിഎച്ച്‌സികൾ വാഹനസൗകര്യം നൽകണം‌. ഓരോ പഞ്ചായത്തിലും ഡോക്ടർ, സ്‌റ്റാഫ്‌ നേഴ്‌സ്‌, പാരാമെഡിക്കൽ സ്‌റ്റാഫ്‌ എന്നിവരടങ്ങിയ മൊബൈൽ ക്ലിനിക് സജ്ജമാക്കണം‌. രോഗബാധിതർക്കും പ്രായമായവർക്കും ബോധവൽക്കരണം നൽകണം.
• ആരോഗ്യപ്രവർത്തകരുടെ കൂട്ടായ്‌മ രൂപീകരിച്ച്‌ എല്ലാ തദ്ദേശഭരണ സ്ഥാപനങ്ങളിലും ഡോക്ടർമാർക്ക്‌ പ്രത്യേക ചുമതല നൽകണം.
• സ്വകാര്യ ആശുപത്രി സേവനവും പ്രയോജനപ്പെടുത്തണം. തീരുമാനങ്ങൾ നടപ്പാക്കുന്നുവെന്ന്‌ പ്രാദേശിക മോണിറ്ററിങ്‌ സമിതി ഉറപ്പാക്കണം‌. റസിഡൻസ്‌ അസോസിയേഷൻ പ്രതിനിധി അല്ലെങ്കിൽ നാട്ടുകാരുടെ രണ്ട്‌ പ്രതിനിധി, വാർഡ്‌ മെമ്പർ, കൗൺസിലർ, എസ്‌ഐ, വില്ലേജ്‌ ഓഫീസർ, സന്നദ്ധപ്രവർത്തക പ്രതിനിധി, അങ്കണവാടി ടീച്ചർ, ആശാവർക്കർ, കുടുംബശ്രീ, പെൻഷനേഴ്‌സ്‌ യൂണിയൻ പ്രതിനിധികൾ ഇതിൽ അംഗങ്ങളാകണം.

പുതിയ ഹോട്ട് സ്‌പോട്ടുകളില്ല

സംസ്ഥാനത്ത് ഇന്ന് പുതിയ ഹോട്ട് സ്‌പോട്ടുകള്‍ ഇല്ല. സംസ്ഥാനത്ത് 84 ഹോട്ട് സ്‌പോട്ടുകളാണ് ഉള്ളത്.