• കഴിഞ്ഞ 24 മണിക്കൂറിനുള്ളിൽ 2391 കോവിഡ് -19 കേസുകൾ റിപ്പോർട്ട് ചെയ്തു.
  948 രോഗികൾ സുഖം പ്രാപിച്ചു. രാജ്യത്ത് മൊത്തം കേസുകൾ 37257.
• 26023 സജീവ കേസുകളും ,8,888 രോഗശാന്തി / ഡിസ്ചാർജ് / മൈഗ്രേറ്റ് കേസുകളും ഉൾപ്പെടുന്നു. ആകെ കേസുകളിൽ 111 വിദേശ പൗരന്മാർ ഉൾപ്പെടുന്നു.
• രണ്ടാഴ്ചത്തേക്ക് ലോക്ക്ഡൗൺ നീട്ടി.
• രാജ്യത്തെ ആകെ കേസുകളുടെ 30 ശതമാനവും മഹാരാഷ്ട്രയില്‍ നിന്നാണ്. രാജ്യത്തെ ഏറ്റവും വലിയ ഹോട്ട്സ്പോട്ടായി മുംബൈ മാറിയിരിക്കുന്നു. ഇന്നലെ മാത്രം 1008 കേസുകളാണ് മഹാരാഷ്ട്രയില്‍ നിന്ന് റിപ്പോര്‍ട്ട് ചെയ്യപ്പെട്ടത്. അതായത് ഇന്നലെ രാജ്യത്താകെ റിപ്പോര്‍ട്ട് ചെയ്ത കേസുകളിലെ പകുതിയും മഹാരാഷ്ട്രയില്‍നിന്ന് മാത്രമാണ്. ഇതില്‍ 750 കേസുകളും മുംബൈയില്‍ നിന്നുമാത്രമാണ്.
• ഡല്‍ഹിയില്‍ ഇന്നലെ മാത്രം 223 പുതിയ കേസുകളാണ് റിപ്പോര്‍ട്ട് ചെയ്യപ്പെട്ടത്. ജനസംഖ്യാനുപാതികമായി നോക്കുമ്പോള്‍ രാജ്യത്ത് ഏറ്റവും കൂടുതല്‍ ടെസ്റ്റ് നടക്കുന്നത് ഡല്‍ഹിയിലാണ്. പത്ത് ലക്ഷം ജനസംഖ്യക്ക്  2800 ടെസ്റ്റുകളാണ് ഇപ്പോള്‍ നടക്കുന്നത്.
• ഡൽഹിയിലെ ഇന്തോ-ടിബറ്റൻ ബോർഡർ പോലീസിന്റെ (ഐടിബിപി) അഞ്ച് ജവാൻമാർക്ക് കഴിഞ്ഞ 48 മണിക്കൂറിനുള്ളിൽ കോവിഡ് -19 പോസിറ്റീവ് റിപ്പോർട്ട് ചെയ്തു.
• കർണാടക: 22 മരണങ്ങൾ ഉൾപ്പെടെ 589 കൊറോണ വൈറസ് കേസുകൾ സ്ഥിരീകരിച്ചു. കഴിഞ്ഞ 24 മണിക്കൂറിനുള്ളിൽ സംസ്ഥാനത്ത് 24 പുതിയ കേസുകൾ റിപ്പോർട് ചെയ്തു.
• കോവിഡ് -19 കേസുകൾ, ഇരട്ടിയാകൽ നിരക്ക് , വ്യാപ്തി എന്നിവയുടെ അടിസ്ഥാനത്തിൽ കേന്ദ്ര ആരോഗ്യ മന്ത്രാലയം രാജ്യത്തെ 130 ജില്ലകളെ റെഡ് സോണിലും 284 ഓറഞ്ച് സോണിലും 319 ഗ്രീൻ സോണിലും പട്ടികപ്പെടുത്തിയിട്ടുണ്ട്.
• മുംബൈയിലെ കല്യാൺ ഡൊംബിവാലി മെട്രോപൊളിറ്റൻ ഏരിയയിൽ നിന്ന് ഏഴ് പുതിയ കൊറോണ വൈറസ് കേസുകൾ പുറത്തുവന്നു, ഇത് 169 ആയി. ഇതുവരെ 51 പേർ സുഖം പ്രാപിച്ചു.
• ഇന്ത്യയിൽ ഏകദേശം 19,398 വെന്റിലേറ്ററുകൾ ലഭ്യമാണ്, 60,884 എണ്ണം കൂടി ഓർഡർ ചെയ്തിട്ടുണ്ട്, അതിൽ 59,884 എണ്ണം ആഭ്യന്തര നിർമ്മാതാക്കൾ നൽകും. 2.01 കോടി പിപിഇയുടെ ആവശ്യം നിറവേറ്റാൻ 2.22 കോടി പിപിഇ ഉത്തരവിട്ടതായി കേന്ദ്രം. ആകെ 2.49 കോടിയിൽ, എൻ -95 / എൻ -99 മാസ്കുകൾ ഓർഡർ ചെയ്തു, 1.49 കോടി മാസ്കുകൾ ആഭ്യന്തര നിർമ്മാതാക്കളിൽ നിന്ന് ഓർഡർ ചെയ്തു. 4 ലക്ഷത്തിലധികം ഓക്സിജൻ സിലിണ്ടറുകൾ ലഭ്യമാണ്; നിലവിലെ സാഹചര്യത്തിന് തികയുന്ന അളവിൽ സംഭരിച്ചിട്ടുണ്ട് ഒരു ലക്ഷത്തിലധികം ഓക്സിജൻ സിലിണ്ടറുകൾക്കുള്ള ഓർഡറുകൾ നൽകി.

ടെസ്റ്റ് റേറ്റ് – ഏറ്റവും മുൻപന്തിയിൽ നിന്നിരുന്ന കേരളം ഇപ്പോൾ എന്തുകൊണ്ട് പിന്നോക്കം പോയി?

കോവിഡ് രോഗം കണ്ടെത്തുന്നതിനും ചികിത്സിക്കുന്നതിനും വ്യാപനം തടയുന്നതിനും അത്യാവശ്യമാണ് ടെസ്റ്റിംഗ്. സംശയമില്ല. രോഗം നിലവിലുള്ള ഇടങ്ങളിലും വ്യാപനം നടക്കുന്ന ഇടങ്ങളിലും ടെസ്റ്റിംഗ് വർധിപ്പിക്കുന്നത് മെച്ചപ്പെട്ട രോഗനിര്‍ണയത്തിനും, വൈറസ് നിയന്ത്രണത്തിനും സഹായകരമാണ്.
എന്നാൽ കഴിഞ്ഞ ഏതാനും ദിവസങ്ങളായി നടക്കുന്ന ചർച്ച കേരളത്തിന്റെ ടെസ്റ്റ് റേറ്റ് ആണ്. തുടക്കത്തിൽ ഏറ്റവും മുൻപന്തിയിൽ നിന്നിരുന്ന കേരളം ഇപ്പോൾ എന്തുകൊണ്ട് പിന്നോക്കം പോയി? എന്തുകൊണ്ട് മറ്റു ചില സംസ്ഥാനങ്ങൾക്കൊപ്പം കേരളം മുൻ നിര പങ്കുവെയ്ക്കുന്നില്ല?
ഇതേക്കുറിച്ചു കൂടുതൽ പഠനം ആവശ്യമാണ്.

ടെസ്റ്റ് എണ്ണത്തെ സ്വാധീനിക്കുന്ന ഘടകങ്ങള്‍

1. ലോക് ഡൌൺ ആരംഭിച്ചശേഷം കേരളത്തിൽ കോവിഡ് സാന്നിധ്യം കുറഞ്ഞു വരുന്നു. അതിനെ ഇങ്ങനെ കാണാം. നമ്മൾ ചെയ്ത ടെസ്റ്റിൽ എത്ര എണ്ണം പോസിറ്റീവ് ആയി എന്ന് നോക്കാം. തുടക്കത്തിൽ 4% പോസിറ്റീവ് ആയിരുന്നെങ്കിൽ ഇപ്പോളാകട്ടെ പോസിറ്റീവ് ആയിരിക്കുന്നത് വെറും 2.16% ആണ്. കഴിഞ്ഞ പത്തു നാളിൽ (ഏപ്രിൽ 16 മുതൽ 25 വരെ) പോസിറ്റീവ് ആയത് 1.16% മാത്രം. അതായത് കോവിഡ് സംശയിച്ചു ടെസ്റ്റ് ചെയ്താൽ പോലും പോസിറ്റീവ് ആകുന്നത് വിരളം എന്നർത്ഥം. അതിവേഗം രോഗം രോഗം ബാധിച്ചിരുന്ന ഇറ്റലിയിൽ അക്കാലത്തു 20% വരെ പോസിറ്റീവ് ആയിരുന്നു. പോസിറ്റീവ് ആകുന്ന തോത് കുറയുമ്പോൾ ടെസ്റ്റുകളും കുറയും.
2. ദിവസേനയുള്ള രോഗികളുടെ സംഖ്യ പ്രധാനമാണ്. ലോക് ഡൌൺ തുടങ്ങും മുമ്പ്, കേരളത്തിൽ ദിവസേന 20 മുതൽ 40 വരെ രോഗികളെ കണ്ടെത്തിക്കൊണ്ടിരുന്നു. ഒരു ലഘു ഗണിതം പരിശോധിക്കാം. ഒരു നാളിൽ 20 പേർ പോസിറ്റീവ് ആയി എന്നിരിക്കട്ടെ. പോസിറ്റീവ് അയ വ്യക്തികൾ നൂറും നൂറ്റമ്പതും ആളുകളുമായി സമ്പർക്കത്തിൽ പെട്ടതായാണ് അറിവ് ലഭിക്കുന്നത്. അവരുടെ റൂട്ട് മാപ്പുകൾ ഓർമ്മിക്കുക. ഒരു കോവിഡ് രോഗി വെറും 50 പേരുമായി സമ്പർക്കത്തിൽ പെട്ടതായി കരുതുക. അങ്ങനെയെങ്കിൽ (20 x 50,) 1000 വ്യക്തികളെ കൂടി ടെസ്റ്റ് ചെയ്യേണ്ടിവരും. എന്നാൽ ഇപ്പോൾ, ദിവസവും റിപ്പോർട്ട് ചെയ്യപ്പെടുന്ന രോഗികളുടെ എണ്ണം ഗണ്യമായി കുറഞ്ഞു. ഒരുദിനം അഞ്ചു രോഗികളെ കണ്ടെത്തിയാൽ നമുക്ക് ടെസ്റ്റ് ചെയ്യേണ്ടത് 250 പേരെക്കൂടി മാത്രം. ടെസ്റ്റ് കുറയാൻ ഇതും കാരണമായി.
3. ടെസ്റ്റിന്റെ വ്യാപ്തി നിർണ്ണയിക്കുന്ന മറ്റൊരു ഘടകം രോഗമിരട്ടിക്കൽ സമയം ആണ്. Doubling Time എന്ന് പറയും. ദേശീയ നിരക്കിപ്പോൾ 11.3 ദിവസമാണ്. അതായത് 11 ദിവസം കൊണ്ട് ഇന്ത്യയിൽ ഇപ്പോൾ കാണുന്നതിന്റെ ഇരട്ടി രോഗികൾ ഉണ്ടാകുമെന്നർത്ഥം. കേരളത്തിൽ ഇരട്ടിക്കൽ സമയം 72 ദിവസമാണ്. ഇപ്പോൾകാണുന്നതിനെ ഇരട്ടി രോഗികൾ ഉണ്ടാകാൻ രണ്ടുമാസത്തിലധികം സമയം വേണമെന്നർത്ഥം. ഇതും ടെസ്റ്റിംഗ് റേറ്റിനെ ബാധിക്കും.
4. ടെസ്റ്റ് കിറ്റുകൾ ഇറക്കുമതി ചെയുന്നത് ഐ സി എം ആർ എന്ന ഏജൻസിയാണ്. അടുത്തിടെ അവർ ഇറക്കുമതി ചെയ്ത ടെസ്റ്റ് കിറ്റുകളിൽ പ്രശ്നമുണ്ടായതിനാല്‍ വാങ്ങൽ റദ്ദാക്കി. അതായത് പലേടത്തും പുതിയ സെറ്റ് ടെസ്റ്റ് കിറ്റുകൾ എത്താൻ സമയം കൂടുതൽ എടുക്കുമെന്ന് കാണണം.

ഇതെല്ലാം നമ്മുടെ ടെസ്റ്റ് റേറ്റിനെ ബാധിച്ചിട്ടുണ്ടാകും അതായത് കോവിഡ് വ്യാപനം തടയുന്നതിൽ യാതൊരു ശ്രദ്ധക്കുറവും ഇല്ല. കേരളം ഉടൻ തന്നെ പുതിയ സർവെയ്‌ലൻസ് ടെസ്റ്റിംഗ് എന്നതിലേക്ക് കൂടുതലായി കടക്കാൻ പോകുന്നു. ഇത് രോഗവ്യാപനം, പ്രതിരോധമാർഗ്ഗങ്ങൾ എന്നിവയിലേക്ക് കൂടുതൽ വെളിച്ചം വീശും.