Read Time:6 Minute
ഇത്തവണ പ്രകാശത്തെ തേടി നോബല്‍ വീണ്ടും എത്തിയിരിക്കുന്നു. കൂടുതല്‍ ഊര്‍ജക്ഷമവും ദീപ്തവുമായ ബ്ലൂ ലൈറ്റ് എമിറ്റിംഗ് ഡ യോഡുകള്‍ (എല്‍ ഇ ഡി) വികസിപ്പിച്ചതിന് ജാപ്പനീസ് – അമേരിക്കന്‍ ശാസ്ത്രകാരന്മാര്‍ക്കാണ് ഈ വര്‍ഷത്തെ ഫിസിക്സ് നോബല്‍. ജപ്പാനിലെ അഗോയ സര്‍വകലാശാലയിലെ പ്രൊഫസര്‍മാരായ ഇസാമു അകാസാകി, ഹിരോഷി അമാനോ എന്നിവരും അമേരിക്കയിലെ കാലിഫോര്‍ണിയ സര്‍വകലാശാലയിലെ പ്രൊഫ.ഷുജി നകാമുറയും സമ്മാനത്തുക പങ്കു വയ്ക്കും.
1905 ല്‍ പ്രകാശ ഭൌതിക പ്രഭാവം (Photoelectric Effect) തൃപ്തികരമായി വിശദീകരിക്കുകയും ക്ലാസിക്കല്‍ ഭൌതികത്തിനെ ഒന്ന് പിടിച്ചു കുലുക്കുകയും ചെയ്ത ഏതാനും പ്രബന്ധങ്ങള്‍ ആല്‍ബര്‍ട്ട് ഐന്‍സ്റ്റീന്‍ അവതരിപ്പിക്കയുണ്ടായി. ഇതിനെ അനുസ്മരിച്ച് നൂറു വര്‍ഷങ്ങള്‍ക്കിപ്പുറം 2005ല്‍ ലോകമെമ്പാടും അന്താരാഷ്‌ട്ര ഭൌതിക ശാസ്ത്ര വര്‍ഷമായി ആചരിച്ചു. ആ വര്‍ഷം തന്നെ അമേരിക്കന്‍ – ജര്‍മന്‍ ശാസ്ത്രകാരന്മാരായ റോയി ഗ്ലൌബര്‍, ജോണ്‍ ഹാള്‍, തിയോഡോര്‍ ഹാന്‍ഷ്‌ എന്നിവര്‍ അതേ മേഖലയില്‍ തന്നെ ക്വാണ്ടം പ്രകാശശാസ്ത്ര പഠനങ്ങള്‍ക്ക് നോബല്‍ നേടിയെടുത്തത് ശ്രദ്ധേയമായിരുന്നു.
ഐന്‍സ്റ്റീന്‍ 1922ല്‍ നോബല്‍ സമ്മാനം നേടുന്നതും ഫോട്ടോ ഇലക്ട്രിക് പ്രഭാവം വിശദീകരിച്ചതിനാണ്. ഏഴു വര്‍ഷങ്ങള്‍ക്കിപ്പുറം ഈ വര്‍ഷത്തെ ഭൌതികശാസ്ത്ര നോബല്‍ പുരസ്കാരം പ്രകാശത്തിന്റെ ക്വാണ്ടം സംവിധാനങ്ങളെ അഥവാ ദ്രവ്യത്തിന്റെയും പ്രകാശത്തിന്റെയും അടിസ്ഥാന ഘടകങ്ങളെക്കുറിച്ചുള്ള ശാസ്ത്ര ഗവേഷണങ്ങളില്‍ നിര്‍ണായകമായ സംഭാവനകള്‍ക്കായിരുന്നു 2012 ലെ നോബല്‍.
ചുവപ്പ് , പച്ച നിറങ്ങളില്‍ ഉള്ള എല്‍ ഇ ഡികള്‍ തൊള്ളായിരത്തി അറുപതുകളില്‍ തന്നെ വികസിപ്പിച്ചെടുക്കാന്‍ കഴിഞ്ഞെങ്കിലും നീല ഡയോഡുകള്‍ നിര്‍മിച്ച് അവയെ സംയോജിപ്പിച്ച് കൂടുതല്‍ പ്രകാശ ക്ഷമതയും ആയുസുമുള്ള ധവള വെളിച്ച ഡയോഡുകള്‍ ഉണ്ടാക്കാന്‍ കഴിഞ്ഞിരുന്നില്ല. ഇതിനുള്ള ശ്രമങ്ങള്‍ പതിറ്റാണ്ടുകള്‍ക്ക് മുന്‍പു തന്നെ തുടങ്ങിയിരുന്നു എങ്കിലും ഒട്ടേറെ തവണ നടത്തിയ പരീക്ഷണങ്ങള്‍ക്ക് ഒടുവിലാണ് വിജയം വരിക്കാന്‍ കഴിഞ്ഞത്. അകാസാകിയും അമാനോയും ചേര്‍ന്നു കൊണ്ട് അഗോയ സര്‍വകലാശാലയിലും നകാമുറ ജപ്പാനിലെ ടോക്കുഷിമയിലുള്ള നിഷിയ കെമിക്കല്‍സ് എന്ന കമ്പനിയിലും നടത്തിയ ദീര്‍ഘമായ ഗവേഷണങ്ങള്‍ക്കും പരീക്ഷണങ്ങള്‍ക്കും ഒടുവിലാണ് കൂടുതല്‍ കാര്യക്ഷമമായ വെള്ള വെളിച്ചം തൂവുന്ന എല്‍ ഇ ഡയോഡുകള്‍ നിര്‍മിച്ചെടുത്തത്.ഇരുപത്തൊന്നാം നൂറ്റാണ്ടിന്‍റെ പ്രകാശ സ്രോതസുകള്‍ എല്‍ ഇ ഡി ബള്‍ബുകള്‍ ആയിരിക്കും എന്നാണ് പ്രവചനം.
കൂടുതല്‍ ഈടുറ്റതും ഊര്‍ജക്ഷമതയുള്ളതുമായതിനാല്‍ എല്‍ ഇ ഡി സാങ്കേതികവിദ്യയുടെ മെച്ചം സ്മാര്‍ട്ട് ഫോണുകള്‍ മുതല്‍ യുദ്ധമുന്നണികളില്‍ വരെ ഉപയോഗിച്ചു തുടങ്ങിക്കഴിഞ്ഞു. ഫ്ലൂറസെന്റ്‌ ബള്‍ബുകളുടെ ആയുസ് പതിനായിരം മണിക്കൂറും ഇന്‍കാന്‍ഡസെന്റ്‌ സ്രോതസ്സുകളുടെത് ആയിരം മണിക്കൂറും മറ്റും ആയിരിക്കെ എല്‍ ഇ ഡി പ്രകാശ സ്രോതസ്സുകള്‍ ഒരു ലക്ഷം മണിക്കൂറുകള്‍ക്ക് മുകളില്‍ പ്രവര്‍ത്തിക്കാന്‍ കാര്യക്ഷമതയുളളവയാണ്.
കുറഞ്ഞ വൈദ്യുത/ഊര്‍ജ ഉപഭോഗം വഴി കൂടുതല്‍ ലൂമിനസ് ഫ്ലക്സ് (നിര്‍ദിഷ്‌ടദിശയില്‍ കിരണം വമിക്കുന്ന പ്രകാശത്തിന്റെ അളവ്‌) നല്‍കുന്ന തരം പ്രകാശ സ്രോതസ്സുകള്‍ ഇതുവഴി സാധ്യമാകും. ഒരു എല്‍ ഇ ഡി പ്രകാശ സ്രോതസ്സിന്റെ ഊര്‍ജ – കാര്യക്ഷമത പതിനാറു സാധാരണ ബള്‍ബുകള്‍ക്കും എഴുപതു ഫ്ലൂറസെന്റ്‌ ബള്‍ബുകള്‍ക്കും തുല്യമാണെന്നാണ് കണക്കാക്കുന്നത്. കുറച്ചുകൂടി വിശദമാക്കിയാല്‍ഒരു എല്‍ ഇ ഡി പ്രകാശ സ്രോതസ്സിന്റെ ഊര്‍ജ – കാര്യക്ഷമത 300 യൂണിറ്റുകളാണെങ്കിൽ (lm/W) സാധാരണ ബള്‍ബുകൾക്ക് അത് പതിനാറും , ഫ്ലൂറസെന്റ്‌ ബള്‍ബുകള്‍ക്ക്‌ എഴുപതും ആകുന്നു. ലോകത്തെ മുഴുവന്‍ ഊര്‍ജ ഉത്പാദനത്തിന്‍റെ നാലിലൊന്ന് പ്രകാശ സ്രോതസ്സുകള്‍ക്കായി ഉപയോഗിക്കുന്നതിനാല്‍ എല്‍.ഇ.ഡി ബള്‍ബുകള്‍ ഉപയോഗിച്ചാല്‍ ഭീമമായ ഊര്‍ജ ലാഭം ഇതു വഴിയുണ്ടാകും.
വെളിച്ചവിപ്ലവം സാദ്ധ്യമാക്കിയതില്‍ നീല എല്‍ ഇ ഡി കള്‍ക്കുള്ള പങ്ക് നോബല്‍ സമ്മാന ലബ്ധിയോടെ ആദരിക്കപ്പെട്ടിരികുകയാണ്. സ്റ്റോക്ക് ഹോമില്‍ ഡിസംബര്‍ പത്തിനു നടക്കുന്ന ചടങ്ങില്‍ നോബല്‍ സമ്മാനങ്ങള്‍ വിതരണം ചെയ്യും. രസതന്ത്രത്തിലെ നോബല്‍ സമ്മാനങ്ങള്‍ നാളെ പ്രഖ്യാപിക്കും
[divider]അവലംബം : നോബല്‍പ്രൈസ്.ഒാര്‍ഗ്
തയ്യാറാക്കിയത് : [author image=”http://luca.co.in/wp-content/uploads/2014/10/vs-Syam.jpg” ]വി.എസ്. ശ്യാം
https://plus.google.com/+VSShyam[/author]
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
